ମମତାର ମଧୁମତୀ
ବେଣୁଧର ସୂତାର
ଆକାଶ ନୀଳିମା ତଳେ
ବିମୁଗ୍ଧ ଧରଣୀ କୋଳେ
ସବୁଜ ମାୟାର ସେଇ
ମିଠା ମିଠା ମଧୁଭରା
ମୁଗ୍ଧ ଅନୁଭୂତି
କେତେ ହୀରା ମୋତି ଝରା
ସ୍ବପ୍ନିଳ ଆବେଗ ଭରା
ଅନୁପମ ସୃଷ୍ଟିର ଏ
କମନୀୟ ପ୍ରାଣମୟ
ଜୀବନ ଜ୍ୟାମିତି ।।
ରମଣୀୟ ରୂପସାର
ସୃଷ୍ଟି ସୁଧା ସମଷ୍ଟିର
ବିପୁଳ ପୃଥିବୀ ଅଙ୍ଗେ
ମାୟା ମୁଗ୍ଧ ବୈଭବର
ସ୍ବପ୍ନ ଚାରୁଚିତ୍ର
ପ୍ରକୃତିର ଅଭିଯାନ
ଜୀବନର ଉପାଦାନ
ପବିତ୍ର ଶାଶ୍ବତ ଶାନ୍ତ
କମନୀୟ ସୌନ୍ଦର୍ଯ୍ୟର
କମନୀୟ ଗାତ୍ର ।।
ଶୀତଳ ଅମିୟ ବାତେ
ବସନ୍ତର ପଦପାତେ
ଭିଜା ଭିଜା ନୀଳସ୍ବପ୍ନ
ମୃଦୁ ଛନ୍ଦାୟିତ ଏଇ
ମହୀ ମହୀୟସୀ
ଝରା ବଉଳର ବାସେ
କୁସୁମର ମଧୁ ହାସେ
ମାୟାବିନୀ ନିଶିଥିନୀ
ଚାରୁ ଚନ୍ଦ୍ରହାସୀ ସେଇ
ନୀଳାକ୍ଷି ରୂପସୀ ।।
ଏସୃଷ୍ଟିର ରୂପକାର
ନୈସର୍ଗୀକ ସୁଷମାର
ଭୂମି ଠାରୁ ବ୍ୟାପି ଭୂମା
ଏଧରଣୀ ମନୋରମା
ପ୍ରତ୍ୟୁଷ ପ୍ରଦୋଷ
ଯା ବକ୍ଷ ଅମୃତ ଧାରା
ମମତା ମଧୁରେ ଭରା
ଚିରନ୍ତନୀ ବସୁନ୍ଧରା
ପ୍ରକୃତି ତା କରୁଣାର
ଅମୃତ କଳସ ।।
ସରିତ ମୃଦୁ ଗାମିନୀ
ବନାନୀ ଚାରୁ ହାସିନୀ
ବିମୁଗ୍ଧ ଜ୍ୟୋତ୍ସ୍ନା ଯାମିନୀ
ସ୍ନିଗ୍ଧ ସୁଷମା ଶୋଭିନୀ
ଶୁଭ୍ର ଶାରଦୀୟ ଏଇ
ମହା ମହୋତ୍ସବ
ନୀଳ ଶ୍ୟାମଜ୍ଜଳ ଦ୍ୟୁତି
ଏ ଧରଣୀ ମଧୁମତୀ
ଚନ୍ଦ୍ରିକା ଚନ୍ଦନ ଧାରା
ମାଧୁର୍ଯ୍ୟର ମଧୁକ୍ଷରା
ମମତା ପୁରିତ ଧରା
ଦିବ୍ୟ ବଇଭବ ।।
ଶୌର୍ଯ୍ୟ ସୁଧା ଐଶ୍ବର୍ଯ୍ୟର
ଅଙ୍କିତ ଓଁକାର ସୁର
ରୂପସୀ ପ୍ରକୃତି ଶୋଭା
ରୋମାଞ୍ଚିତ ମନଲୋଭା
ପ୍ରକୃତିର ଶୋଭା ନେଇ
ଧରା ଦିଶେ ଜ୍ୟୋତିର୍ମୟୀ
ମୃଦୁଳ ମଞ୍ଜୁଳ
ଏ ସୃଷ୍ଟିର କଳ୍ପ ଧାରା
ପ୍ରାଣ ପୀୟୂଷରେ ଭରା
ମମତା ପଣତ ତଳେ
ବାନ୍ଧି ଅଛି ସ୍ନେହ ଭୋଳେ
ବିତରି ପରମ ପ୍ରୀତି
ହସୁଥାଉ ବସୁମତୀ
ଅବା ଚିରକାଳ ।।
କେଶଦୁରାପାଳ କେନ୍ଦୁଝର
