ନବରଙ୍ଗପୁର , ନବରଙ୍ଗପୁର ଜିଲ୍ଲାପାଳ କାର୍ଯ୍ୟାଳୟ ସ୍ଥିତ ଅଶୋକ ମେହଟା ସଭା ଗୃହ ଠାରେ ଆଜି ଜିଲ୍ଲାପାଳ ଡ଼ଃ କମଳ ଲୋଚନ ମିଶ୍ର, ଅତିରିକ୍ତ ଜିଲ୍ଲାପାଳ ଭାସ୍କର ରଇତ ଓ ଉପଜିଲ୍ଲାପାଳ ସୁନୀଲ କାର୍ତ୍ତିକ ଅଗ୍ରୱାଲ ଉପସ୍ଥିତିରେ ନୂତନ ଭୋଟର ସଂଶୋଧନ ତାଲିକା ପ୍ରକାଶିତ କରାଯାଇଛି l ନିର୍ବାଚନ କମିଶନ ନିର୍ଦ୍ଧେଶ ଓ ନିୟମ କୁ ଭିତ୍ତି କରି ଭୋଟର ତାଲିକା ପ୍ରସ୍ତୁତ କରାଯାଇଛି l ଏହି ତାଲିକା ଅନୁସାରେ ଜିଲ୍ଲାରେ ମୋଟ 852996 ଜଣ ଭୋଟର ଅଛନ୍ତି l ଗତ ବର୍ଷ ଡିସେମ୍ବର 2021 ରେ ପ୍ରକାଶିତ ଭୋଟର ତାଲିକାରେ ଜିଲ୍ଲାରେ 833248 ଜଣ ଥିବା ବେଳେ ବର୍ତ୍ତମାନ ନୂତନ ଭାବେ 19748 ଜଣଙ୍କ ନାମ ଭୋଟର ତାଲିକାରେ ସାମିଲ କରାଯାଇଛି l ଏହି ଭୋଟର ତାଲିକା ସଂଶୋଧନ ପ୍ରକ୍ରିୟା ଅନଲାଇନ କରାଯାଇଛି l ତ୍ରୁଟି ଓ ବିଚ୍ୟୁତ ଏଡ଼ାଇବା ପାଇଁ ସମସ୍ତ ପ୍ରକାର ବ୍ୟବସ୍ଥା କରାଯାଇଥିବା ସହ ଅଫଲାଇନ ଆସିଥିବା ଆବେଦନ ଗୁଡିକୁ ମଧ୍ୟ ଅନଲାଇନରେ ପରିବର୍ତ୍ତନ କରାଯାଇଥିବା ଜିଲ୍ଲାପାଳ ଶ୍ରୀ ମିଶ୍ର କହିଥିଲେ l ଏହି କାର୍ଯ୍ୟକ୍ରମରେ ଉପସ୍ଥିତ ରାଜନୈତିକ ଦଳର ପ୍ରତିନିଧି ମାନଙ୍କୁ ଜିଲ୍ଲାପାଳ ଭୋଟର ତାଲିକା ହସ୍ତାନ୍ତର କରିଥିଲେ l ଜିଲ୍ଲାର ଉମରକୋଟ ନିର୍ବାଚନ ମଣ୍ଡଳୀ 193192 ଜଣ ଭୋଟର ଥିବାବେଳେ ନୂତନ ଭାବେ 4488 ଜଣ ଭୋଟର ସାମିଲ ହୋଇଛନ୍ତି l ସେହିପରି ଝରିଗାଁ ନିର୍ବାଚନ ମଣ୍ଡଳୀ ରେ 211521 ଜଣ ଭୋଟରଙ୍କ ନାମ ଥିବା ବେଳେ ନୂତନ ଭାବେ 4412 ଜଣ ଭୋଟର ସାମିଲ ହୋଇଛି l ନବରଙ୍ଗପୁର ନିର୍ବାଚନ ମଣ୍ଡଳୀ ରେ 229667 ଜଣ ଭୋଟରଙ୍କ ନାମ ତାଲିକାରେ ଥିବା ବେଳେ ନୂତନ ଭାବେ 5616 ଜଣ ଭୋଟରଙ୍କ ନାମ ସାମିଲ ହୋଇଥିବା ନେଇ ଉପ ଜିଲ୍ଲାପାଳ ସୁନୀଲ କାର୍ତ୍ତିକ ଅଗ୍ରୱାଲ ସୂଚନା ଦେଇଥିଲେ l ଏହି କାର୍ଯ୍ୟକ୍ରମରେ ଅନ୍ୟ ମାନଙ୍କ ମଧ୍ୟରେ ଜିଲ୍ଲା ଉପ ନିର୍ବାଚନ ଅଧିକାରୀ ଚଇନୁ ଗଣ୍ଡ ସମେତ ରାଜନୈତିକ ଦଳର ପ୍ରତିନିଧି ପ୍ରଦୀପ ସାହୁ, ପ୍ରମୋଦ ରଥ ଓ ସତ୍ୟବାଦୀ ଷଡ଼ଙ୍ଗୀ ପ୍ରମୁଖ ଉପସ୍ଥିତ ଥିଲେ l
ଜିଲ୍ଲାରେ 19748 ଜଣ ନୂତନ ଭୋଟର ତାଲିକାରେ ସାମିଲ ହୋଇଥିବା ଭୋଟର ମାନେ ଆସନ୍ତା 2024 ମସିହାରେ ହେବାକୁ ଥିବା ସାଧାରଣ ନିର୍ବାଚନରେ ସେମାନେ ନିଜ ନିଜର ଭୋଟ ଦେଇପାରିବେ l ମଧୁସୂଦନ ସାହୁ ନବରଙ୍ଗପୁର
