ମୋଟରସାଇକେଲରୁ ପଡି ମହିଳା ମୃତ
ଡାବୁଗାଁ, ୭/୨ (ମ.ନି.ସ.)- ନବରଙ୍ଗପୁର ଜିଲା ଡାବୁଗାଁ ଥାନା ଅଧୀନ ବୁଟିଆଗୁଡା ଗ୍ରାମ ବିଦ୍ୟାଳୟ ନିକଟରେ ମୋଟରସାଇକେଲ ରୁ ଜଣେ ମହିଳା ଙ୍କ ମୃତ୍ୟୁ ଘଟିଥିବା ନେଇ ଶୁକ୍ରବାର ଡାବୁଗାଁ ଥାନାରେ ଅଭିଯୋଗ ହୋଇଛି | ସୂଚନାଯୋଗ୍ୟ:- ଝରିଗାଁ ବ୍ଲକ ବ୍ରହ୍ମ କୁମାରୀ ସଂସ୍ଥା ର ପରିଚାଳିକା ବ୍ରହ୍ମକୁମାରୀ ସନ୍ଧ୍ୟାରାଣୀ ଧଳ (୫୦) ଗୁରୁବାର ଅପରାହ୍ନରେ ଝରିଗାଁର ଯୁବକ ସନ୍ତୋଷ କୁମାର ତ୍ରିପାଠୀ ଙ୍କ ମୋଟରସାଇକେଲ ନଂ ଓଡି ୨୪ ଇ ୩୩୮୪ ଯୋଗେ ନବରଙ୍ଗପୁର ଠାରୁ ଝରିଗାଁ ଫେରୁଥିବା ବେଳେ ଡାବୁଗାଁ- ଝରିଗାଁ ମୁଖ୍ୟ ରାସ୍ତାରେ ବୁଟିଆଗୁଡା ଗ୍ରାମ ବିଦ୍ୟାଳୟ ନିକଟରେ ଥିବା ହମ୍ପ୍ସ ଡେଉଁଥିବା ବେଳେ ପଛରେ ବସିଥିବା ବ୍ରହ୍ମକୁମାରୀ ସନ୍ଧ୍ୟାରାଣୀ ମୋଟରସିକେଲ ରୁ ତଳକୁ ପଡି ଯାଇଥିଲେ | ତଳେ ପଡିଯିବାରୁ ତାଙ୍କର ମୁଣ୍ଡରେ ଆଘାତ ଲାଗିଥିଲା | ତାଙ୍କୁ ସଙ୍ଗେ ସଙ୍ଗେ ଡାବୁଗାଁ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଥିଲା | ସେଠାରୁ ତାଙ୍କର ଗୁରୁତ୍ତର ହେବାରୁ ନବରଙ୍ଗପୁର ଜିଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରଯାଇଥିଲା | ସେଠାରୁ ଉତ୍ତମ ଚିକିତ୍ସା ନିମନ୍ତେ କୋରାପୁଟ ସହିଦ ଲକ୍ଷ୍ମଣ ନାୟକ ମେଡିକାଲ କଲେଜକୁ ସ୍ଥାନାନ୍ତର କରାଯାଇଥିଲା | ସେଠାରେ ଚିକିତ୍ସିତ ଅବସ୍ଥାରେ ବ୍ରହ୍ମକୁମାରୀ ସନ୍ଧ୍ୟାରାଣୀ ଧଳ ଙ୍କ ଗୁରୁବାର ରାତ୍ରିରେ ମୃତ୍ୟୁ ଘଟିଛି | ଏନେଇ ଶୁକ୍ରବାର ପୂର୍ବାହ୍ନ ୧୧ ଘ.ରେ ଡାବୁଗାଁ ବ୍ରହ୍ମ କୁମାରୀ ସଂସ୍ଥାର ବ୍ରହ୍ମ କୁମାର ଅଲେଖ ପ୍ରସାଦ ନାୟକ ଡାବୁଗାଁ ଥାନାରେ ଏତଲା ଦେଇଥିଲେ | ଉକ୍ତ ଏତଲାକୁ ଭିତ୍ତି କରି ଥାନା କେସ ନଂ ୧୮/୨୫ ରେ ଏକ ମାମଲା ରୁଜୁ କରାଯାଇଛି | କୋରାପୁଟ ସହିଦ ଲକ୍ଷ୍ମଣ ନାୟକ ମେଡିକାଲ କଲେଜ ଠାରେ ବ୍ରହ୍ମକୁମାରୀ ସନ୍ଧ୍ୟାରାଣୀ ଧଳଙ୍କ ମୃତ ଦେହ ବ୍ୟବଚ୍ଛେଦ କରାଯାଇ ଝରିଗାଁ ବ୍ରହ୍ମ କୁମାରୀ ସଂସ୍ଥା ର କର୍ମକର୍ତ୍ତା ମାନଙ୍କୁ ହସ୍ତାନ୍ତର କରାଯାଇଛି | ଥାନା ଏଏସଆଇ ଚନ୍ଦ୍ର ଶେଖର ହଜାରୀ ଉକ୍ତ ଘଟଣାର ତଦନ୍ତ କରୁଛନ୍ତି |
ଡାବୁଗାଁରୁ ପ୍ରଜ୍ଞାରଞ୍ଜନ ପରିଡାଙ୍କ ରିପୋର୍ଟ
