ଭାବରେ ଭାବ ବଣିକ
ସୁରେନ୍ଦ୍ର କୁମାର ବେହେରା
କେଉଁ ତପବଳେ ଦାସିଆ ବାଉରୀ
ନଡ଼ିଆ ଟେ ଯାଚିଦେଲା
ଭାବ ବଣିକ ମୋ ହାତ ବଢ଼େଇଣ
ଶରଧାରେ ତୋଳିନେଲା ।1।
କେଉଁ ତପବଳେ ଭକ୍ତ ସାଲବେଗ
କେତେ ଦୂରୁ ଡାକଦେଲା
ଭାବର ଠାକୁର ଶରଧା ବାଲିରେ
ରଥ ଅଟକାଇ ଦେଲା ।2।
କେଉଁ ତପବଳେ ଶବରୀ ଅଇଁଠା
କୋଳି ଚାଖି ଖୁଆଇଲା
ଭାବ ଭକତିରେ ସୁଆଦିଆ କୋଳି
ମୋପ୍ରଭୁ ବସି ଖାଇଲା ।3।
କେଉଁ ତପବଳେ ବିଦୁର ଦୁଆରେ
ଶାଗଭଜା ଖୁଆଇଲା
ଜାତି ଅଜାତିର ଟିକେବି ବିକାର
ମୋ ପ୍ରଭୁ ମନେ ନଥିଲା ।4।
କେଉଁ ତପବଳେ ଯାଜପୁର ବନ୍ଧୁ
ଉପବାସେ ଶୋଇଥିଲା
ବନ୍ଧୁପାଇଁ ପୁଣି ରାତି ଅଧ ଟାରେ
ଭୋଗ ଥାଳି ଯାଚିଦେଲା ।5।
କେଉଁ ତପବଳେ ଭକ୍ତ ବଳରାମ
ବାଲି ରଥେ ସୁମରିଲା
ଭକତ ଗୁହାରି ଶୁଣି ପାରି ହରି
ବାଲି ରଥେ ଉଭାହେଲା ।6।
କେଉଁ ତପବଳେ ଗଣେଶ ଭଟ୍ଟଙ୍କ
କଥା ରଖିବାକୁ ହେଲା
ଗଜାନନ ବେଶ ହେବାପାଇଁ ପୁଣି
ମୋପ୍ରଭୁର ଇଛା ହେଲା ।7।
କେଉଁ ତପବଳେ ମତେ ଏସଂସାରେ
ମାନବ ଜନ୍ମ ମିଳିଲା
ଭକତ ଭାବରେ ଆଦରି ନେବାକୁ
ତୋଠାରେ ଅଳି ରହିଲା ।8।
ସୁରେନ୍ଦ୍ର କୁମାର ବେହେରା
ଜିତିପୁର ,ହରିପୁର ହାଟ ,ଯାଜପୁର
