ସୈନିକ ଗଢ଼ିବାରେ ପ୍ରତିବଦ୍ଧ କଳିଙ୍ଗ ଉତ୍କଳ ଡିଫେନ୍ସ ଏକାଡେମୀ
ଖଇରା,୨୩/୪/୨୫ – ବାଲେଶ୍ଵର ଜିଲ୍ଲା ଖଇରା ବ୍ଲକରେ ତିଆରି ହୋଇଛି ସୈନିକ ତିଆରି କାରଖାନା । ଗତ ୨୦୨୧ ମସିହା ଜାନୁଆରି ୨୬ ତାରିଖରେ ମୂଳଦୁଆ ପଡ଼ିଥିବା ଏହି ଏକାଡେମୀରେ ଏବେ ୪ ଜଣ ଛାତ୍ର ଭାରତୀୟ ସ୍ଥଳସେନାରେ ଯୋଗଦେଲେଣି । ଏହି ଅବସରରେ ଏକାଡେମୀ ତରଫରୁ ଖଇରା କଲେଜ ନିକଟ ସାଇ ଆଇଟିଆଇ ସ୍ଥିତ କ୍ଲାସ ରୁମ୍ ରେ ଏକ ସମ୍ବର୍ଦ୍ଧନା ସଭା ଅନୁଷ୍ଠିତ କରାଯାଇଥିଲା । ଏହି ସଭାରେ ଖଇରା ତହସିଲଦାର ଅମିତ ରଞ୍ଜନ ହୋତା ମୁଖ୍ୟ ଅତିଥି ଭାବେ ଯୋଗ ଦେଇଥିଲେ । ସମ୍ମାନିତ ଅତିଥି ଭାବେ ଖଇରା ଆଇଆଇସି ସଚିନ୍ଦ୍ର ମହାଳିକ ଓ ଯୋଗଗୁରୁ ମୁକ୍ତିକାନ୍ତ ପାଣିଗ୍ରାହୀ ମଧ୍ୟ ଯୋଗ ଦେଇଥିଲେ । ଉଭୟ ଅଧିକାରୀ ସେନା ପାଇଁ ଯୋଗ୍ୟ ହୋଇଥିବା ଛାତ୍ର ମାନଙ୍କୁ ସମ୍ବର୍ଦ୍ଧିତ କରିବା ସହିତ କଠିନ ପରିଶ୍ରମ କରି ଆଗାମୀ ଦିନରେ ଦେଶ ସୁରକ୍ଷାରେ ଭାଗିଦାରୀ ହେବାପାଇଁ ଉପସ୍ଥିତ ଛାତ୍ରଛାତ୍ରୀ ମାନଙ୍କୁ ପ୍ରେରଣା ଦେଇଥିଲେ । ଯୋଗଗୁରୁ ଶ୍ରୀ ପାଣିଗ୍ରାହୀ ସଭାରେ ସଭାପତିତ୍ବ କରିବା ସହିତ ଅତିଥି ପରିଚୟ ପ୍ରଦାନ କରିଥିଲେ । ଏକାଡେମୀର ସାଧାରଣ ଜ୍ଞାନ ଶିକ୍ଷକ ଦେବକୀ ନନ୍ଦନ ସାମଲ ଏକାଡେମୀ ବିଷୟରେ ସମସ୍ତଙ୍କୁ ସମ୍ୟକ ସୂଚନା ପ୍ରଦାନ କରିଥିଲେ । ଜ୍ୟୋତି ଆଦିତ୍ୟ ରାୟ, ଗୌତମ ସାହୁ, ଅଶୋକ କୁମାର ମାଝୀ ଓ ଶ୍ରୀକାନ୍ତ କୁମାର ବେହେରାଙ୍କ ସମେତ ୪ ବର୍ଷରେ ୪୦ ଜଣ ପିଲା ଏକାଡେମୀରୁ ବିଭିନ୍ନ ସରକାରୀ ଚାକିରୀରେ ନିଯୁକ୍ତି ପାଇଥିବା ଶୁଣି ଅତିଥି ମାନେ ଖୁସି ଅନୁଭବ କରିଥିଲେ । ଏକାଡେମୀର ଉସ୍ତାଦ, ଶିକ୍ଷକ ଓ ଛାତ୍ରଛାତ୍ରୀ ମାନେ ସଭାକୁ ପରିଚାଳନା କରିଥିଲେ ।।
ବାଲେଶ୍ବରରୁ ନରେନ୍ଦ୍ର ପ୍ରସାଦ ବେହେରାଙ୍କ ରିପୋର୍ଟ
