ଅଗ୍ରପୂଜ୍ୟ ଶ୍ରୀ ଗଣେଶ

ଗିରିଜାନନ୍ଦନ ମଙ୍ଗଳ ମୂରତି

   ଏକଦନ୍ତ ବକ୍ରତୁଣ୍ଡ

ସକଳ ଦେବଙ୍କ ଅଗ୍ରପୂଜ୍ୟ ରୂପେ

   ଶ୍ରୀଗଣେଶ ବିରାଜିତ ll 

ଗଜର ମସ୍ତକେ ଅଦଭୂତ ରୂପ

   ବପୁ ମାନବଶରୀର

ଲମ୍ବ ଉଦରରେ ଭରିରହିଅଛି

     ବିଶ୍ଵର ଜ୍ଞାନଭଣ୍ଡାର ll 

କଟିରେ ଶୋଭିତ ଗୈରିକ ବସନ

     ହସ୍ତେ ପଦ୍ମ ଶଙ୍ଖ ଗ୍ରନ୍ଥ

କୋଟି ସୂର୍ଯ୍ୟ ସମ ପ୍ରଭା ତେଜିୟାନ

     ଦେବେଶ ବିଘ୍ନନାଶନ l 

ଶିରୀ ମନ୍ଦିରର ଗୁମୁଟି ମଧ୍ୟରେ

   ବିଘ୍ନେଶ ବିରାଜମାନ

ସ୍ୱୟଂ ଜଗନ୍ନାଥ ଗଜାନନ ବେଶେ

     ହରନ୍ତି ଭକତ ମନ ll 

ପୁରାତନ ବେଦ ରାମାୟଣ ସହ

     ମହାଭାରତ ରଚନେ

ବିଘ୍ନେ ଶ୍ଵରଙ୍କର କୃପା ଲାଭ ବଳେ

    ସମ୍ଭବ ଲେଖନୀ ମୂନେ ll 

ସୃଜନଶୀଳତା ଅଜ୍ଞଜନ ହୃଦେ

     ସିଦ୍ଧି ବୁଦ୍ଧି ଜାଗରଣେ

ସାଜି ବିଦ୍ୟାଦାତା କୃତ୍ତିବାସ ସୁତ

     ବରଷି କରୁଣା ଦାନେ ll 

ଆହେ ଗଣପତି ଅଜ୍ଞାନ ତମରୁ

    କରି ଦିଅ ବାରେ ଉଦ୍ଧାର

ଦିବ୍ୟ ଚେତନାରେ ଭର ମୋ ପରାଣ

   ଗୁହାରି ଅକିଞ୍ଚନର ll 

ନର୍ମଦା ନାୟକ

ରାଉରକେଲା, ଛେଣ୍ଡ ,ସୁନ୍ଦରଗଡ଼