ଆଜିର ଦିବସର ଅନୁଚିନ୍ତା: ଜୁନ୍ ୬ ତାରିଖ :ସଂଗ୍ରାମ,ଜ୍ଞାନର ସାଧନା ଓ ନୂତନ ଉଦ୍ଭାବନର ଦିବସ
ଡ଼ା.ଦେବୀ ପ୍ରସାଦ ମିଶ୍ର,
ସମୟର ପ୍ରବାହ ନିରନ୍ତର।ପ୍ରତିଦିନ ସୂର୍ଯ୍ୟୋଦୟ ସହ ଇତିହାସର ପୃଷ୍ଠାରେ ଯୋଡ଼ିହୁଏ ଏକ ନୂତନ ଅଧ୍ୟାୟ।ଆଜି ଜୁନ୍ ୬ ତାରିଖ।ବିଶ୍ବ,ଭାରତ ତଥା ଆମ ଓଡ଼ିଶାର ଗୌରବମୟ ଇତିହାସ,ସଂସ୍କୃତି ଓ ଜ୍ଞାନ-ବିଜ୍ଞାନର ପୃଷ୍ଠଭୂମିରେ ଏହି ଦିବସଟି ଅତ୍ୟନ୍ତ ସ୍ମରଣୀୟ।ତେବେ ଆସନ୍ତୁ,ଆଜିର ଦିନର ପ୍ରମୁଖ ଘଟଣାବଳୀକୁ ନେଇ କିଛି ଆଲୋଚନା କରିବା।
ବିଶ୍ୱ କ୍ଷେତ୍ରରେ ଆନ୍ତର୍ଜାତୀୟ ଦିବସ ଓ ଜ୍ଞାନ-ବିଜ୍ଞାନର ମାଇଲଖୁଣ୍ଟଗୁଡ଼ିକୁ ଅନୁଶୀଳନ କଲେ ଜଣାଯାଏ ଯେ ବିଶ୍ବ ସ୍ତରରେ ଆଜି ‘ଜାତିସଂଘ ରୁଷୀୟ ଭାଷା ଦିବସ’ ଭାବେ ପାଳିତ ହୁଏ,ଯାହା ବିଶ୍ବ ସାହିତ୍ୟର ମହାନ କବି ଆଲେକଜାଣ୍ଡାର ପୁସ୍କିନଙ୍କ ଜନ୍ମଦିନ ସହ ଜଡ଼ିତ।ଏହା ବ୍ୟତୀତ ଦ୍ବିତୀୟ ବିଶ୍ବଯୁଦ୍ଧ ସମୟରେ ୧୯୪୪ ମସିହା ଜୁନ୍ ୬କୁ ‘ଡି-ଡେ’ କୁହାଯାଏ,ଯେଉଁଦିନ ମିତ୍ରଶକ୍ତିର ସେନା ଫ୍ରାନ୍ସର ନର୍ମାଣ୍ଡି ଉପକୂଳରେ ଐତିହାସିକ ଆକ୍ରମଣ କରି ନାଜି ଶାସନର ପତନର ସୂତ୍ରପାତ କରିଥିଲେ।ଜ୍ଞାନ ଓ ବିଜ୍ଞାନର ବିକାଶ କ୍ରମରେ ଆଜିର ଦିନର ବିଶେଷ ମହତ୍ତ୍ବ ରହିଛି।୧୮୮୨ ମସିହାରେ ହେନେରୀ ଡବ୍ଲୁ. ସିଲି ଆଜିର ଦିନରେ ପ୍ରଥମ ଇଲେକ୍ଟ୍ରିକ୍ ଆଇରନ୍ ର ପ୍ୟାଟେଣ୍ଟ ହାସଲ କରିଥିଲେ।୧୯୩୦ ମସିହାରେ ଆଜିର ଦିନରେ ବିଶ୍ବରେ ପ୍ରଥମ ଥର ପାଇଁ ଫ୍ରୋଜନ ଫୁଡ୍ ବା ସଂରକ୍ଷିତ ଖାଦ୍ୟ ବ୍ୟବସାୟିକ ଭାବେ ବିକ୍ରି ଆରମ୍ଭ ହୋଇଥିଲା।ମନୋରଞ୍ଜନ ଓ ଗଣିତ-କମ୍ପ୍ୟୁଟର ବିଜ୍ଞାନର ଅପୂର୍ବ ସମନ୍ବୟରେ ତିଆରି ବିଶ୍ବପ୍ରସିଦ୍ଧ ଭିଡିଓ ଗେମ୍ ‘ଟେଟ୍ରିସ୍’ ୧୯୮୪ ମସିହା ଜୁନ୍ ୬ରେ ଋଷିଆରେ ପ୍ରଥମ କରି ମୁକ୍ତିଲାଭ କରିଥିଲା।
ଭାରତ କ୍ଷେତ୍ରରେ ଜାତୀୟ ପ୍ରେକ୍ଷାପଟରେ ଅନୁଶୀଳନ କଲେ ଜଣାପଡ଼େ ଯେ ଏହି ଦିବସ ବୀରତ୍ବ ଓ କଳାର ଏକ ଅପୂର୍ବ ସମନ୍ବୟ।ଭାରତ ଇତିହାସରେ ୧୬୭୪ ମସିହା ଜୁନ୍ ୬ ତାରିଖ ଏକ ସ୍ବର୍ଣ୍ଣିମ ଦିବସ।ଆଜିର ଦିନରେ ମରାଠା ସାମ୍ରାଜ୍ୟର ପ୍ରତିଷ୍ଠାତା ଛତ୍ରପତି ଶିବାଜୀ ମହାରାଜଙ୍କ ରାୟଗଡ଼ ଦୁର୍ଗରେ ରାଜ୍ୟାଭିଷେକ ହୋଇଥିଲା।ସେ ‘ଛତ୍ରପତି’ ଉପାଧି ଧାରଣ କରି ଏକ ସ୍ବାଧୀନ ହିନ୍ଦୁ ସାମ୍ରାଜ୍ୟର ମୂଳଦୁଆ ପକାଇଥିଲେ।ସେହିପରି ଶିଖ୍ ଇତିହାସରେ ଷଷ୍ଠ ଶିଖ୍ ଗୁରୁ ହରଗୋବିନ୍ଦ ସିଂହଙ୍କ ଜନ୍ମ ୧୫୯ ୬ ମସିହାର ଏହି ଦିନରେ ହୋଇଥିଲା,ଯିଏ ଶିଖ୍ ସମୁଦାୟକୁ ସାମରିକ ରୂପ ଦେଇଥିଲେ।ରାଜନୀତି ଓ ଚଳଚ୍ଚିତ୍ର ଜଗତର ଜଣାଶୁଣା ବ୍ୟକ୍ତିତ୍ବ,ଅଭିନେତା ତଥା ସମାଜସେବୀ ସୁନୀଲ ଦତ୍ତଙ୍କ ଜନ୍ମ ମଧ୍ୟ ୧୯୨୯ ମସିହାର ଆଜିର ଦିନରେ ହୋଇଥିଲା । ବିଜ୍ଞାନ ଓ ଭାଷା କ୍ଷେତ୍ରରେ ୨୦୦୪ ମସିହାରେ ଆଜିର ଦିନରେ ଭାରତ ସରକାର ତାମିଲ ଭାଷାକୁ ପ୍ରଥମ ‘ଶାସ୍ତ୍ରୀୟ ଭାଷା’ର ମାନ୍ୟତା ପ୍ରଦାନ କରିବାକୁ ଘୋଷଣା କରିଥିଲେ।ମାତ୍ର,୧୯୮୧ ମସିହାର ବିହାର ରେଳ ଦୁର୍ଘଟଣା ଓ ତା ପରେ ଅମୃତସର ଗୋଲ୍ଡେନ ଟେମ୍ପଲର ‘ଅପରେସନ ବ୍ଲୁ ଷ୍ଟାର’ର ଅନ୍ତିମ ପର୍ଯ୍ୟାୟ ମଧ୍ୟ ଆଜିର ଦିନକୁ କାରୁଣ୍ୟଭରା କରିଦିଏ।
ଓଡ଼ିଶା କ୍ଷେତ୍ରରେ ଜ୍ଞାନର ଆଲୋକ ଓ ସ୍ବାର୍ଥତ୍ୟାଗ ସମ୍ପର୍କରେ ଅନୁଶୀଳନ କଲେ ଜଣାପଡ଼େ ଯେ ଓଡ଼ିଶାର ପ୍ରଖ୍ୟାତ ସାରସ୍ବତ ସାଧକ,ସଂଗ୍ରାମୀ ତଥା ବିଶିଷ୍ଟ ଜ୍ଞାନକୋଷ ପ୍ରଣେତା ବିନୋଦ କାନୁନଗୋଙ୍କ ଆଜି ଜନ୍ମ ଜୟନ୍ତୀ।ସେ ନିଜର ଅକ୍ଳାନ୍ତ ପରିଶ୍ରମ ବଳରେ ଓଡ଼ିଆ ଭାଷାରେ ‘ଜ୍ଞାନମଣ୍ଡଳ’ ପରି ବୃହତ ଜ୍ଞାନକୋଷ ସୃଷ୍ଟି କରି ଆମ ବୌଦ୍ଧିକ ଜଗତକୁ ସମୃଦ୍ଧ କରିଛନ୍ତି।ଏହା ସହିତ ଓଡ଼ିଶାର ସଂସ୍କୃତି ଓ ପରମ୍ପରାରେ ଜୁନ୍ ମାସର ଏହି ସମୟ ପ୍ରସିଦ୍ଧ ‘ରଜ ପର୍ବ’ର ଆଗମନୀ ବାର୍ତ୍ତା ବହନ କରିଥାଏ,ଯାହା ବସୁଧା ଓ କୃଷି ସଂସ୍କୃତିର ସମ୍ମାନର ପ୍ରତୀକ।
ଆଜିର ଦିବସର ଵିଶେଷ ବାର୍ତ୍ତା ହେଉଛି ଜୁନ୍ ୬ ତାରିଖ ଆମକୁ ଶିକ୍ଷା ଦିଏ ଯେ ସଂଗ୍ରାମ,ଜ୍ଞାନର ସାଧନା ଏବଂ ନୂତନ ଉଦ୍ଭାବନ ହିଁ ମାନବ ସଭ୍ୟତାକୁ ଆଗକୁ ନେଇଥାଏ।ତେବେ ଆସନ୍ତୁ,ଆମେ ସମସ୍ତେ ଆଜିର ଏହି ପବିତ୍ର ଦିବସରେ ମହାପୁରୁଷମାନଙ୍କ ତ୍ୟାଗକୁ ସ୍ମରଣ କରି ଦେଶ ଓ ନିଜ ଭାଷାର ଉନ୍ନତି ପାଇଁ ସଂକଳ୍ପବଦ୍ଧ ହେବା।
ଡ଼ା.ଦେବୀ ପ୍ରସାଦ ମିଶ୍ର,
✉️ debisirscience@gmail.com
/ debiprasadmishra085@gmail.com
