ନଦୀରେ ବୁଡି ମହିଳା ନିଖୋଜ ଘଟଣା, ଆଜି ମୃତଦେହ ଉଦ୍ଧାର
ଡାବୁଗାଁ, ୬/୯ (ମ.ନି.ସ.)- ନବରଙ୍ଗପୁର ଜିଲା ଡାବୁଗାଁ ବ୍ଲକ ଅଧୀନ ଉମୁରାହାଣ୍ଡି ଗ୍ରାମ ନିକଟ ଅଙ୍ଗୀ ନଦୀରେ ବୁଧବାର ଅପରାହ୍ନରେ ଜଣେ ମହିଳା ଭାସି ଯାଇ ନିଖୋଜ ହୋଇଥିବା ଘଟଣାରେ ଶୁକ୍ରବାର ମହିଳା ଙ୍କ ମୃତଦେହ ଉଦ୍ଧାର କରାଯାଇଛି | ସୂଚନାଯୋଗ୍ୟ:- ଡାବୁଗାଁ ବ୍ଲକ ଅଧୀନ ଉମୁରାହାଣ୍ଡି ଗ୍ରାମର ହରି ଭତ୍ରା ଙ୍କ ସ୍ତ୍ରୀ ମୁକ୍ତା ଭତ୍ରା (୪୦) ସୁଭଦ୍ରା ଯୋଜନାରେ ସହାୟତା ରାଶି ପାଇବା ନିମନ୍ତେ ନିଜର ଆଧାର ପରିଚୟ ପତ୍ରରେ ମୋବାଇଲ ନମ୍ବର ଲିଙ୍କ କରିବା ପାଇଁ ବୁଧବାର ଅପରାହ୍ନ ପ୍ରାୟ ୧ ଘ. ସମୟରେ ଘରୁ ବାହାରି ଆସି ଗ୍ରାମ ପାଖ ଅଙ୍ଗୀ ନଦୀ ପାର ହେଉଥିବା ବେଳେ ଗୋଡ ଖସି ଯାଇ ଭାସି ଯାଇଥିଲେ | ପ୍ରାୟ ୨ ଘ ସମୟରେ ସେହି ଗ୍ରାମର ଜଣେ ଲୋକ ନିଜ ଜମିକୁ ଫସଲ ଦେଖିବାକୁ ଆସିଥିଲେ | ନଦୀ କଡରେ ବୁଲିବା ସନାୟରେ ନଦୀରେ ମହିଳା ଭାସୁଥିବା ଦେଖି ଗ୍ରାମବାସୀ ଓ ପରିବାର ଲୋକ ଙ୍କୁ ଖବର ଦେଇଥିଲେ | ଅପରାହ୍ନ ୪ ଘ. ସମୟରେ ଖବର ପାଇ ଡାବୁଗାଁ ଅଗ୍ନିସମ କେନ୍ଦ୍ର କର୍ମଚାରୀ ମାନେ ପହଞ୍ଚି ରାତ୍ରି ପର୍ଯ୍ୟନ୍ତ ଖୋଜାଖୋଜି କରିଥିଲେ କିନ୍ତୁ ମହିଳା ଙ୍କ ସନ୍ଧାନ ମିଳି ନଥିଲା | ଏହାପରେ ନଦୀ ପାର୍ଶ୍ଵରେ ଥିବା ବିଭିନ୍ନ ଗ୍ରାମକୁ ଖବର ଡିଯାଇଥିଲା | ଶୁକ୍ରବାର ୧୧ ଘ. ସମୟରେ ଜୁନାପାଣି ଗ୍ରାମର ଉକ୍ତ ମହିଳା ଙ୍କ ମୃତଦେହ ବରକିଗୁଡା ଗ୍ରାମ ପଟରେ ନଦୀରେ ଭାସୁଥିବା ଦେଖି ମହିଳା ଙ୍କ ଗ୍ରାମକୁ ଖବର ଦେଇଥିଲେ | ଖବରପାଇ ପରିବାର ଲୋକେ ଘଟଣାସ୍ଥଳରେ ପହଞ୍ଚି ଶବ ଚିହ୍ନଟ କରିଥିଲେ | ପରେ ମୃତକ ଙ୍କ ସ୍ଵାମୀ ହରି ଭତ୍ରା ଅପରାହ୍ନ ୧.୩୦ ଘ. ସମୟରେ ଡାବୁଗାଁ ଥାନାରେ ଏତଲା ଦେବା ସହ ଅଗ୍ନିସମ କେନ୍ଦ୍ରକୁ ଖବର ଦେଇଥିଲେ | ଏହାପରେ ଅଗ୍ନିସମ କେନ୍ଦ୍ର କର୍ମଚାରୀ ଘଟଣାସ୍ଥାରେ ପହଞ୍ଚି ଶବ ଉଦ୍ଧାର କରିଥିଲେ | ଥାନା ସବଇନିସ୍ପେକ୍ଟର ବିଜୁରାମ ବାଗ ପହଞ୍ଚି ଶବ ପଞ୍ଚନାମା କରି ବ୍ୟବଚ୍ଛେଦ ପାଇଁ ଡାବୁଗାଁ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ପଠାଇଥିଲେ | ଶବ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରାଯାଇଛି | ଏନେଇ ଥାନା କେସ ନଂ ୨୭/୨୪ ରେ ଏକ ଅପମୃତ୍ୟୁ ମାମଲା ରୁଜୁ କରାଯାଇଛି |
ଡାବୁଗାଁରୁ ପ୍ରଜ୍ଞାରଞ୍ଜନ ପରିଡାଙ୍କ ରିପୋର୍ଟ
