ଟ୍ରାକ୍ଟର ଓଲଟି ଯୁବକ ମୃତ, ପୋଲିସ ଗାଡି ସାଜିଲା ଶବବାହକ ଗାଡି
ଡାବୁଗାଁ, ୨୭/୧୧ (ମ.ନି.ସ.)- ନବରଙ୍ଗପୁର ଜିଲା ଡାବୁଗାଁ ଥାନା ଅଧୀନ ମାନିଗାଁ- ରାଉଲିଗୁଡା ରାସ୍ତାର ଜଙ୍ଗଲ ପାଖରେ ଟ୍ରାକ୍ଟର ଓଲଟି ଜଣେ ଯୁବକର ମୃତ୍ୟୁ ଘଟିଛି | ସୂଚନାଯୋଗ୍ୟ:- ବୁଧବାର ସନ୍ଧ୍ୟା ୫ ଘ. ସମୟରେ ଡାବୁଗାଁ ଥାନା ଅଧୀନ ମାନିଗାଁ- ରାଉଲିଗୁଡା ରାସ୍ତାରେ ରାଉଲିଗୁଡା ଗ୍ରାମ ଆଡୁ ଏକ ଟ୍ରାକ୍ଟର ହଳ କରି ମାନିଗାଁ କୁ ଆସୁଥିବା ସମୟରେ ଜଙ୍ଗଲ ନିକଟରେ ଟ୍ରାକ୍ଟର ଇଞ୍ଜିନର 
ଡାହାଣ ପାଖ ଆଗ ଚକା ହଠାତ ବାହାରି ଯିବାରୁ ଟ୍ରାକ୍ଟର ରାସ୍ତା କଡକୁ ଓଲଟି ପଡିଥିଲା | ଯାହା ଫଳରେ ଟ୍ରାକ୍ଟର ଚାଳକ ମାନିଗାଁ ଗ୍ରାମର ରୁନା ବାଗ (୧୮) ଗାଡି ତଳେ ଚାପି ହୋଇ ମୃତ୍ୟୁ ବରଣ କରିଥିଲେ | ପାଖରେ ଥିବା ସ୍ଥାନୀୟ ଲୋକେ ପହଞ୍ଚି ଗାଡିକୁ ଉଠାଇଥିଲେ | ଗାଡି ଚାଳକ ରୁନା ବାଗଙ୍କ ମୃତ ଦେହ ଉଦ୍ଧାର କରିଥିଲେ | ଖବରପାଇ ମୃତକର ପିତା ପ୍ରଭୂଦାଶ ବାଗ ଘଟଣାସ୍ଥଳରେ ପହଞ୍ଚି ପୁଅର ଶବକୁ ନିଜ ଘରକୁ ନେଇଯାଇଥିଲେ | ଖବରପାଇ ଡାବୁଗାଁ ପୋଲିସ ପହଞ୍ଛି ମୃତ ଦେହ ଉଦ୍ଧାର କରି ମହାପ୍ରୟାଣ ଗାଡି ନଥିବାରୁ ପୋଲିସ ଗାଡିରେ ଶବ କୁ ଅଣାଯାଇ ଡାବୁଗାଁ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିଲେ | ଏନେଇ ମୃତକ ଙ୍କ ପରିବାର ପକ୍ଷରୁ ଥାନାରେ କୌଣସି ଏତଲା ଦିଆଯାଇ ନାହିଁ | ଡାବୁଗାଁ ରେ ଥିବା ମହାପ୍ରୟାଣ ଗାଡି ଟି ନବରଙ୍ଗପୁର ଜିଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି | ଯାହାଦ୍ୱାରା ଡାବୁଗାଁ ଲୋକେ ବହୁ ଅସୁବିଧାର ସମ୍ମୁଖୀନ ହେଉଛନ୍ତି | ତେଣୁ ଶୀଘ୍ର ମହାପ୍ରୟାଣ ଗାଡି ଡାବୁଗାଁ କୁ ଫେରାଇ ଦିଆଯାଉ ବୋଲି ଜନସାଧାରଣରେ ଦାବି ହେଉଛି |
ଡାବୁଗାଁରୁ ପ୍ରଜ୍ଞାରଞ୍ଜନ ପରିଡାଙ୍କ ରିପୋର୍ଟ
