ବେଣୁଧର ସୂତର ଙ୍କ କବିତା ବସନ୍ତ ଯାଇଛି ଫେରି 

ବସନ୍ତ ଯାଇଛି ଫେରି 

  ବେଣୁଧର ସୂତର 

 

ବନାନୀ ଗୋ ତୁମ ଅଳସ ତନୁରେ

ମାଦକତା ଥିଲା ଭରି

ସାଜି ପ୍ରଣୟିନୀ ବସନ୍ତକୁ କଲ

ନିକୁଞ୍ଜ କାନନ ଚାରୀ

ମୁଖେ ଥିଲା ତୁମ ମଧୁଝରା ହସ

ପ୍ରୀତିର ଫଗୁଣ ସପନ ବିଳାସ

ଅଙ୍ଗେ ଭରୁଥିଲା ଅନଙ୍ଗ ଶୃଙ୍ଗାର

ଯଉବନ ଫୁଲ ଫୁଟି ଥିଲା ଯାର

ଦୀପ୍ତ ମାଧୁରୀ ଧରି

           ବନାନୀ ଗୋ ତୁମ……….

ନିଦାଘ ଆସିଲା ସବୁ ଲୁଟିନେଲା

ତୁଟିଗଲା ତନୁଶିରୀ

ବିରହ ଯନ୍ତ୍ରଣା ନିରବେ ସହିଲ

ସାଜି ପ୍ରୀତି ଅଭିସାରୀ

ନୀରବ ନିଥର ଆଜି ବନଲତା

କୋଇଲିର କଣ୍ଠେ ନାହିଁ ମଧୁରତା

ବେଦନା ବିଧୁର ତନୁରେ ତୁମର

ଯନ୍ତ୍ରଣା ଯେ ଅସୁମାରୀ

ସହି ତ ପାରୁନ କହି ବି ପାରୁନ

ଆଶା ଆଜି ଆଶାବରୀ

          ବନାନୀ ଗୋ ତୁମ……….

ବସନ୍ତ ଖୋଜୁଛି ବାସନ୍ତୀ ଯାମିନୀ

ମଳୟ ବହୁନି ସୁରଭି କୁ ଘେନି

ବାଜି ଉଠୁନିତ ପ୍ରୀତି ମଧୁ ବୀଣା

ବହୁନାହିଁ ପ୍ରେମେ ପ୍ରଣୟ ଝରଣା

ବସନ୍ତ ହୋଇଛି ଆଜି ବାଟବଣା

ସପନ ବତୁରା ମନ କୁଂଜବନେ

ବେଦନାର ଅନ୍ତାକ୍ଷରୀ 

          ବନାନୀ ଗୋ ତୁମ……….

କେମିତି ସହୁଛ ବିରହର ତାତି

ଦେଇଛି କଷଣ ନିଷ୍ଠୁର ନିୟତି

ଶୂନ୍ୟ ପଡିଅଛି ପ୍ରୀତି ମଧୁଶାଳା

ନୀରବ ନିଃଶବ୍ଦ କଟିର ମେଖଳା

ମଉଳିଛି ପ୍ରୀତି କୁସୁମର ମାଳା

ବିଦଗ୍ଧ ମାନସେ ବିଷମୟ ଜ୍ବାଳା

ବସନ୍ତକୁ ଝୁରି ଝୁରି

         ବନାନୀ ଗୋ ତୁମ……….. 

ନିଃସଙ୍ଗ ପ୍ରାଣର ଭରା ଅବସୋସ

ଏ ଦେହ ଦହନ ହେବ କିବା ଶେଷ

ତନୁ ତୀର୍ଥେ ଫୁଟି ପ୍ରୀତି ପାରିଜାତ

ମନ ଉପବନ ହେବ ସୁରଭିତ

ଝରା ବଉଳର ମହକେ ମହକେ

ଫୁଲ ଫଗୁଣର ସପନ କୁହୁକେ

ବସନ୍ତ ଆସିବ ଫେରି

          ବନନୀ ଗୋ ତମ ……….

 

କେଶଦୁରାପାଳ କେନ୍ଦୁଝର