ଜିଲ୍ଲାର ୬୦ଜଣ ଦିବ୍ୟାଙ୍ଗ ହେଲେ ଆତ୍ମନିର୍ଭରଶୀଳ
ବ୍ରହ୍ମପୁର,ତା ୩୧/୦୩ ନାବାର୍ଡ ଅନୁଦାନରେ ଏସସିପିଡବ୍ଲୁଡି (ସ୍କିଲ କାଉସିଲ୍ ପର୍ସନ ଉଈଥି ଡିଜାବୁଲୁଟି) ପକ୍ଷରୁ ଗଞ୍ଜାମ ଜିଲ୍ଲାର ୩୦ ଜଣ ମୁକ ଓ ବଧିର ଦିବ୍ୟାଙ୍ଗଙ୍କୁ ନେଇ ଗଞ୍ଜାମ ଜିଲ୍ଲା କବିସୂର୍ଯ୍ୟନଗର ଦକ୍ଷତା ବିକାଶ କେନ୍ଦ୍ର ଦ୍ୱାରା ବୈଦ୍ୟୁତିକ ମେସିନ ଦ୍ୱାରା ସିଲେଇ ପ୍ରଶିକ୍ଷଣ କାର୍ଯ୍ୟକ୍ରମ ଉଦଯାପିତ ହୋଇଯାଇଛି । ଏହି ଅବସରରେ ନାବାର୍ଡ ଗଞ୍ଜାମ ଜିଲ୍ଲା ଡ଼ିଡ଼ିଏମ ଡ଼. ସଂଜୀବ ମିଶ୍ର,କବିସୂର୍ଯ୍ୟନଗର ୟୁକୋ ବ୍ୟାଙ୍କ ଶାଖା ପରିଚାଳକ ରାଜେଶ ପାଢ଼ୀ, ବନଦେବୀ ଶିଳ୍ପ ତାଲିମ୍ କେନ୍ଦ୍ର ଟ୍ରେନିଂ ଅଫିସର ରଘୁନାଥ ପାଢ଼ୀ ପ୍ରମୁଖ ଅତିଥି ରୂପେ ଯୋଗ ଦେଇଥିଲେ । ଏବଂ ପରେ ତାଲିମ୍ ଗ୍ରହଣ କରି ବିଭିନ୍ନ ଅନୁଷ୍ଠାନରେ ନିଯୁକ୍ତି ସୁଯୋଗ ପାଇଥିବା ଶିବିରାର୍ଥୀଙ୍କୁ ନିଯୁକ୍ତି ପତ୍ର ଏବଂ ପ୍ରମାଣପତ୍ର ପ୍ରଦାନ କରିଥିଲେ । ଗତ ଜାନୁଆରୀ ୧୭ତାରିଖ ଠାରୁ ଆରମ୍ଭ ହୋଇଥିବା କାର୍ଯ୍ୟକ୍ରମ ୬୯ଦିନ ଧରି ଜାରି ରହିଥିଲା । ସେହିଭଳି ଶେରଗଡ଼ ଦକ୍ଷତା ବିକାଶ କେନ୍ଦ୍ରରେ ମଧ୍ୟ ୩୦ ଜଣ ତାଲିମ୍ ଗ୍ରହଣ କରିଥିବା ଶତକଡା ଶତ ପ୍ରତିଶତଙ୍କୁ ଶିବିରାର୍ଥୀ ନିଯୁକ୍ତି ସୁଯୋଗ ପ୍ରଦାନ କରାଯାଇଛି । ଟ୍ରେନର ସରସ୍ବତୀ ଆଚାରୀ ଏବଂ ପ୍ରଭାସିନୀ ପ୍ରଧାନ ଦ୍ୱାରା ଶେରଗଡ଼ ଏବଂ କବିସୂର୍ଯ୍ୟନଗର ଦକ୍ଷତା ବିକାଶ କେନ୍ଦ୍ରରେ ତାଲିମ୍ ପ୍ରଦାନ କରାଯାଇ ଥିଲା । ସମସ୍ତେ ଯେପରି ନିଯୁକ୍ତି ସୁଯୋଗ ପାଇ ଆତ୍ମନିର୍ଭରଶୀଳ ହେବେ ସେଥି ନିମନ୍ତେ ସ୍ୱତନ୍ତ୍ର ପ୍ରସ୍ତୁତି ଗ୍ରହଣ କରାଯାଇ ଥିବା ଆୟୋଜକଙ୍କ ପକ୍ଷରୁ ସୂଚନା ଦିଆଯାଇଛି । ସମସ୍ତ କାର୍ଯ୍ୟକ୍ରମକୁ ବିଭୁତି ଭୂଷଣ ସ୍ୱାଇଁ,ବିକାଶ କୁମାର ସ୍ୱାଇଁ ଏବଂ ସତ୍ୟନାରାୟଣ ମିଶ୍ର ପରିଚାଳନା କରିଥିଲେ ।
