ଟେମରି – (ଜଗ ଜୀବନ ସା) ଲଘୁଚାପଜନିତ ପ୍ରବଳ ବର୍ଷା ସହ କୁଆ ପଥର ବୃଷ୍ଟି ଯୋଗୁଁ ଗୋଲାମୁଣ୍ଡା ବ୍ଲକର ଟେମରି ,ଦଶପୁ୍ର , ଫରଙ୍ଗ , ଚିଚିଆ, ଫୁଂଡା, ଖମାର ହଳଦୀ , ବରଗୁଡ଼ା , ବୃନ୍ଦା ଵାହାଲ ତଥା ଅନ୍ୟାନ୍ୟ ଗ୍ରାମ ପଞ୍ଚାୟତ ଗୁଡ଼ିକରେ କୁଆ ପଥର ସହ ପ୍ରବଳ ବର୍ଷା ଯୋଗୁଁ ଚାଷୀ ପ୍ରଭାବିତ ହୋଇଛନ୍ତି। ଚାଷୀ ମାନଙ୍କ କିଆରୀ ବିଲ, ଜମି ତଥା ବାଡି ବଗିଚାରେ କରିଥିବା ଫସଲ ମୁଗ ,ବିରି , ହରଡ , ମଟର , ମସୁରି, ଡାଲି ଜାତୀୟ ଶସ୍ୟ ସହ ପିଆଜ, କୋବି ,ବାଇଗଣ, ଟମାଟୋ , ଶିମ୍ବ,ତଥା ଅନ୍ୟାନ୍ୟ ପନିପରିବା ଜାତୀୟ ଫସଲ , ସୂର୍ଯ୍ୟ ମୁଖୀ, ସୋରିଷ ଆଦି ତୈଲ୍ୟ ବୀଜ ଜାତୀୟ ଫସଲ ନଷ୍ଟ ହୋଇଯାଇଛି। ଟେମରି ଗ୍ରାମ ର କେଶରୀ ପଟେଲଙ୍କ ଦେଡ ଏକର ଜମିରେ କରିଥିବା ପିଆଜ ଚାଷ ନଷ୍ଟ ହୋଇଯାଇଥିବା ବେଳେ ଅନ୍ୟ ଚାଷୀଙ୍କ ଏକର ଏକର ଜମି ଫସଲଗୁଡ଼ିକ ନଷ୍ଟ ହୋଇ ଯାଇଛି। ସେହିପରି ଏହି ଗ୍ରାମର ଯଶ ପଟେଲ,କାହ୍ନୁ ପଟେଲ,ନିର୍ମଳ ପଟେଲ, ଆତ୍ମା ପଟେଲ, ବିଷ୍ଣୁ ପଟେଲ,ଭବାନୀ ପଟେଲ, ତଥା ଅନ୍ୟ ଚାଷୀଙ୍କ ଖଳାରେ ଅମଳ ହୋଇଥିବା ସିଝା ଧାନ ଶହ ଶହ କୁଇଣ୍ଟାଲ ନଷ୍ଟ ହୋଇଯାଇଛି। ଯାହାଫଳରେ ଚାଷୀ କ୍ଷତି ସହ୍ୟକରି ନ ପାରି ମୁଣ୍ଡରେ ହାତ ଦେଇ ବସିଛି। ସେହିପରି ଏହି ଅଞ୍ଚଳରେ ଅନେକ ଚାଷୀଙ୍କ ମଣ୍ଡିରେ ଦେଇଥିବା ଧାନ ଗୁଡ଼ିକ ମଧ୍ୟ ବର୍ଷା ଯୋଗୁଁ ଓଦା ହୋଇ ଯାଇଛି । ତେଣୁ ପ୍ରଶାସନ ତରଫରୁ କ୍ଷତିଗ୍ରସ୍ତ ଚାଷୀଙ୍କୁ ଯୁଦ୍ଧକାଳୀନ ଭିତ୍ତିରେ କ୍ଷତିପୂରଣ ଯୋଗାଇ ଦେବାକୁ ସାଧାରଣରେ ଦାବୀ ହୋଇଛି।
