ପୁରାତନ “କୁର୍ଲା ବନ୍ଧ” (ଦରଳି ବନ୍ଧ)ରେ ଶ୍ମଶାନ ନିର୍ମାଣକୁ ବିରୋଧ : ପ୍ରଶାସନର ନୀରବତାକୁ ନେଇ କେବିଡି ଓ ଡଙ୍ଗରୀପଡା ଗ୍ରାମବାସୀଙ୍କ ଅସନ୍ତୋଷ
ଧର୍ମଗଡ: କଳାହାଣ୍ଡି ଜିଲ୍ଲା ଧର୍ମଗଡ଼ ଅଞ୍ଚଳର କେବିଡ଼ି ଗ୍ରାମର ପୁରାତନ ପୋଖରୀ “କୁର୍ଲା ବନ୍ଧ” କୁ ନେଇ ଏବେ ଗ୍ରାମବାସୀଙ୍କ ମଧ୍ୟରେ ଗଭୀର ଅସନ୍ତୋଷ ଦେଖାଦେଇଛି। ପୁରାତନ କାଳରୁ ଏହି ପୋଖରୀ ଗ୍ରାମବାସୀଙ୍କ ଦୈନନ୍ଦିନ କାର୍ଯ୍ୟ, ପାଣି ବ୍ୟବହାର ଓ ସାମାଜିକ ଜୀବନର ଏକ ଅଂଶ ହୋଇ ଆସିଛି। ବିଶେଷକରି ଡଙ୍ଗରୀପଡା ଓ ଆଖପାଖ ଅଞ୍ଚଳର ଲୋକମାନଙ୍କର ଏହି ପୋଖରୀ ସହ ଦୀର୍ଘଦିନର ଆଧ୍ୟାତ୍ମିକ ଓ ସାଂସ୍କୃତିକ ସମ୍ପର୍କ ରହିଛି।
ସମ୍ପ୍ରତି କିଛି ଜଣ ମୁଷ୍ଟିମେୟ ଓ ରାଜନୈତିକ ଦ୍ବାରା ପରିଚାଳିତ ଲୋକ ଏହି ପୋଖରୀ ନିକଟରେ ଏକ ଶ୍ମଶାନ ନିର୍ମାଣ ପାଇଁ ପ୍ରୟାସ କରୁଥିବାରୁ ଗ୍ରାମବାସୀ ତୀବ୍ର ବିରୋଧ ପ୍ରକାଶ କରିଛନ୍ତି। ଗ୍ରାମବାସୀଙ୍କ କହିବା ଅନୁସାରେ, ଶ୍ମଶାନ ନିର୍ମାଣ ହେଲେ ପୋଖରୀର ପରିବେଶ ଓ ପରିଚ୍ଛନ୍ନତା ନଷ୍ଟ ହେବା ସହ ଗ୍ରାମର ସାଧାରଣ ଲୋକଙ୍କ ଦୈନନ୍ଦିନ କାର୍ଯ୍ୟକଳାପ ଗୁରୁତର ଭାବେ ପ୍ରଭାବିତ ହେବ। ଏହାସହ ପୋଖରୀର ଚାରିପାଖ ୧୦୦ ମିଟର ମଧ୍ୟରେ ସାଧାରଣ ଲୋକଙ୍କ ବସୋବାସ ଥିବାରୁ ଏଠାରେ ଶ୍ମଶାନ ନିର୍ମାଣ କରାଯିବା ସ୍ୱାସ୍ଥ୍ୟ, ପରିବେଶ ଓ ସାମାଜିକ ଦୃଷ୍ଟିକୋଣରୁ ଉଚିତ ନୁହେଁ ବୋଲି ଗ୍ରାମବାସୀ ମତ ପ୍ରକାଶ କରିଛନ୍ତି।
ଏହାକୁ ନେଇ ଗ୍ରାମବାସୀମାନେ ଉପଜିଲ୍ଲାପାଳ ଧର୍ମଗଡ଼, ଏନ୍ଏସି ଇଓ ଧର୍ମଗଡ଼, ତହସିଲଦାର ଧର୍ମଗଡ଼, ଏନ୍ଏସି ଅଧ୍ୟକ୍ଷ ଓ ମାନ୍ୟବର ବିଧାୟକ, ଧର୍ମଗଡ଼ଙ୍କ ନିକଟରେ ଲିଖିତ ଅଭିଯୋଗ ପତ୍ର ଦାଖଲ କରିଥିଲେ। କିନ୍ତୁ ଦୁଃଖର ବିଷୟ, ଏପର୍ଯ୍ୟନ୍ତ ପ୍ରଶାସନ କିମ୍ବା ମାନ୍ୟବର ଧର୍ମଗଡ ବିଧାୟକ ଙ୍କ ପକ୍ଷରୁ କୌଣସି ପଦକ୍ଷେପ ନିଆଯାଇନଥିବାରୁ ଗ୍ରାମବାସୀଙ୍କ ମଧ୍ୟରେ ଅସନ୍ତୋଷ ଓ କ୍ଷୋଭ ବୃଦ୍ଧି ପାଇଛି।
ଗ୍ରାମବାସୀମାନେ କହିଛନ୍ତି ଯେ, ଏହି ପବିତ୍ର ଓ ଐତିହାସିକ ସ୍ଥାନରେ ଶ୍ମଶାନ ନିର୍ମାଣ ପରିବର୍ତ୍ତେ ଏକ “ପ୍ରହରୀ ମଣ୍ଡପ” ନିର୍ମାଣ କରାଯାଇ ସେଠାରେ ଆଧ୍ୟାତ୍ମିକ, ସାମାଜିକ ଓ ସାଂସ୍କୃତିକ କାର୍ଯ୍ୟକ୍ରମ କରାଯାଉ।
ଏହି ଦାବିକୁ ନେଇ ଆଜି ଗ୍ରାମବାସୀମାନେ ସମୁହିକ ଭାବେ ସେଠାରେ “ଶୁଭ ଖମ୍ବ” ସ୍ଥାପନ କରିଥିଲେ। ଏହି କାର୍ଯ୍ୟକ୍ରମରେ ଗ୍ରାମର ଶ୍ରୀଯୁକ୍ତ ଦେବରାଜ ନାଏକ,ଶ୍ରୀ ଜୟସଙ୍କର ନାଏକ, ସଂଜୟ ନାଏକ,ସରାଧାକର ନାଏକ , ହୃଷୀକେଶ ନାଏକ, ଶ୍ରୀମତୀ ସନ୍ତୋଷୀନି ନାଏକ , ଶ୍ରୀମତୀ ମମତା ବାଗ , ନରେନ୍ଦ୍ର ନାଏକ, ଡାକେ ଲହଜଲ ଓ ମନୋଜ କୁମାର ନାଏକ ଙ୍କ ସହ ବହୁ ବୟୋଜ୍ୟେଷ୍ଠ ଓ ଯୁବକ ଉପସ୍ଥିତ ଥାଇ କୁର୍ଲା ବନ୍ଧର ସୁରକ୍ଷା ଓ ଗ୍ରାମର ଐତିହ୍ୟ ରକ୍ଷା ପାଇଁ ଏକତାର ସନ୍ଦେଶ ଦେଇଥିଲେ।
ଏବେ ସମସ୍ତଙ୍କ ଦୃଷ୍ଟି ପ୍ରଶାସନର ପଦକ୍ଷେପ ଉପରେ ରହିଛି। ଗ୍ରାମବାସୀ ଶୀଘ୍ର ଏହି ସମସ୍ୟାର ସମାଧାନ ଓ ପୁରାତନ କୁର୍ଲା ବନ୍ଧର ସୁରକ୍ଷା ପାଇଁ ଦୃଢ଼ ପଦକ୍ଷେପ ନେବାକୁ ଦାବି କରିଛନ୍ତି।
ବିଦ୍ୟାଧର ସାହୁଙ୍କ ରିପୋର୍ଟ….
