ହରିପୁର ଗ୍ରାମବାସୀ ପାନୀୟ ଜଳ ପାଇଁ ଡହକ ବିକଳ, କୁମ୍ଭକର୍ଣ୍ଣ ନିଦ୍ରାରେ ପ୍ରଶାସନ
ଢେଙ୍କାନାଳ – ଢେଙ୍କାନାଳ ଜିଲ୍ଲା ହିନ୍ଦୋଳ ବ୍ଲକ ଅନ୍ତର୍ଗତ ଜରଡ଼ା ଗ୍ରାମ ପଞ୍ଚାୟତ ହରିପୁର ଗ୍ରାମକୁ ପାଇପ ପାନୀୟ ଜଳ ଯୋଗାଣ ହେଉ ନଥିବା ଫଳରେ ଗ୍ରାମବାସୀ ନାହି ନଥିବା ଅସୁବିଧାର ସମ୍ମୁଖୀନ ହେଉଛନ୍ତି |ସରକାର ଗ୍ରାମାଞ୍ଚଳକୁ ପାନୀୟ ଜଳ ଯୋଗାଣ ପାଇଁ କୋଟି କୋଟି ଟଙ୍କା ଖର୍ଚ୍ଚ କରୁଥିବା ବେଳେ ଏହାର କୌଣସି ସୁଫଳ ହରିପୁର ଗ୍ରାମବାସୀ ପାଇପାରୁନଥିବା ଅତ୍ୟନ୍ତ କ୍ଷୋଭ ଓ ପରିତାପର ବିଷୟ ବୋଲି ଜଣାଯାଇଛି |ହରିପୁର ଗ୍ରାମକୁ ଜରଡ଼ା ଗ୍ରାମଠାରୁ ବସୁଧା ଏବଂ ମେଗା ପ୍ରକଳ୍ପ ପାଇପ ଲାଇନ ବହୁଦିନ ଧରି ବିଛା ଯାଇଥିବା ବେଳେ ବିଭାଗୀୟ କର୍ମଚାରୀଙ୍କ ମନମୁଖୀ କାର୍ଯ୍ୟ ପାଇଁ ଏଥିରେ ଅଦ୍ୟାବଧି ଜଳାଯୋଗାଣ ହୋଇ ପାରିନାହିଁ |ଫଳରେ ଗ୍ରାମବାସୀ ବଡଯୋଡ଼ା ନାଳର ଅପରିଷ୍କାର ଜଳ ବ୍ୟବହାର କରି ବିଭିନ୍ନ ରୋଗରେ ପଡୁଛନ୍ତି |ଏ ସମ୍ପର୍କରେ ଗ୍ରାମବାସୀ ହିନ୍ଦୋଳର ଉପ ଜିଲ୍ଲାପାଳ, ଗୋଷ୍ଠୀ ଉର୍ନ୍ନୟନ ଅଧିକାରୀ, ଗ୍ରାମୀଣ ଜଳଯୋଗଣ ଏବଂ ପରିମଳ ବିଭାଗର ସହକାରୀ ଯନ୍ତ୍ରୀଙ୍କୁ ଚଳିତ ମାସ ତିନି ତାରିଖରେ ଲିଖିତ ଅଭିଯୋଗ କରିଥିଲେ ମଧ୍ୟ ଏହାର କୌଣସି ସୁଫଳ ଗ୍ରାମବାସୀଙ୍କ ପାଖରେ ପହଞ୍ଚି ପାରିନାହିଁ |ଏପରିକି ହିନ୍ଦୋଳର ଊପ ଜିଲ୍ଲାପାଳ ଗ୍ରାମୀଣ ଜଳ ଯୋଗାଣ ଏବଂ ପରିମଳ ବିଭାଗର ସହକାରୀ ଯନ୍ତ୍ରୀଙ୍କୁ ପତ୍ର ସଂଖ୍ୟା -3758,ତା. 04.06.2026ଯୋଗେ ସାତଦିନ ମଧ୍ୟରେ ଆକ୍ସନ ଟେକେନ ରିପୋର୍ଟ ମାଗିଥିଲେ ମଧ୍ୟ ତାହାର କୌଣସି ପ୍ରଭାବ ପଡ଼ିନଥିବା ଅନୁସନ୍ଧାନରୁ ଜଣାଯାଇଛି |ଶେଷରେ ଗ୍ରାମବାସୀ ସ୍ଥାନୀୟ ଜରଡ଼ା ଗ୍ରାମ ପଞ୍ଚାୟତର ସରପଞ୍ଚଙ୍କୁ ପାଇପ ପାନୀୟ ଜଳାଯୋଗାଣ ପାଇଁ ଲିଖିତ ଅଭିଯୋଗ କରିଥିଲେ ମଧ୍ୟ ତାହାର କୋୖଣସି କାର୍ଯ୍ୟାନୁଷ୍ଠାନ ହୋଇପାରିନାହିଁ | ହରିପୁର ଗ୍ରାମକୁ ପାନୀୟ ଜଳ ଯୋଗାଣର ବ୍ୟବସ୍ଥା କେବେ ଆସିବ ତାହା ଦେଖିବାକୁ ବାକି ରହିଲା |
ପ୍ରହ୍ଲାଦ ମୁଦୁଲି ଙ୍କ ରିପୋର୍ଟ୍
