ବିଦ୍ୟୁତ୍ ଟ୍ରାନ୍ସଫର୍ମର ଲଗେଇବାକୁ ଦାବି
କର୍ଲାମୁଣ୍ଡା: କଳାହାଣ୍ଡି ଜିଲ୍ଲା ପଣ୍ଡକାମାଳ କଲୋନୀ ପଡାର ବିଦ୍ୟୁତ୍ ଟ୍ରାନ୍ସଫର୍ମର ପୋଡିଯିବାରୁ ଅଞ୍ଚଳବାସୀ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି l ଏ ନେଇ ବିଦ୍ୟୁତ ଉପଭୋକ୍ତାମାନେ ଜେ.ଇ ଓ ମ.ରାମପୁର ବିଦ୍ୟୁତ ବିଭାଗକୁ ଜଣେଇଥିଲେ l କିନ୍ତୁ ଜେ.ଇ ଆଜି କାଲି କହି ଦିନ ପରେ ଦିନ ଗଡେଇ ନେଉଥିବାରୁ ଅଞ୍ଚଳବାସୀ ଅସନ୍ତୋଷ ପ୍ରକାଶ କରିଛନ୍ତି l ଉକ୍ତ ଅଞ୍ଚଳରେ ପ୍ରାୟ ୮୦ ରୁ ଉର୍ଦ୍ଧ୍ବ ବିଦ୍ୟୁତ ଭୋକ୍ତା ରହିଥିବା ବେଳେ ୧୦ କେଭି ଟ୍ରାନ୍ସଫର୍ମର କାମଚଳା ଭାବେ କାର୍ଯ୍ୟ କରୁଛି l ଫଳ ସ୍ୱରୂପ ବିଭିନ୍ନ ସମୟରେ ଅନେକ ପ୍ରକାର ସମସ୍ୟା ଦେଖାଦେଇ ଆସୁଛି l ଟ୍ରାନ୍ସଫର୍ମରଟି ପୋଡିଯିବା ଦ୍ୱାରା ଛଅ ଦିନ ହେଲା ପଣ୍ଡକାମାଳ କଲୋନୀପଡା, ସିଲେଟପଡାରେ ବସବାସ କରିଥିବା ବହୁ ପରିବାର ବର୍ଷା ଝଡ଼ିରେ ନାହିଁ ନଥିବା ହଇରାଣ ହେଉଛନ୍ତି l ବର୍ଷା ହେତୁ ସାପ, ବିଛା ଆଦି ଭୟ ଲାଗି ରହୁଥିବା ବେଳେ ଅନ୍ଧାରରେ ଜୀବନ ଯାପନ କରିବା ବେଶ୍ କଷ୍ଟକର ହୋଇ ପଡିଛି l ଏଠାରେ ସୂଚନା ଯୋଗ୍ୟ ଯେ, ୨୫ କେଭି ଟ୍ରାନ୍ସଫର୍ମର ଲଗେଇବା ନିମନ୍ତେ ଗତ ବର୍ଷ ବିଦ୍ୟୁତ ବିଭାଗର ଜେ.ଇ ପ୍ରତିଶ୍ରୁତି ଦେଇଥିଲେ, କିନ୍ତୁ ଏଯାବତ ତାହା କାର୍ଯ୍ୟକାରୀ ହୋଇ ନାହିଁ l ଏଣୁ ଯଥା ସମ୍ଭବ ସମସ୍ୟାର ସମାଧାନ କରିବାକୁ ଅଞ୍ଚଳବାସୀ ଦାବି କରିଛନ୍ତି l
କର୍ଲାମୁଣ୍ଡାରୁ ସୁଶାନ୍ତ ରଣାଙ୍କ ରିପୋର୍ଟ, ମସୀହା
