ଆସିଛି ବରଷା ରାଣୀ
ଆଦ୍ୟ ଆଷାଢ଼ ଆଗମନେ ଆଜି
ଆସିଛି ବରଷା ରାଣୀ
ଧରା ଓଠେ ହସ ଭରିଦେଇ ଅଛି
ଶୀତଳ ପରଷ ବୁଣୀ।।
ବର୍ଷାର ଝଙ୍କାର ଝଙ୍କୃତର ସ୍ବର
ଶୁଭେ ଝରା ତାନକାନେ
ଶାନ୍ତ ସଞ୍ଜିବନୀ ସିଞ୍ଚନ କରିଚି
ରୌଦ୍ର ତନୁ ମନ ପ୍ରାଣେ।।
ଚଞ୍ଚଳ ମଲ୍ଲାର ଦିଶେ ଢଳ ଢଳ
ଦିଶେ ବିଜୁଳି ରୋଷଣୀ
ଘଡ ଘଡି ଶବ୍ଦ ଧରଣୀ ବକ୍ଷରେ
ପୁଲକିତ ସର୍ବ ପ୍ରାଣୀ।।
ନିଦାଘ ଯାତନା ହୋଇଅଛି ଅନ୍ତ
ସବୁଜୀମା ହେବ ଧରା
ପ୍ରୀତି ମନ୍ଦାକିନୀ ବହିବ ସଧିରେ
ପରିପୂର୍ଣ୍ଣ ଜଳ ଧାରା।।
ମଲ୍ଲାର ଦୃଶ୍ୟରେ ବିଭୋର ନୃତ୍ୟରେ
ମୟୂରୀ ଗାଇ ରାଗିଣୀ
ମଧୁ ପ୍ରଣୟର ମଧୁ ପରଷରେ
ପ୍ରଣୟେ ପିୟୁଷ ବନୀ।।
ଭଲି ଭଲି ରଙ୍ଗ ମାଖି କେତେ ପୁଷ୍ପ
ଧରା ଗର୍ଭେ ଅଛି ଫୁଟି
ଥିରି ଥିରି ଚାଲେ ସାଧବ ବୋହୁ ଯେ
ପିନ୍ଧି ନାଲି ପାଟ ଶାଢୀ।।
ଫୁଲେ ଗୁଞ୍ଜିହୁଏ ପ୍ରଦତ୍ତ ମଧୁପ
ନିଏ ପ୍ରିତି ମଧୁ ଟାଣୀ
ଆକାଶ ଆଙ୍କିବ ଇନ୍ଦ୍ରିଧନୁ ଟିଏ
ସପ୍ତରଙ୍ଗ ର ତୋରଣୀ।।
ପଲ୍ଲବୀତ ହୁଏ କାନନ କୁଞ୍ଜନ
ପାଇ ବାରି ଧାରା ତୃଷ୍ଣା
ନିଷ୍ପ୍ରାଣ ଦେହରେ ପ୍ରାଣ ସେ ଲଭନ୍ତି
ତୃପ୍ତି କରି ମନ ବାସ୍ନା।।
ସବୁଜ ଶ୍ୟାମଳ ଦିଶେ ଶୋଭାବନ
ଭାବନା ରେ ଶିହରିତ
ଲାସ୍ୟମୟୀ ତୁମେ ବରଷା ରାଣୀ ଗୋ
କର ଧରା ହରଷିତ।।
ମାଟିର ମହକେ ଚଷା ମନ ହସେ
କ୍ଷେତରେ ବିହନ ବୁଣୀ
ଆଲିଙ୍ଗନ କରି ଅଙ୍କୁରିତ ବୀଜ
ନବ ତନୁ ପ୍ରାଣ ଘେନି।।
ମମତା ସାହୁ
ଗାଈଗାଁ,କଳାହାଣ୍ତି
