ଆଜିର ଦିବସର ଅନୁଚିନ୍ତା : ଫେବୃୟାରୀ ୨୮: ବିଜ୍ଞାନର ବିଜୟ ଗାଥା ଓ ଇତିହାସର ଏକ ଅନନ୍ୟ ଦିଗ୍ ଦର୍ଶନ
ଡ଼ା. ଦେବୀ ପ୍ରସାଦ ମିଶ୍ର,
ଆଜି ଫେବୃୟାରୀ ୨୮ ତାରିଖ। କାଳଖଣ୍ଡର ପୃଷ୍ଠାରେ ଏହି ଦିନଟି କେବଳ ଏକ ତାରିଖ ନୁହେଁ, ବରଂ ଏହା ମାନବ ସଭ୍ୟତାର ବୌଦ୍ଧିକ ବିକାଶ ଓ ସଂଘର୍ଷର ଏକ ସ୍ମାରକୀ। ବିଶ୍ୱ ଇତିହାସଠାରୁ ଆରମ୍ଭ କରି ଓଡ଼ିଶାର ମାଟି ପର୍ଯ୍ୟନ୍ତ,ଏହି ଦିନଟି ଅନେକ ଗୁରୁତ୍ୱପୂର୍ଣ୍ଣ ଘଟଣାବଳୀର ସାକ୍ଷୀ ରହିଛି। ବିଶେଷକରି ଭାରତ ପାଇଁ ଏହା ଏକ ଗର୍ବର ଦିନ,କାରଣ ଆଜିର ଦିନରେ ବିଜ୍ଞାନ ଜଗତରେ ଭାରତୀୟ ପ୍ରତିଭାର ବିଜୟ ଧ୍ୱଜା ଉଡ଼ିଥିଲା।ଯେଉଁ ଜାତି ବିଜ୍ଞାନକୁ ଆଦରି ନିଏ, ସେହି ଜାତି ହିଁ ପ୍ରଗତିର ଶୀର୍ଷ ସୋପାନରେ ପହଞ୍ଚେ। ଜ୍ଞାନର ଆଲୋକ ହିଁ ଅଜ୍ଞାନତାର ଅନ୍ଧକାରକୁ ଦୂର କରିବାର ଏକମାତ୍ର ମାର୍ଗ।
ବିଶ୍ୱ ଇତିହାସରେ ଆଜି ଦିନରେ ଉଠିଥିଲା ପରିବର୍ତ୍ତନର ସ୍ୱର। ବିଶ୍ଵସ୍ତରରେ ମଧ୍ୟ ଏହି ଦିନଟି ଅନେକ ବଡ଼ ଘଟଣା ସହ ଜଡ଼ିତ।୧୯୨୨ ମସିହାରେ ଆଜିର ଦିନରେ ବ୍ରିଟେନ ଇଜିପ୍ଟକୁ ଏକ ସ୍ୱାଧୀନ ସାର୍ବଭୌମ ରାଷ୍ଟ୍ର ଭାବେ ମାନ୍ୟତା ପ୍ରଦାନ କରିଥିଲା।୧୯୫୩ ମସିହାର ଏହି ଦିନରେ ବୈଜ୍ଞାନିକ ଜେମ୍ସ ୱାଟସନ୍ ଏବଂ ଫ୍ରାନ୍ସିସ୍ କ୍ରିକ୍ ଆଜିର ଦିନରେ ଡିଏନଏର ‘ଡବଲ ହେଲିକ୍ସ’ ସଂରଚନା ସମ୍ପର୍କରେ ଘୋଷଣା କରିଥିଲେ, ଯାହା ଜୀବବିଜ୍ଞାନ କ୍ଷେତ୍ରରେ ଏକ ବିରାଟ ବିପ୍ଳବ ଆଣିଥିଲା। ୧୯୩୫ ମସିହାରେ ଆଜିର ଦିନରେ ୱାଲେସ୍ କାରୋଥର୍ସ ଆଜିର ଦିନରେ ନାଇଲନ୍ ଆବିଷ୍କାର କରିଥିଲେ,ଯାହା ପରବର୍ତ୍ତୀ ସମୟରେ ବସ୍ତ୍ର ଶିଳ୍ପରେ ବ୍ୟାପକ ପରିବର୍ତ୍ତନ ଆଣିଥିଲା।୧୯୯୪ ମସିହାରେ ଆଜିର ଦିନରେ ନାଟୋର ପ୍ରଥମ ସାମରିକ କାର୍ଯ୍ୟାନୁଷ୍ଠାନ ବୋସନିଆ ଯୁଦ୍ଧ ସମୟରେ ତା’ର ପ୍ରଥମ ଆକ୍ରମଣ କରିଥିଲା।
ଭାରତ ପାଇଁ ଫେବୃୟାରୀ ୨୮ ହେଉଛି ଜାତୀୟ ବିଜ୍ଞାନ ଦିବସ। ୧୯୨୮ ମସିହା ଆଜିର ଦିନରେ ମହାନ ଭାରତୀୟ ପଦାର୍ଥ ବିଜ୍ଞାନୀ ସାର୍ ଚନ୍ଦ୍ରଶେଖର ଭେଙ୍କଟ ରମଣ (ସି.ଭି. ରମଣ) ‘ରମଣ ପ୍ରଭାବ’ ଆବିଷ୍କାର କରିଥିଲେ। ଆଲୋକର ବିଚ୍ଛୁରଣ ସମ୍ବନ୍ଧୀୟ ଏହି ଯୁଗାନ୍ତକାରୀ ଆବିଷ୍କାର ପାଇଁ ତାଙ୍କୁ ୧୯୩୦ ମସିହାରେ ନୋବେଲ ପୁରସ୍କାର ପ୍ରଦାନ କରାଯାଇଥିଲା।ସେ ଥିଲେ ବିଜ୍ଞାନ କ୍ଷେତ୍ରରେ ନୋବେଲ ପାଇଥିବା ପ୍ରଥମ ଏସୀୟ ବ୍ୟକ୍ତି। ଆଜିର ଦିନରେ ଆମେ କେବଳ ତାଙ୍କୁ ସ୍ମରଣ କରୁନାହୁଁ,ବରଂ ଦେଶର ଯୁବପିଢ଼ିଙ୍କ ମଧ୍ୟରେ ବୈଜ୍ଞାନିକ ମନୋଭାବ ଜାଗ୍ରତ କରିବା ପାଇଁ ଶପଥ ନେଉଛୁ।ଏହା ବ୍ୟତୀତ ଭାରତୀୟ ରାଜନୈତିକ ଇତିହାସରେ ମଧ୍ୟ ଏହି ଦିନର ସ୍ୱତନ୍ତ୍ର ସ୍ଥାନ ରହିଛି।ଭାରତର ପ୍ରଥମ ରାଷ୍ଟ୍ରପତି ଡଃ ରାଜେନ୍ଦ୍ର ପ୍ରସାଦଙ୍କର ୧୯୬୩ ମସିହା ଫେବୃୟାରୀ ୨୮ରେ ପରଲୋକ ଘଟିଥିଲା। ସେହିପରି ଜବାହରଲାଲ ନେହେରୁଙ୍କ ପତ୍ନୀ ତଥା ସ୍ୱାଧୀନତା ସଂଗ୍ରାମୀ କମଳା ନେହେରୁଙ୍କର ୧୯୩୬ ମସିହା ଆଜିର ଦିନରେ ଦେହାନ୍ତ ହୋଇଥିଲା।
ଓଡ଼ିଶା ଇତିହାସରେ ଫେବୃୟାରୀ ୨୮ ତାରିଖ ଏକ ଦୁଃଖଦ ସ୍ୱାଭିମାନ,ବୀରତ୍ୱର ଗାଥା ଗୌରବମୟ ମୁହୂର୍ତ୍ତକୁ ମନେ ପକାଇଦିଏ। ସମ୍ବଲପୁରର ଅପ୍ରତିଦ୍ୱନ୍ଦ୍ୱୀ ଜନନାୟକ ତଥା ମହାନ ସ୍ୱାଧୀନତା ସଂଗ୍ରାମୀ ବୀର ସୁରେନ୍ଦ୍ର ସାଏ ୧୮୮୪ ମସିହା ଫେବୃୟାରୀ ୨୮ ତାରିଖରେ ଆସିରଗଡ଼ ଜେଲରେ ପ୍ରାଣତ୍ୟାଗ କରିଥିଲେ। ବ୍ରିଟିଶ ଶାସନ ବିରୁଦ୍ଧରେ ସେ ଯେଉଁ ଦୀର୍ଘକାଳୀନ ସଂଗ୍ରାମ ଜାରି ରଖିଥିଲେ,ତାହା ଭାରତୀୟ ମୁକ୍ତି ସଂଗ୍ରାମର ଇତିହାସରେ ଅତୁଳନୀୟ।ଓଡ଼ିଶାର ମାଟି ଓ ମଣିଷ ପାଇଁ ତାଙ୍କର ତ୍ୟାଗ ଚିରକାଳ ପ୍ରେରଣାଦାୟୀ ହୋଇ ରହିବ।
ଫେବୃୟାରୀ ୨୮ ତାରିଖ ଆମକୁ ଶିକ୍ଷା ଦିଏ ଯେ,ଜ୍ଞାନ ଏବଂ ସଂଘର୍ଷ ହିଁ ସଫଳତାର ମୂଳମନ୍ତ୍ର।ସାର୍ ସି.ଭି. ରମଣଙ୍କ ବିଜ୍ଞାନ ସାଧନା ହେଉ କିମ୍ବା ବୀର ସୁରେନ୍ଦ୍ର ସାଏଙ୍କ ଦେଶପ୍ରେମ—ଏହି ସବୁ ଘଟଣା ଆମକୁ ଆଗକୁ ବଢ଼ିବା ପାଇଁ ଉତ୍ସାହ ପ୍ରଦାନ କରେ। ବିଜ୍ଞାନର ଜୟଗାନ ଓ ବୀରଙ୍କ ସମ୍ମାନ ହିଁ ଆଜିର ଦିବସର ପ୍ରକୃତ ତାତ୍ପର୍ଯ୍ୟ।
ଡ଼ା. ଦେବୀ ପ୍ରସାଦ ମିଶ୍ର,
ୟୁନେସ୍କୋର ଆଜୀବନ ସଦସ୍ୟ,ଉତ୍କଳ ଫେଡେରେସନ୍ ଅଫ୍ ୟୁନାଇଟେଡ୍ ନେସନସ୍ ଆସୋସିଏସନ୍ (ଉଫୁନା)ର ମିଡ଼ିଆ ପ୍ରଭାରୀ
ଦୂରଭାଷ : ୯୪୩୭୧୦୬୫୬୯ ; ୭୦୦୮୯୫୯୯୪୫
ଇ-ମେଲ୍ : debisirscience@gmail.com
debiprasadmishra085@gmail.com
