ବ୍ଲକ ପ୍ରଶାସନ ତରଫରୁ ବ୍ଯାସକବି ଫକୀରମୋହନ ସେନାପତିଙ୍କୁ ସମ୍ମାନ
ଖଇରା,୦୧/୪/୨୫ – ଆଜି ହେଉଛି ପବିତ୍ର ଉତ୍କଳ ଦିବସ । ଏହି ପବିତ୍ର ଦିବସ ଉପଲକ୍ଷେ ବାଲେଶ୍ବର ଜିଲ୍ଲା ଖଇରା ବ୍ଲକ ପରିସରରେ ଥିବା ବ୍ଯାସକବି ଫକୀରମୋହନ ସେନାପତିଙ୍କ ପ୍ରତିମୂର୍ତ୍ତିରେ ବ୍ଲକ ପ୍ରଶାସନ ତରଫରୁ ପୁଷ୍ପ ମାଲ୍ଯ ପ୍ରଦାନ କରାଯାଇ ସୁସମ୍ମାନ ଜ୍ଞାପନ କରାଯାଇଛି । ଶ୍ରୀ ସେନାପତି ୧୩ ଜାନୁଆରୀ ୧୮୪୩ ମସିହାରେ ବାଲେଶ୍ବର ସହର ସ୍ଥିତ ମଲ୍ଲିକାଶପୁର ଗାଁର ପିତା ଲକ୍ଷ୍ମଣ ଚରଣ ସେନାପତି ଓ ମାଆ ତୁଳସୀ ଦେବୀ ସେନାପତିଙ୍କ ଔରସରୁ ଜନ୍ମ ଗ୍ରହଣ କରିଥିଲେ । ତାଙ୍କର ପ୍ରକୃତ ନାମ ଥିଲା ବ୍ରଜମୋହନ । ପରେ ସେ ଫକୀରମୋହନ ସେନାପତି ନାମରେ ପରିଚିତ ହୋଇଥିଲେ । ସେ ଜଣେ ଓଡ଼ିଆ ଗାଳ୍ପିକ ଓ ଔପନ୍ୟାସିକ । ତତ୍କାଳୀନ ଇଷ୍ଟ ଇଣ୍ଡିଆ କମ୍ପାନୀ ଅଧିନରେ କାର୍ଯ୍ୟରତ ଦେୱାନ ଥିଲେ । ସେ ଥିଲେ ପ୍ରଥମ ଓଡ଼ିଆ ଆଧୁନିକ କ୍ଷୁଦ୍ରଗଳ୍ପ ” ରେବତୀ ” ର ଲେଖକ । ଉତ୍କଳ ଗୌରବ ମଧୁସୂଦନ ଦାସ, ଉତ୍କଳମଣି ପଣ୍ଡିତ ଗୋପବନ୍ଧୁ ଦାଶ, କବିବର ରାଧାନାଥ ରାୟ, ସ୍ବଭାବ କବି ଗଙ୍ଗାଧର ମେହେରଙ୍କ ସହ ଓଡ଼ିଆ ଭାଷା ଆନ୍ଦୋଳନର ପୁରୋଧା ଭାବରେ ଓଡ଼ିଆ ଭାଷାକୁ ବିଦେଶୀ ମାନଙ୍କ କବଳରୁ ବଞ୍ଚାଇବା ପାଇଁ ଲଢ଼ି ଥିଲେ । ସେ ମଧ୍ୟ ଓଡ଼ିଆ ସାହିତ୍ୟର କଥା ସମ୍ରାଟ ଭାବରେ ପରିଚିତ । ତାଙ୍କ ଜୀବନକାଳ ଭିତରେ ଅନେକ ପୁସ୍ତକ ରଚନା କରିଛନ୍ତି । ତାଙ୍କ ପାରିବାରିକ ଜୀବନ କଷ୍ଟଦାୟକ ଓ ଦୁର୍ଘଟଣା ପୂର୍ଣ୍ଣ ଥିଲେ ମଧ୍ୟ ସାହିତ୍ୟ ସାଧନା ଥିଲା ଜୀବନର ଏକମାତ୍ର ବ୍ରତ । ସେ ହେଉଛନ୍ତି ଓଡ଼ିଆ ଭାଷା ସାହିତ୍ୟର ଜନକ । ତାଙ୍କ ଦ୍ବାରା ରଚିତ ଉପନ୍ୟାସ ସୁଦୂର ପ୍ରସାରି ଏବଂ ସମସ୍ତଙ୍କ ହୃଦୟ ସ୍ପର୍ଶୀ । ଭାଷା ସାହିତ୍ୟର ଜନକ ଭାବେ ସମଗ୍ର ବାଲେଶ୍ବର ଜିଲ୍ଲାବାସୀ ଆଜି ଗର୍ବିତ । ସେହି ମହାନ ସାହିତ୍ୟ ସାଧକଙ୍କୁ ବ୍ଲକ ପ୍ରଶାସନ ତରଫରୁ ସମ୍ମାନ ପ୍ରଦାନ କରାଯାଇ ଥିବାରୁ ସତରେ ଆମେ ଆଜି ଗର୍ବିତ । ଏଥିସହିତ ବାଲେଶ୍ବର ଜିଲ୍ଲା ତଥା ସାରା ରାଜ୍ୟରେ ତାଙ୍କୁ ସମ୍ମାନ ପ୍ରଦାନ କରାଯାଇ ଥିବାରୁ ସମଗ୍ର ଓଡିଶା ଜାତି ନିଜକୁ ଧନ୍ୟବାଦ ମନେକରିବା ସହିତ ପ୍ରଶାସନକୁ ଆନ୍ତରିକ ଶୁଭେଚ୍ଛା, ଶୁଭକାମନା ଜ୍ଞାପନ ଜଣାଇଛି । ଖଇରା ବରିଷ୍ଠ ନାଗରିକ ମଞ୍ଚ ତରଫରୁ ମଧ୍ୟ ବ୍ଯାସକବି ଫକୀରମୋହନ ସେନାପତିଙ୍କୁ ସମ୍ମାନ ପ୍ରଦାନ କରାଯାଇଛି ।।
ବାଲେଶ୍ବରରୁ ନରେନ୍ଦ୍ର ପ୍ରସାଦ ବେହେରାଙ୍କ ରିପୋର୍ଟ
