ହାଇକୋର୍ଟର ବଡ଼ ରାହତ: ପୁଣି ନଗରପାଳ ପଦକୁ ଫେରିବେ ଶୁଭେନ୍ଦୁ ସାହୁ
▪️ରାଜ୍ୟପାଳଙ୍କ ଆଦେଶ ଖାରଜ, ଭୁବନରେ ଖୁସି
▪️ବହିଷ୍କାର ରଦ୍ଦ, ଗାଦିକୁ ଫେରିବେ ଶୁଭେନ୍ଦୁ
କାମାକ୍ଷାନଗର – ଗତ କିଛିଦିନ ପୂର୍ବରୁ ଦୁର୍ନୀତି ଅଭିଯୋଗ ଆଧାରରେ ଢ଼େଙ୍କାନାଳ ଜିଲ୍ଲା ଭୁବନ ନଗରପାଳ ଶୁଭେନ୍ଦୁ ସାହୁଙ୍କୁ ପଦରୁ ବହିଷ୍କୃତ କରାଯାଇଥିଲା | ଏହି ପଦକ୍ଷେପ ରାଜ୍ୟପାଳଙ୍କ ଆଦେଶ ଅନୁସାରେ ଗ୍ରହଣ କରାଯାଇଥିବା ବେଳେ, ଶୁଭେନ୍ଦୁ ସାହୁ ଏହାକୁ ଆଇନ ମଞ୍ଚରେ ଚ୍ୟାଲେଞ୍ଜ କରି ହାଇକୋର୍ଟଙ୍କ ଦ୍ବାରସ୍ଥ ହୋଇଥିଲେ | ଗୁରୁବାର ଦିନ ହାଇକୋର୍ଟ ଏହି ମାମଲାରେ ଶୁଣାଣି କରି ଗୁରୁତ୍ୱପୂର୍ଣ୍ଣ ରାୟ ପ୍ରକାଶ କରିଛନ୍ତି | ଆଦାଲତ ରାଜ୍ୟପାଳଙ୍କ ଆଦେଶକୁ ଖାରଜ କରିଦେଇଥିବାରୁ ଶୁଭେନ୍ଦୁ ସାହୁଙ୍କ ପୁନର୍ବାର ନଗରପାଳ ପଦକୁ ଫେରିବାର ପଥ ସୁଗମ ହୋଇଛି | ହାଇକୋର୍ଟର ଏହି ରାୟ ପରେ ଭୁବନ ଅଞ୍ଚଳରେ ଖୁସିର ଲହରୀ ଦେଖାଯାଇଛି | ତାଙ୍କ ସମର୍ଥକମାନେ ଆଦାଲତର ନିଷ୍ପତ୍ତିକୁ ସ୍ୱାଗତ କରି ଆନନ୍ଦ ପ୍ରକାଶ କରିଛନ୍ତି | ଅନ୍ୟପଟେ, ରାଜନୈତିକ ମହଳରେ ଏହି ଘଟଣାକୁ ନେଇ ଚର୍ଚ୍ଚା ଚାଲିଛି | ଆଗାମୀ ଦିନରେ ନଗରପାଳ ପଦରେ ପୁନଃ ଦାୟିତ୍ୱ ଗ୍ରହଣ ପରେ ଶୁଭେନ୍ଦୁ ସାହୁଙ୍କ କାର୍ଯ୍ୟପ୍ରଣାଳୀ କିପରି ରହିବ, ସେନେଇ ସାଧାରଣ ଲୋକଙ୍କ ମଧ୍ୟରେ ଆଗ୍ରହ ବୃଦ୍ଧି ପାଇଛି |
