ମଦ ଦୋକାନ ବିରୋଧରେ ଆନ୍ଦୋଳନ ଚେତାବନୀ ଦେଲା ବାଲିବୋ ଗୋ-ସେବା ସଙ୍ଗଠନ
ଢେଙ୍କାନାଳ (ମନିସ )13/2/25 // ଢ଼େଙ୍କାନାଳ ଜିଲ୍ଲା ଭୁବନ ବ୍ଲକ ଅନ୍ତର୍ଗତ ମୁର୍ଦଙ୍ଗା-କୁଣ୍ଡା ଗ୍ରାମ ଛକରେ ଏକ ସରକାରୀ ଠିପି ବନ୍ଦ ମଦ ଦୋକାନ ଥିଲା । ନାମକୁ ମାତ୍ର ଠିପି ବନ୍ଦ ମଦ ଦୋକାନ କିନ୍ତୁ ଅସଲରେ ସେଠାରେ କୋୖଣସି ଠିପି ଖୋଲା ବାର୍ ଠାରୁ କମ୍ ବ୍ୟବସ୍ଥା ନଥିଲା । ସକାଳ ଠାରୁ ବିଳମ୍ବିତ ରାତି ପର୍ଯ୍ୟନ୍ତ ଅହରହ ମଦୁଆଙ୍କ ପ୍ରାଦୁର୍ଭାବ ଦେଖିବାକୁ ମିଳୁଥିଲା । ସ୍କୁଲ, କଲେଜ ଓ ଅଙ୍ଗନବାଡି ଆଦି ଶିକ୍ଷାନୁଷ୍ଠାନ ଘେରରେ ବେଧଡକ ଉକ୍ତ ମଦ ଦୋକାନ ଚାଲିଥିଲା । ଦୈନିକ କୁଣ୍ଡା-ମୁର୍ଦଙ୍ଗା ଛକରେ ବିଶୃଙ୍ଖଳା ସୃଷ୍ଟି କାରଣରୁ ସ୍ଥାନୀୟ ବିଦ୍ୟାର୍ଥୀ ଗଭୀର ଭାବରେ ପ୍ରଭାବିତ ହେଉଥିଲେ । ଏହିଭଳି ଅନେକ ସମସ୍ୟା ଲାଗି ରହିଥିଲା, ଫଳରେ ସ୍ଥାନୀୟ ବାସିନ୍ଦା ମଦ ଦୋକାନ ବିରୋଧରେ ଆନ୍ଦୋଳନ କରିଥିଲେ । ଯାହାର ପରିଣାମ ସ୍ୱରୂପ ଉକ୍ତ ମଦ ଦୋକାନ ସେଠାରୁ ସ୍ଥାନାନ୍ତରିତ ହୋଇ ବାଲିବୋ ପଞ୍ଚାୟତର କାନଖାଇ ଗ୍ରାମରେ ଅବସ୍ଥାପିତ ହେବାକୁ ଜାନୁଆରୀ ୨୭ ତାରିଖରେ ଏକ ସରକାରୀ ବିଜ୍ଞପ୍ତି ପ୍ରକାଶ ପାଇଥିଲା । ଢ଼େଙ୍କାନାଳ ଜିଲ୍ଲା ଅବକାରୀ କାର୍ଯ୍ୟାଳୟ ପକ୍ଷରୁ ପ୍ରକାଶ ପାଇଥିବା ଚିଠି ନଂ-୩୨୭ ଅନୁଯାୟୀ ୧୦ ତାରିଖ ସୁଦ୍ଧା ଅଭିଯୋଗ ନହେଲେ ପରେ କୋୖଣସି କଥା ଶୁଣାଯିବ ନାହିଁ ବୋଲି ଉଲ୍ଲେଖ ଥିଲା । ସୂଚନା ପାଇ ପ୍ରଥମେ ସମଗ୍ର ବାଲିବୋ ପଞ୍ଚାୟତ ବାସୀ ଚଳିତ ମାସ ୧୦ ତାରିଖରେ ଜିଲ୍ଲାପାଳଙ୍କୁ ଅଭିଯୋଗ କରିଛନ୍ତିି । ଏବେ ବାଲିବୋ ଗୋ-ସେବା ସଙ୍ଗଠନ ପକ୍ଷରୁ ପୁନଃ ଏକ ଦାବିପତ୍ର ମଧ୍ୟ ଭୁବନ ବିଡ଼ିଓଙ୍କ ଜରିଆରେ ଢ଼େଙ୍କାନାଳ ଜିଲ୍ଲାପାଳଙ୍କୁ ଦିଆଯାଇଛି । ବାଲିବୋ ପଞ୍ଚାୟତରେ ମଦ ଦୋକାନ ନଖୋଲିବାକୁ ଦାବି ରହିଥିବାବେଳେ ଦାବିକୁ ଅଣଦେଖା କଲେ ଆନ୍ଦୋଳନ ତୀବ୍ର ହେବ ବୋଲି ଉଲ୍ଲେଖ ରହିଛି । ଆବଶ୍ୟକସ୍ଥଳେ ପଞ୍ଚାୟତର କଲ୍ୟାଣ ପାଇଁ ଆନ୍ଦୋଳନ ତୀବ୍ର ହେବ ବୋଲି ସଙ୍ଗଠନର ଉପଦେଷ୍ଟା ଶ୍ରୀ ରବିନ୍ ଦାସ ପ୍ରତିକ୍ରିୟା ରଖିଛନ୍ତି । ଦାବିପତ୍ର ଦେବା ସମୟରେ ସଭାପତି ଶ୍ରୀ ଅଭିଜିତ୍ ନାୟକ, ଉପସଭାପତି ଦୀପ୍ତିଶ୍ କୁମାର ସ୍ବାଇଁ, ସହ-ସମ୍ପାଦକ ଅଶୋକ କୁମାର ନାୟକ, କୋଷାଧ୍ୟକ୍ଷ ବିକ୍ରମ କେଶରୀ କାଣ୍ଡି, ଲିଟନ୍, ରାଜା, କାହ୍ନା, ଶିବା, ବାପି, କୁରୁପା ଓ ମୋନୁ ପ୍ରମୁଖ ଉପସ୍ଥିତ ଥିଲେ ।
ପ୍ରହ୍ଲାଦ ମୁଦୁଲିଙ୍କ ରିପୋର୍ଟ
