ନବରଙ୍ଗପୁରରେ ବିଭିନ୍ନ ମିଠା ଦୋକାନ, ବେକେରୀ ଓ ରେଷ୍ଟୁରାଣ୍ଟରେ ଯାଞ୍ଚ
ନବରଙ୍ଗପୁର:(୧୨ ସେପ୍ଟେମ୍ବର ୨୦୨୬)(ରବି ନାରାୟଣ ମହାନ୍ତି)ନବରଙ୍ଗପୁର ସହରରେ ଖାଦ୍ୟ ସୁରକ୍ଷା, ସ୍ୱଚ୍ଛତା ଓ ସ୍ୱାସ୍ଥ୍ୟକର ପରିବେଶ ସୁନିଶ୍ଚିତ କରିବା ଉଦ୍ଦେଶ୍ୟରେ ଜିଲ୍ଲା ଖାଦ୍ୟ ସୁରକ୍ଷା ଅଧିକାରୀଙ୍କ ନେତୃତ୍ୱରେ ଏକ ସ୍ୱତନ୍ତ୍ର ଯାଞ୍ଚ ଓ ନିୟମ ପାଳନ ଅଭିଯାନ ଅନୁଷ୍ଠିତ ହୋଇଥିଲା।
ଏହି ଅଭିଯାନରେ ନବରଙ୍ଗପୁର ପୌରପାଳିକାର କାର୍ଯ୍ୟନିର୍ବାହୀ ଅଧିକାରୀ ଡ. ଅଶୋକ କୁମାର କର୍ଣ୍ଣ ଓ ପୌରପାଳିକାର କର୍ମଚାରୀମାନଙ୍କ ସହ ଜିଲ୍ଲା ଖାଦ୍ୟ ସୁରକ୍ଷା ବିଭାଗର ଅଧିକାରୀ ଓ କର୍ମଚାରୀମାନେ ଏବଂ ପୁଲିସ କର୍ମଚାରୀ ସାମିଲ ହୋଇଥିଲେ।
ଯାଞ୍ଚ ସମୟରେ ସହରର ବିଭିନ୍ନ ମିଠା ଦୋକାନ, ବେକେରୀ ଓ ରେଷ୍ଟୁରାଣ୍ଟ ପରିଦର୍ଶନ କରାଯାଇ ଖାଦ୍ୟ ପ୍ରସ୍ତୁତି ଓ ସଂରକ୍ଷଣ ବ୍ୟବସ୍ଥା, ଦୋକାନର ପରିଚ୍ଛନ୍ନତା, ଖାଦ୍ୟର ଗୁଣବତ୍ତା, ସ୍ୱଚ୍ଛ ପରିବେଶ ଏବଂ ଖାଦ୍ୟ ସୁରକ୍ଷା ସମ୍ବନ୍ଧୀୟ ନିୟମ ପାଳନ ଆଦି ଯାଞ୍ଚ କରାଯାଇଥିଲା।ଯାଞ୍ଚ ସମୟରେ ପ୍ରାୟ ୪୦ କିଲୋଗ୍ରାମ ମିଠା ଏବଂ ପ୍ରାୟ ୩୦ କିଲୋଗ୍ରାମ ଏକକ ବ୍ୟବହାରଯୋଗ୍ୟ ପ୍ଲାଷ୍ଟିକ୍ (Single-use Plastic) ଜବତ କରାଯାଇ ନିୟମାନୁସାରେ ନଷ୍ଟ କରାଯାଇଥିଲା।ଏହାଛଡ଼ା, ଯାଞ୍ଚ ସମୟରେ ପରିଚ୍ଛନ୍ନତା ଓ ସ୍ୱାସ୍ଥ୍ୟକର ପରିବେଶରେ ଆବଶ୍ୟକ ସୁଧାର ଆଣିବା ପାଇଁ ୩ଟି ଦୋକାନକୁ ନୋଟିସ୍ ଜାରି କରାଯାଇଛି। ସମ୍ପୃକ୍ତ ଦୋକାନଗୁଡ଼ିକୁ ଆସନ୍ତା ୧୫ ଦିନ ମଧ୍ୟରେ ଆବଶ୍ୟକ ପଦକ୍ଷେପ ଗ୍ରହଣ କରି ପରିଚ୍ଛନ୍ନତା ଓ ସ୍ୱଚ୍ଛତା ବ୍ୟବସ୍ଥାରେ ସୁଧାର ଆଣିବାକୁ ନିର୍ଦ୍ଦେଶ ଦିଆଯାଇଛି।ସାଧାରଣ ଲୋକଙ୍କୁ ନିରାପଦ ଓ ଗୁଣବତ୍ତାସମ୍ପନ୍ନ ଖାଦ୍ୟ ଯୋଗାଣ ସୁନିଶ୍ଚିତ କରିବା ସହ ସହରକୁ ପରିଚ୍ଛନ୍ନ ଓ ପ୍ଲାଷ୍ଟିକ୍ମୁକ୍ତ ରଖିବା ପାଇଁ ଏଭଳି ଯାଞ୍ଚ ଓ ନିୟମ ପାଳନ ଅଭିଯାନ ଆଗାମୀ ଦିନରେ ମଧ୍ୟ ଜାରି ରହିବ ବୋଲି ସମ୍ପୃକ୍ତ ଅଧିକାରୀମାନେ ପ୍ରକାଶ କରିଛନ୍ତି।ଜନସାଧାରଣଙ୍କୁ ଖାଦ୍ୟର ଗୁଣବତ୍ତା ଓ ପରିଚ୍ଛନ୍ନତା ପ୍ରତି ସଚେତନ ରହିବା ସହ ନିରାପଦ ଖାଦ୍ୟ ବ୍ୟବହାର କରିବାକୁ ମଧ୍ୟ ଆହ୍ୱାନ କରାଯାଇଛି।
ନବରଙ୍ଗପୁର ଜିଲ୍ଲାରୁ ରବି ନାରାୟଣ ମହାନ୍ତିଙ୍କ ରିପୋର୍ଟ ମସିହା ନିଉଜ୍
