ଟଳି ଯାଇଛି ବାତ୍ୟା ” ଦାନା ” ହେଲେ ଘର ଉପରୁ ହଟିନି ଗଛ
ଖଇରା,୨୮/୧୧/୨୪ – ବାତ୍ୟା ” ଦାନା ” ଯାଇଛି ହଟି ହେଲେ ପ୍ରଶାସନ ଏପର୍ଯ୍ୟନ୍ତ ଘର ଉପରୁ ହଟାଇ ପାରିନାହିଁ ଗଛ, ଏପରି ଏକ ଦୃଶ୍ୟ ଦେଖିବାକୁ ମିଳିଛି ବାଲେଶ୍ଵର ଜିଲ୍ଲା ଖଇରା ବ୍ଲକ ନୟାଖଣ୍ଡି ପଞ୍ଚାୟତ ଗଡ଼ ଗ୍ରାମରେ । ଗ୍ରାମର ସରୋଜ କୁମାର ସେଣ୍ଢଙ୍କ ଆଜବେଷ୍ଟ ଘର ଉପରେ ଉପୁଡି ପଡିଛି ୪ଟିରୁ ଅଧିକ ଗଛ । ସରପଞ୍ଚ ଠାରୁ ପ୍ରଶାସନ ପର୍ଯ୍ୟନ୍ତ ସମସ୍ତଙ୍କୁ ଏ ବିଷୟରେ ଜଣାଇବା ପରେ ଦମକଳ ବାହିନୀ ଓ ଗଛ କଟାଳି ଟିମକୁ ପ୍ରଶାସନ ପଠାଇଥିଲା । ହେଲେ ସେମାନେ ଗଛକାଟି ହଟାଇବାରେ ସକ୍ଷମ ହୋଇନଥିଲେ । ପଚାରିବାରୁ କହିଲେ ଅଧିକ ଯନ୍ତ୍ରପାତି ନାହିଁ ତେଣୁ ସମ୍ପୂର୍ଣ୍ଣ ହଟେଇବା ସମ୍ଭବ ନୁହେଁ । ପରିବାର ଭୟଭୀତ ଅବସ୍ଥାରେ ରହିଛନ୍ତି । କୁଚିଆକୋଇଲି ଆର ଆଇ ଦିଲ୍ଲୀପ କୁମାର ବାରିକ ଘଟଣା ସ୍ଥଳ ପରିଦର୍ଶନ କରି ଫେରିଛନ୍ତି । ବିଧାୟକ ପଦ୍ମଲୋଚନ ପଣ୍ଡାଙ୍କୁ ସାକ୍ଷାତ କରିବା ପରେ ଯଦିଓ ଗଛ କଟାଳି ଟିମ ଯାଇଥିଲେ ହେଲେ ସଫା କଲେ ନାହିଁ । ଶ୍ରୀ ସେଣ୍ଢ ତହସିଲଦାର ଜିତେନ୍ଦ୍ର ମୁର୍ମୁଙ୍କୁ ଭେଟିବା ପରେ ତହସିଲଦାର ଶ୍ରୀ ମୁର୍ମୁ ନିଜେ ଘଟଣା ସ୍ଥଳ ପରିଦର୍ଶନ କରି ଦୁଃଖ ଅନୁଭବ କରିବା ସହିତ ତୁରନ୍ତ କିପରି ସମସ୍ୟାର ସମାଧାନ ହୋଇ ପାରିବ ସେଥିପାଇଁ ଉଦ୍ୟମ ଆରମ୍ଭ କରିଥିବା ଜଣାପଡିଛି । ବର୍ତ୍ତମାନ ବିଭିନ୍ନ ସ୍ଥାନରେ ଗଛ କଟା ଚାଲିଛି ସେଥିପାଇଁ ବିଳମ୍ବ ହୋଇପାରେ ବୋଲି ବିଶେଷ ସୂଚନାରୁ ଜାଣିବାକୁ ମିଳିଛି । ପ୍ରଶାସନର ବିଳମ୍ବତା ପାଇଁ ବାହାର ମଜୁରିଆଙ୍କୁ ସଫା କାର୍ଯ୍ୟରେ ଲଗାଇଥିବା ଖବର ସଂଗ୍ରହରୁ ଜଣାଯାଇଛି ।।
ବାଲେଶ୍ଵରରୁ ନରେନ୍ଦ୍ର ପ୍ରସାଦ ବେହେରାଙ୍କ ରିପୋର୍ଟ
