ଧରାକୋଟ ଗଡରେ ଦେବସ୍ନାନ ପୂର୍ଣ୍ଣିମା
ଆସିକା, ୨୯/୬/୨୬ (ଶିବ ଶଙ୍କର ମିଶ୍ର ) ଧରାକୋଟ ଗଡରେ ଦେବସ୍ନାନ ପୂର୍ଣ୍ଣିମା ପୂର୍ବ ପ୍ରଚଳିତ ପରମ୍ପରା ଅନୁଯାୟୀ ପାଳନ ହୋଇଯାଇଛି । ରବିବାର ରାତ୍ରରେ ସେନାପଟା ଲାଗି ହେବାପରେ ସୋମବାର ପ୍ରଭାତରୁ ତିନି ଠାକୁରଙ୍କୁ ମଙ୍ଗଳା ଅର୍ପଣ କରାଯିବା ପରେ ନଅ ଘଣ୍ଟ ସମୟରେ ତିନି ଠାକୁରଙ୍କୁ ଗୋଟି ପହଣ୍ଡିରେ ସ୍ନାନ ମଣ୍ଡପକୁ ବିଜେ କରାଯାଇଥିଲା । ଠାକୁର ମାନଙ୍କୁ ନୂଆଁ ବସ୍ତ୍ର ପରିଧାନ ପରେ ସୁନା କୂଅର 108 ଗରା ଜଳରେ ସ୍ନାନ କରାଯାଇଥିଲା । ଏହା ପରେ ଠାକୁର ମାନେ ଗଜାନନ ବେଶ ଧାରଣ କରିଥିଲେ । ରାଜା ସୁଲକ୍ଷଣା ଗୀତାଞ୍ଜଳି ଙ୍କୁ ପଗଡ଼ି ଓ ଫୁଲମାଳ ପିନ୍ଧାଯିବା ପରେ ସେ ତିନି ଠାକୁରଙ୍କୁ ପଞ୍ଚାମୃତ ରେ ମହାସ୍ନାନ କରାଇ ଛେରା ପହଁରା କରି ଆଳତି ପ୍ରଦାନ କରିଥିଲେ। ଏହା ପରେ ଠାକୁର ମାନଙ୍କୁ ନିତିଦିନିଆ ଭୋଗ ଅର୍ପଣ କରାଯାଇଥିଲା । ଶ୍ରଦ୍ଧାଳୁ ମାନଙ୍କ ଦର୍ଶନ ପରେ ସନ୍ଧ୍ୟାରେ ତିନି ଠାକୁର ଙ୍କୁ ପହଣ୍ଡି କରି ମନ୍ଦିର ବିଜେ କରାଯାଇଥିଲା । ସେଠାରେ ବିଭୀଷଣ ଓ ଗରୁଡ଼ ଦର୍ଶନ ପରେ ତିନି ଠାକୁର ଅଣସର ଘରକୁ ଯାଇଥିଲେ । ଆଜିର ତିଥିର ସମସ୍ତ ଦେବନୀତି ତ୍ରିନାଥ ବଡ଼ପଣ୍ଡା ,ସ୍ୱାଧୀନ ପଣ୍ଡା ଓ ସାଗର ଶତପଥୀ ସମ୍ପନ୍ନ କରିଥିବା ବେଳେ ପୁଟୁ ଓ ନନ୍ଦିଗୋର ର ପଣ୍ଡା ମାନେ ତିନି ଠାକୁରଙ୍କୁ ପହଣ୍ଡି କରାଇଥିଲେ । ଗୁମାସ୍ତା କାଳିଆ ବେହେରା, ଟହଲିଆ ଭଗବାନ ଗୌଡ଼,ଶ୍ରୀକାନ୍ତ ସ୍ୱାଇଁ ପ୍ରମୁଖ ସହଯୋଗ ପ୍ରଦାନ କରିଥିବା ବେଳେ ଜାନବିଲି ର ରାଧାକୃଷ୍ଣ ମହିଳା ସଙ୍କୀର୍ତ୍ତନ ମଣ୍ଡଳୀ ହରିନାମ ସଂକୀର୍ତ୍ତନ ପରିବେଷଣ କରିଥିଲେ। ଆଜିର ସ୍ନାନ ପୂର୍ଣ୍ଣିମା ଅବସରରେ ଅଞ୍ଚଳର ଶହ ଶହ ଲୋକଙ୍କ ସମାଗମ ହୋଇଥିଲା ।
