ରାୟଗଡ଼ ଜିଲ୍ଲା ରେ ଶୁଭାରମ୍ଭ ହେଲା ମିଶନ ଇନ୍ଦ୍ରଧନୁସ
ପ୍ରଥମ ପର୍ଯ୍ୟାୟରେ ୩୪୫୬ ଶିଶୁ ଏବଂ ୭୭୮ ଗର୍ଭବତୀ ଙ୍କୁ ଟୀକାକରଣ ଲକ୍ଷ୍ୟ
କୋଲନରା :୧୧/୦୯ ରାୟଗଡ ଜିଲ୍ଲା ସ୍ୱାସ୍ଥ୍ୟ ସମିତି ପକ୍ଷରୁ ଆଜି କୋଲନରା ବ୍ଲକର ଫାକିରୀ ଗ୍ରାମରେ ମିଶନ ଇନ୍ଦ୍ରଧନୁସ ର ଜିଲ୍ଲାସ୍ତରୀୟ ଶୁଭାରମ୍ଭ ହୋଇଯାଇଛି । କାର୍ଯ୍ୟକ୍ରମ କୁ ସୁରି ପଞ୍ଚାୟତ ସରପଞ୍ଚ ଶ୍ରୀମତୀ ଛବି ରାଣୀ ଜିଲାକାରା ଫିତା କାଟି କାର୍ଯ୍ୟକ୍ରମ କୁ ଆରମ୍ଭ କରିଥିଲେ । ଅତିରିକ୍ତ ଜିଲ୍ଲା ଜନ ସ୍ୱାସ୍ଥ୍ୟ ଅଧିକାରୀ (ପରିବାର କଲ୍ୟାଣ) ଡା. ମମତା ସାହୁ ଏହି କାର୍ଯ୍ୟକ୍ରମ କୁ ବିଧିବଦ୍ଧ ଭାବେ ଶୁଭାରମ୍ଭ କରିଥିଲେ । ଏହି ଅବସରରେ ଭାରପ୍ରାପ୍ତ ଚିକିତ୍ସା ଅଧିକାରୀ କୋଲନରା ଡାକ୍ତର ଜି ଶୈଳଯା , ଜିଲ୍ଲାସ୍ତରୀୟ ଅଧିକାରୀ ଭଗବାନ ମେହେର ଅରବିନ୍ଦ ପରିଡା,ବେଣୁଧର ନାୟକ ଏବଂ କୋଲନରା ବ୍ଲକ ଅଧିକାରୀ ଶ୍ରୀମତୀ କଳ୍ପନା ମିଶ୍ର,ବିନୋଦ ଗଉଡ଼,ନଳିନୀ ରାଜ୍ ଓ ବନିତା ଖଣ୍ଡୁଆଳ ଉପସ୍ଥିତ ଥିଲେ ।
ଆଜିଠାରୁ ଆରମ୍ଭ ହୋଇଥିବା ଉକ୍ତ କାର୍ଯ୍ୟକ୍ରମ ଆଜି ଠାରୁ ୧୬ ତାରିଖ ପର୍ଯ୍ୟନ୍ତ ଟୀକାକରଣ କରାଯିବ । ଜିଲ୍ଲାର ୧୧୫୨ ଟୀକାକରଣ କେନ୍ଦ୍ରରେ ମୋଟ ଶିଶୁ ୩୦୯୩ (୦-୨.୫ ବର୍ଷ ର ଶିଶୁ) ୩୬୩ (୨.୫ ରୁ ୫ ବର୍ଷ ରୁ କମ୍ ବୟସ ର ଶିଶୁ ) ଏବଂ ୭୭୮ ଗର୍ଭବତୀ ମହିଳା ଙ୍କୁ ଟୀକାକରଣ କରାଯିବ ବୋଲି ଡାକ୍ତର ମମତା ସାହୁ କହିଛନ୍ତି । ଯେପରି କୌଣସି ଶିଶୁ, ଗର୍ଭବତୀ ମହିଳା ଏବଂ ମାଆ ମାନେ ଟୀକାକରଣ ରୁ ବଞ୍ଚିତ ନ ରୁହନ୍ତୁ ସେ ପ୍ରତି ବିଶେଷ ଧ୍ୟାନ ଦିଆଯିବ । ସେଥି ନିମନ୍ତେ ଜିଲ୍ଲା ମଙ୍ଗଳ ଅଧିକାରୀ , ସିଡ଼ିପିଓ ଏବଂ ଅଙ୍ଗନୱାଡ଼ି କର୍ମୀମାନେ ଏହି ମିଶନ ରେ ହୋଇଥିବା ସର୍ବେକ୍ଷଣ କୁ ଭଲ ଭାବେ ତନଖି କରିବା ପାଇଁ ନିର୍ଦ୍ଦେଶ ଦେଇଛନ୍ତି । ଯାହା ଫଳରେ ଟୀକାକରଣ ରୁ କେହି ବଞ୍ଚିତ ହେବେ ନାହିଁ । ମିଶନ ଇନ୍ଦ୍ରଧନୁସ ଡ୍ରାଇଭରେ ୫ ବର୍ଷରୁ କମ ଏବଂ ପ୍ରସୂତି ମହିଳାଙ୍କୁ ଟୀକାକରଣ କରିବା ଲକ୍ଷ୍ୟ ରଖିଛି କେନ୍ଦ୍ର ସ୍ବାସ୍ଥ୍ୟ ମନ୍ତ୍ରଣାଳୟ ଓ ରାଜ୍ୟ ସ୍ବାସ୍ଥ୍ୟ ବିଭାଗ । ଯେକୌଣସି ଟିକାରୁ ବଞ୍ଚିତ ସମସ୍ତ ହିତାଧିକାରୀଙ୍କୁ ଟୀକାକରଣ କରାଯିବ । ଏନେଇ ସମସ୍ତ ଜିଲ୍ଲାରେ ଟୀକାକରଣ ହେବା ସହ U-WIN ଡିଜିଟାଲ ପୋର୍ଟାଲରେ ପଞ୍ଜୀକରଣ କରାଯିବ । ଏହି ମିଶନ ଇନ୍ଦ୍ରଧନୁସ ଡ୍ରାଇଭ୍ରେ ପୂର୍ବରୁ ୨ ବର୍ଷ ପର୍ଯ୍ୟନ୍ତ ପିଲାଙ୍କୁ ଟୀକାକରଣ କରାଯାଉଥିବା ବେଳେ ଏବେ ୫ ବର୍ଷରୁ କମ ପିଲାଙ୍କୁ ଟୀକାକରଣ ପାଇଁ ବ୍ୟବସ୍ଥା କରାଯାଇ ଥିବା ଜଣା ପଡ଼ିଛି।ଏଠାରେ ଉଲ୍ଲେଯୋଗ୍ୟ ଯେ, ପ୍ରଥମ ପର୍ଯ୍ୟାୟରେ ଆଜିଠାରୁ ଆରମ୍ଭ ହୋଇ ୧୬ ତାରିଖ ପର୍ଯ୍ୟନ୍ତ ଟୀକାକରଣ କରାଯିବ ।ଅନ୍ୟପଟେ ଦ୍ଵିତୀୟ ପର୍ଯ୍ୟାୟରେ ଅକ୍ଟୋବର ୯ ତାରିଖରୁ ୧୪ ତାରିଖ ଓ ତୃତୀୟ ପର୍ଯ୍ୟାୟରେ ନଭେମ୍ବର ମାସରେ ୬ ତାରିଖରୁ ୧୧ ତାରିଖ ପର୍ଯ୍ୟନ୍ତ ଟୀକାକରଣ କରାଯିବ । ସପ୍ତାହକୁ ୬ ଦିନ ହେବ ଏହି ଟୀକାକରଣ । ଯେକୌଣସି ଡୋଜ୍ ବାକି ଥିଲେ ମଧ୍ୟ ସମସ୍ତଙ୍କୁ ଅନ୍ତର୍ଭୁକ୍ତ କରାଯିବ । ଦେଶରେ ଟୀକାକରଣ କ୍ଷେତ୍ରରେ ଓଡ଼ିଶା ପ୍ରଥମ ରହିଛି । ୨୦୧୯-୨୦୨୧ ଜାତୀୟ ପରିବାର ସ୍ବାସ୍ଥ୍ୟ ସର୍ଭେ-୫ ରିପୋର୍ଟ ଅନୁସାରେ ୯୦.୫ ପ୍ରତିଶତ ଟୀକାକରଣ ହୋଇଛି । ଜାତୀୟ ହାର ୭୬ ଥିବା ବେଳେ ଓଡ଼ିଶା ଅଧିକ ରହିଛି ଟୀକାକରଣ ହାର । ୨୦ଟି ଜିଲ୍ଲାରେ ୯୦ ପ୍ରତିଶତ ଟୀକାକରଣ ହୋଇଥିବା ଜଣାପଡିଛି ।
ରାୟଗଡା ରୁ ଗୌରୀ ପଟ୍ଟନାୟକ ଙ୍କ ରିପୋର୍ଟ୍