କହିବା ଅଳପ ଶୁଣିବା ବେଶୀ
ଜ୍ୟୋତ୍ସ୍ନା ରାଣୀ ଦେବୀ
ଆ’ ରେ ଚଗଲା ଆ ‘ଲୋ ଲୁସି
ପାଠ ପଢିଯିବା ହୋଇଣ ଖୁସି
ଗୁରୁ ଗୁରୁଜନ କହିବେ ଯାହା
ମନଦେଇ ଆମେ ଶୁଣିବା ତାହା
କହିବା ଅଳପ ଶୁଣିବା ବେଶୀ
ଆ’ ରେ………
ତୁନିତୁନି ଆମେ ପଢ଼ିବା ପାଠ
କୁନିକୁନି ଆମେ ଯେତେକ ଚାଟ
ପଢିବାରେ ଆମେ ଥରକୁଥର
ଲେଖିବା ଅଧିକ ନ ଥିବ ଡର
ନାଚିଗାଇ ଖେଳି ହୋଇବା ଖୁସି ।
ଆ’ ରେ……..
ଟୁଆଁଟୁଇଁ ଆମେ ଯେତେକ ପିଲା
ଖେଳେ ମାତି ପାଠେ ନ କରି ଢିଲା
ଖେଳ ବେଳେ ଆମେ ଖେଳିବା ଖେଳ
ପାଠ ପଢି ହେବା ଅମୂଲମୂଲ
ଗଢିବା ଦୁନିଆ ଆମେରେ ହସି ।
ଆ ‘ରେ…….
ଆସ ରୁନିଝୁନି ଆ’ ବଗୁଲା
କାନ୍ଧରେ ପକାଇ ବସ୍ତାନିଝୁଲା
ସଅଳ ଯିବାରେ ନ କରି ମଠ
କରିବାନି କେବେ ସମୟନଷ୍ଟ
ଆଗକୁ ବଢ଼ିବା ହୋଇ ସାହସୀ ।
ଆ’ ରେ……
ଚୁନଚୁନା ଆମେ ଯେତେକ କଢି
ଫୁଟିବା ବାସିବା ଆଗକୁ ବଢି
ସୁନେଲି ସକାଳ କିରଣ ଛୁଆଁ
ଦେଇ ଗଢିବାରେ ନୂଆ ଦୁନିଆ
ଆଲୋକ ଢାଳିବା ହଟାଇ ନିଶି ।
ଆ’ରେ….
ବ୍ରହ୍ମପୁର, ଗଂଜାମ
