ଆଜିର ଦିବସର ଅନୁଚିନ୍ତା:ଅକ୍ଟୋବର ୧୪ ତାରିଖ:ଇତିହାସର ପୃଷ୍ଠାରେ ଏକ ବିଶେଷ ଦୃଷ୍ଟିପାତ
(ବ୍ରିଟିଶ୍ ଫୌଜ ମରାଠାମାନଙ୍କୁ ପରାସ୍ତ କରି ବାରବାଟୀ ଦୁର୍ଗ ଅଧିକାର,ବ୍ୟାଟେଲ୍ ଅଫ୍ ହେଷ୍ଟିଙ୍ଗ୍ସ,,ବାରବାଟୀ ଦୁର୍ଗର ପତନ,ଆମ୍ବେଦକରଙ୍କ ଚେତନା ଓ ଅମର୍ତ୍ତ୍ୟ ସେନ୍ ଙ୍କ ସଫଳତା ସ୍ମରଣ ଓ ବିଶ୍ୱ ମାନକ ଦିବସ)
ଡା.ଦେବୀ ପ୍ରସାଦ ମିଶ୍ର,
ମହାକାଳର ଅଖଣ୍ଡ ସ୍ରୋତରେ ପ୍ରତିଟି ଦିନ ନିଜ ସହିତ କିଛି ସ୍ମୃତି,କିଛି ସଫଳତା ଓ କିଛି ଗୌରବମୟ ଇତିହାସକୁ ସାଉଁଟି ରଖିଥାଏ।ଆଜି ଅକ୍ଟୋବର ୧୪ ତାରିଖ,ସେହିଭଳି ଏକ ଚେତନାର ଦିବସ,ଯାହା ବିଶ୍ୱ,ଭାରତ ଏବଂ ଆମ ପ୍ରିୟ ଓଡ଼ିଶାର ଇତିହାସରେ ଅନେକ ଗୁରୁତ୍ୱପୂର୍ଣ୍ଣ ମାଇଲଖୁଣ୍ଟ ସ୍ଥାପନ କରିଛି।ଏହି ଦିନଟି ଆମକୁ ଆମର ଅତୀତକୁ ଚିହ୍ନିବା ସହ ଭବିଷ୍ୟତ ଗଠନ ପାଇଁ ନୂତନ ଦିଗଦର୍ଶନ ଦେଇଥାଏ।
ବିଶ୍ୱ ଇତିହାସ କ୍ଷେତ୍ରରେ ଆନ୍ତର୍ଜାତୀୟ ସ୍ତରରେ ଆଜିର ଦିନକୁ ‘ବିଶ୍ୱ ମାନକ ଦିବସ’ ଭାବେ ପାଳନ କରାଯାଏ,ଯାହା ବିଶ୍ୱ ବାଣିଜ୍ୟ,ବିଜ୍ଞାନ ଓ ପ୍ରଯୁକ୍ତିବିଦ୍ୟାରେ ମାନକ ବା ସନ୍ତୁଳନ ରକ୍ଷା କରିବାର ଗୁରୁତ୍ୱକୁ ଦର୍ଶାଇଥାଏ।ଇତିହାସର ଗତିପଥ ବଦଳାଇଥିବା ଦଶଗୋଟି କାରଣ ମଧ୍ୟରୁ ୧୦୬୬ ମସିହାର ‘ବ୍ୟାଟେଲ୍ ଅଫ୍ ହେଷ୍ଟିଙ୍ଗ୍ସ’ ଆଜିର ଦିନରେ ହିଁ ଆରମ୍ଭ ହୋଇଥିଲା,ଯାହା ବ୍ରିଟେନର ଭାଗ୍ୟ ନିର୍ଦ୍ଧାରଣ କରିଥିଲା।ବିଜ୍ଞାନ କ୍ଷେତ୍ରରେ ଆଜିର ଦିନରେ ଆମେରିକୀୟ ପାଇଲଟ୍ ଚକ୍ ୟେଗର ପ୍ରଥମ ଥର ପାଇଁ ଶବ୍ଦର ଗତିଠାରୁ ଅଧିକ ବେଗରେ ବିମାନ ଚଳାଇ ବିଜ୍ଞାନ ଇତିହାସରେ ଏକ ନୂଆ ଅଧ୍ୟାୟ ସୃଷ୍ଟି କରିଥିଲେ।ଆଜିର ଏହି ଶୁଭ ଅବସରରେ ମୁଗଲ ସମ୍ରାଟ ବାହାଦୁର ଶାହା (ପ୍ରଥମ)ଏବଂ ଆମେରିକାର ପୂର୍ବତନ ରାଷ୍ଟ୍ରପତି ଡ୍ୱାଇଟ୍ ଡି.ଆଇଜେନହାୱାରଙ୍କ ଭଳି ବିଶିଷ୍ଟ ବ୍ୟକ୍ତିତ୍ୱଙ୍କୁ ସ୍ମରଣ କରିବା ସହ ସମସ୍ତ ପୁଣ୍ୟାତ୍ମାଙ୍କ ଉଦ୍ଦେଶ୍ୟରେ ମୋର ବିନମ୍ର ଶ୍ରଦ୍ଧାଞ୍ଜଳି ଅର୍ପଣ କରୁଛି।
ଭାରତ କ୍ଷେତ୍ରରେ ଜାତୀୟ ପ୍ରେକ୍ଷାପଟ୍ଟରେ ଚେତନାର ଦିନ ସମ୍ପର୍କରେ ଅନୁଶୀଳନ କଲେ ଜଣାପଡ଼େ ଯେ ଭାରତୀୟ ସାମାଜିକ ଓ ରାଜନୈତିକ କ୍ଷେତ୍ରରେ ମଧ୍ୟ ଅକ୍ଟୋବର ୧୪ ଏକ ଯୁଗାନ୍ତକାରୀ ଦିବସ।୧୯୫୬ ମସିହା ଆଜିର ଦିନରେ ସମ୍ବିଧାନ ପ୍ରଣେତା ଡା.ଭୀମରାଓ ଆମ୍ବେଦକର ତାଙ୍କର ଲକ୍ଷାଧିକ ଅନୁଗାମୀଙ୍କ ସହ ନାଗପୁରଠାରେ ବୌଦ୍ଧଧର୍ମ ଗ୍ରହଣ କରିଥିଲେ।ଏହି ଐତିହାସିକ ଘଟଣା ସାମାଜିକ ସମାନତା ଓ ମାନବିକ ଅଧିକାର ଆନ୍ଦୋଳନକୁ ଏକ ନୂଆ ରୂପ ଦେଇଥିଲା। ସେହିପରି,ଆଜି ହେଉଛି ଭାରତର ମହାନ ସ୍ୱାଧୀନତା ସଂଗ୍ରାମୀ ତଥା ଗଦର ପାର୍ଟିର ପ୍ରତିଷ୍ଠାତା ୧୮୮୪ ମସିହାରେ ଜନ୍ମିତ ଲାଲା ହରଦୟାଲଙ୍କ ଜନ୍ମଦିନ।ଦେଶ ମାତୃକାର ମୁକ୍ତି ପାଇଁ ତାଙ୍କର ବୈପ୍ଳବିକ ଚିନ୍ତାଧାରା ଆଜିର ଯୁବପିଢ଼ି ପାଇଁ ଅନୁକରଣୀୟ।ଭାରତର ପ୍ରଥମ ମହିଳା ଶାସିକା ସୁଲତାନା ରାଜିଆଙ୍କ ନିଧନ ମଧ୍ୟ ୧୨୪୦ ମସିହା ଆଜିର ଦିନରେ ହୋଇଥିଲା,ଯାହା ନାରୀ ଶକ୍ତିର ବୀରତ୍ୱର କାହାଣୀ ମନେ ପକାଇଦିଏ।ଏହାବ୍ୟତୀତ, ଆଧୁନିକ ଅର୍ଥଶାସ୍ତ୍ରରେ ଭାରତର ଗୌରବ ବଢ଼ାଇଥିବା ଅର୍ଥନୀତିଜ୍ଞ ଅମର୍ତ୍ତ୍ୟ ସେନ୍ ୧୯୯୮ ମସିହା ଅକ୍ଟୋବର ୧୪ ତାରିଖରେ ନୋବେଲ ପୁରସ୍କାର ପାଇଁ ମନୋନୀତ ହୋଇ ଦେଶକୁ ବିଶ୍ୱ ଦରବାରରେ ଗୌରବାନ୍ୱିତ କରିଥିଲେ।
ଓଡ଼ିଶା କ୍ଷେତ୍ରରେ ଓଡ଼ିଶାର ସ୍ୱାଭିମାନ ଓ ବୀରତ୍ୱର ପ୍ରତୀକ କଟକର ଐତିହାସିକ ବାରବାଟୀ ଦୁର୍ଗ ସହ ଆଜିର ଦିନଟି ସଂପୂର୍ଣ୍ଣ ରୂପେ ଜଡ଼ିତ।୧୮୦୩ ମସିହା ଆଜିର ଦିନରେ ବ୍ରିଟିଶ୍ ଫୌଜ ମରାଠାମାନଙ୍କୁ ପରାସ୍ତ କରି ବାରବାଟୀ ଦୁର୍ଗ ଅଧିକାର କରିଥିଲେ।ଏହି ଘଟଣା ଓଡ଼ିଶା ମାଟିରେ ସ୍ୱାଧୀନତାର ସୂର୍ଯ୍ୟ ଅସ୍ତ ହେବାର ଏବଂ ଇଂରେଜ ଶାସନର କରାଳଛାୟା ମାଡ଼ିଯିବାର ଏକ ଅତ୍ୟନ୍ତ ସମ୍ବେଦନଶୀଳ ମୁହୂର୍ତ୍ତ ଥିଲା।ଏହି ସ୍ମୃତି ଆମକୁ ମାତୃଭୂମିର ସୁରକ୍ଷା ଓ ଆତ୍ମସମ୍ମାନ ରକ୍ଷା ପାଇଁ ସଦା ସର୍ବଦା ଜାଗ୍ରତ ରହିବାକୁ ପ୍ରେରଣା ଦିଏ।
ଆଜିର ଦିବସର ଅନୁଚିନ୍ତା ସମ୍ପର୍କରେ ଅନୁଶୀଳନ କଲେ ଜଣାପଡ଼େ ଯେ ଇତିହାସ କେବଳ କିଛି ଘଟଣା ବା ତାରିଖର ସମାହାର ନୁହେଁ,ବରଂ ଏହା ଆମ ଜୀବନର ଏକ ଦର୍ପଣ।ବାରବାଟୀ ଦୁର୍ଗର ପତନ ଆମକୁ ସତର୍କ କରାଉଥିବା ବେଳେ ଆମ୍ବେଦକରଙ୍କ ଚେତନା ଓ ଅମର୍ତ୍ତ୍ୟ ସେନ୍ ଙ୍କ ସଫଳତା ଆମକୁ ଆଗକୁ ବଢ଼ିବାର ପ୍ରେରଣା ଦିଏ। ତେବେ ଆସନ୍ତୁ,ଆମେ ସମସ୍ତେ ଆଜିର ଦିନରେ ଅତୀତର ଭୁଲ୍ ରୁ ଶିକ୍ଷାଲାଭ କରି ଏକ ସମୃଦ୍ଧ, ଜ୍ଞାନଭିତ୍ତିକ ଓ ସମାନତାପୂର୍ଣ୍ଣ ବିଶ୍ୱ ସମାଜ ଗଠନ ପାଇଁ ସଂକଳ୍ପବଦ୍ଧ ହେବା।
ଡା.ଦେବୀ ପ୍ରସାଦ ମିଶ୍ର,
