ଅକ୍ଷୟ ତୃତୀୟା
ଶୁଭ୍ରାଂଶୁ ଶେଖର ପାଢୀ
ବୈଶାଖ ମାସର ଶୁକ୍ଳ ପକ୍ଷ ତିଥି
ତୃତୀୟା ଦିନଟି ଜାଣ ।
ଅନୁକୂଳ ପାଇଁ ସର୍ବ ଶୁଭ ନାମ
ଅକ୍ଷୟ ତୃତୀୟା ନାମ ।୧।
ପ୍ରଭୁ ପର୍ଶୁରାମ ଦେବୀ ଅନ୍ନପୂର୍ଣ୍ଣା
ଜନ୍ମ ଅଟେ ଏହି ଦିନ ।
ଜନ୍ମ ଲଭିଥିଲେ ଅକ୍ଷୟ କୁମାର
ବ୍ରହ୍ମ ଦେବଙ୍କ ସନ୍ତାନ ।୨।
ଚଷା ପୁଅ କରେ ମୁଠି ଅନୁକୂଳ
ମନରେ ହରଷ ଭରି ।
ବର୍ଷର ପ୍ରଥମ ବିହନକୁ ବୁଣେ
ଅନ୍ନପୂର୍ଣ୍ଣାଙ୍କୁ ସୁମରି ।୩।
ପ୍ରଭୁ ବଳରାମ ରେବତିଙ୍କ ବାହା
ହୋଇଥିଲା ଏହି ଦିନ ।
ପତିତପାବନୀ ଗଙ୍ଗା କରିଥିଲେ
ଆଜି ଧରାବତରଣ ।୪।
ରଥଯାତ୍ରା ପାଇଁ ରଥ ନିର୍ମାଣର
ଶୁଭାରମ୍ଭ ହୁଏ ଆଜି ।
କୁଳବଧୂ ଦିଏ ବାଲି ପିଣ୍ଡ ଆଜି
ପିତୃପୁରୁଷଙ୍କୁ ଭଜି ।୫।
ମହିଷାସୁର କୁ ଦେବୀ ଦୁର୍ଗା ଯୁଦ୍ଧେ
କରିଥିଲେ ପରାଜିତ ।
ଗଣେଶଙ୍କ ହସ୍ତେ ବ୍ୟାସ କରିଥିଲେ
ରଚନା ମହାଭାରତ ।୬।
ଯୁଧିଷ୍ଠିର ହସ୍ତେ ଅକ୍ଷୟ ପାତ୍ରକୁ
ଭେଟି ଦେଲେ ସୂର୍ଯ୍ୟ ଦେବ ।
ସର୍ବ ଶୁଭ କାର୍ଯ୍ୟ ହୁଏ ଏହି ଦିନ
ଦିବସଟି ଯେଣୁ ଶୁଭ ।୭।
ବୀରମହାରାଜପୁର, ସୁବର୍ଣ୍ଣପୁର
