ଆଜିର ଦିବସର ଅନୁଚିନ୍ତା : ଏପ୍ରିଲ ୧୬ ତାରିଖ :
ଇତିହାସରେ ଏକ ସ୍ୱର୍ଣ୍ଣିମ ଅଧ୍ୟାୟ
ଡ଼ା. ଦେବୀ ପ୍ରସାଦ ମିଶ୍ର,
ସମୟର ନିରନ୍ତର ପ୍ରବାହରେ ପ୍ରତିଟି ଦିନ ନିଜ ସାଥୀରେ କିଛି ଐତିହାସିକ ସ୍ମୃତି ଓ ସିଦ୍ଧି ନେଇ ଆସିଥାଏ।ଆଜି ଏପ୍ରିଲ ୧୬ ତାରିଖ,ଯାହା ବିଶ୍ୱ, ଭାରତ ଓ ଓଡ଼ିଶା ଇତିହାସରେ ଏକ ସ୍ୱର୍ଣ୍ଣିମ ଅଧ୍ୟାୟ।
ବିଶ୍ୱ ପରିପ୍ରେକ୍ଷୀରେ ଆଜି ‘ବିଶ୍ୱ ସ୍ୱର ଦିବସ’। ମଣିଷର କଣ୍ଠସ୍ୱରର ଗୁରୁତ୍ୱ ଏବଂ ଏହାର ସୁରକ୍ଷା ସମ୍ପର୍କରେ ସଚେତନତା ସୃଷ୍ଟି କରିବା ଏହାର ମୂଳ ଲକ୍ଷ୍ୟ। ତେଣୁ ଏହା ଆମକୁ ମଣିଷର କଣ୍ଠସ୍ୱରର ମୂଲ୍ୟ ଓ ସୁରକ୍ଷା ସମ୍ପର୍କରେ ସଚେତନ କରେ।ସେହିପରି ୧୯୧୨ ମସିହାରେ ଆଜିର ଦିନରେ ହାରିଏଟ୍ କ୍ୱିମ୍ବି ପ୍ରଥମ ମହିଳା ଭାବେ ବିମାନ ଯୋଗେ ଇଂରାଜୀ ଚ୍ୟାନେଲ୍ ଅତିକ୍ରମ କରି ବିଜ୍ଞାନ ଓ ସାହସିକତାର ପରିଚୟ ଦେଇଥିଲେ।ଏହା ନାରୀ ସାହସ ଓ ବିଜ୍ଞାନୀୟ ଆତ୍ମବିଶ୍ୱାସର ଏକ ଉଜ୍ଜ୍ୱଳ ଦୃଷ୍ଟାନ୍ତ।ବିଶିଷ୍ଟ ବ୍ୟକ୍ତିତ୍ୱମାନଙ୍କ ମଧ୍ୟରେ ୧୮୮୯ ମସିହାରେ ଆଜିର ଦିନ ହେଉଛି ବିଶ୍ୱପ୍ରସିଦ୍ଧ ହାସ୍ୟ ଅଭିନେତା ଚାର୍ଲି ଚାପ୍ ଲିନଙ୍କ ଜନ୍ମଦିନ।ମୁକ ଅଭିନୟ ମାଧ୍ୟମରେ ସମଗ୍ର ବିଶ୍ୱକୁ ହସାଇବା ସହ ସମାଜର ଗୁରୁଢ଼ ସତ୍ୟକୁ ସେ ଉପସ୍ଥାପନ କରିଥିଲେ।ତାଙ୍କର ନିରବ ଅଭିନୟ ମାନବ ଜୀବନର କଠୋର ସତ୍ୟକୁ ହାସ୍ୟର ମାଧ୍ୟମରେ ପ୍ରକାଶ କରିଥିଲା।
ଭାରତ କ୍ଷେତ୍ରରେ ଆଜିର ଦିନଟି ଅତ୍ୟନ୍ତ ଗୁରୁତ୍ୱପୂର୍ଣ୍ଣ।ଭାରତୀୟ ରେଳବାଇର ଜନ୍ମ ୧୮୫୩ ମସିହା ଆଜିର ଦିନରେ ହୋଇଥିଲା ଏବଂ ଭାରତରେ ପ୍ରଥମ ଯାତ୍ରୀବାହୀ ଟ୍ରେନ ବୋରିବନ୍ଦର (ମୁମ୍ବାଇ)ରୁ ଥାନେ ପର୍ଯ୍ୟନ୍ତ ଚାଲିଥିଲା।ଏହା ଭାରତୀୟ ପରିବହନ ବ୍ୟବସ୍ଥାରେ ଏକ ଯୁଗାନ୍ତକାରୀ ପରିବର୍ତ୍ତନ ଆଣିଥିଲା।ଏହା କେବଳ ପରିବହନର ଆରମ୍ଭ ନୁହେଁ,ଏକ ଆର୍ଥିକ ଓ ସାମାଜିକ ପୁନରୁତ୍ଥାନର ଆରମ୍ଭ ମଧ୍ୟ ଥିଲା।ସେଥିପାଇଁ ଆଜିର ଦିନକୁ ‘ଭାରତୀୟ ରେଳ ପରିବହନ ଦିବସ’ ଭାବେ ପାଳନ କରାଯାଏ।
ଓଡ଼ିଶା କ୍ଷେତ୍ରରେ ଆଜି ବିଭିନ୍ନ ସାରସ୍ୱତ ସାଧକ ଓ ସମାଜସେବୀଙ୍କ ପୁଣ୍ୟ ସ୍ମୃତିକୁ ଆମେ ମନେ ପକାଉ।ଆଜିର ବାର୍ତ୍ତା ହେଉଛି ଇତିହାସ କେବଳ ଅତୀତର ଘଟଣାବଳୀ ନୁହେଁ,ବରଂ ଭବିଷ୍ୟତ ପାଇଁ ଏକ ଶିକ୍ଷା।ରେଳବାଇର ଅଗ୍ରଗତି ପରି ଆମ ଜୀବନର ଯାତ୍ରା ମଧ୍ୟ ସଂଘର୍ଷରୁ ସଫଳତା ଆଡ଼କୁ ଗତିଶୀଳ ହେବା ଉଚିତ୍।ଇତିହାସ ଆମକୁ କେବଳ ଘଟଣା ସୂଚନା ଦେଉନାହିଁ,ଏହା ଆମ ଆଗକୁ ବଢ଼ିବାର ପଥକୁ ଆଲୋକିତ କରେ।ରେଳବାଇର ଗତିଶୀଳତା ପରି ଆମ ଜୀବନ ମଧ୍ୟ ଲକ୍ଷ୍ୟପ୍ରତି ଅବିରତ ଗତିଶୀଳ ହେଉ।ଚାର୍ଲି ଚାପଲିନଙ୍କ ଭାଷାରେ,”ହାସ୍ୟ ବିହୀନ ଦିନଟିଏ ହେଉଛି ଏକ ବୃଥା ଦିନ।”ହାସ୍ୟ,ସାହସ ଓ ସୃଜନଶୀଳତା—ଏହି ତିନିଟି ମୂଲ୍ୟବୋଧ ଆମ ଜୀବନକୁ ଯେ ନିଶ୍ଚିତ ଭାବରେ ସାର୍ଥକ କରିପାରିବ ଏହା ଅନସ୍ବୀକାର୍ଯ୍ୟ।
ଡ଼ା. ଦେବୀ ପ୍ରସାଦ ମିଶ୍ର,
✉️ debisirscience@gmail.com
/ debiprasadmishra085@gmail.com
