ଅଖିଳ ଉତ୍କଳ ଅଗ୍ନୀକୁଳ କ୍ଷତ୍ରୀୟ ସମାଜ, ଜଗଦଳପୁର ମଣ୍ଡଳର ନୂତନ କର୍ମକର୍ତ୍ତା ଚୟନ ଓ ଶପଥ ଗ୍ରହଣ ଉତ୍ସବ ଅନୁଷ୍ଠିତ
ଆସିକା, ୧୬/୭/୨୬ (ଶିବ ଶଙ୍କର ମିଶ୍ର ) ଅଖିଳ ଉତ୍କଳ ଅଗ୍ନୀକୁଳ ସମାଜ, ଜଗଦଳପୁର ମଣ୍ଡଳ ପକ୍ଷରୁ ନୂତନ କର୍ମକର୍ତ୍ତା ଚୟନ ଓ ଶପଥ ଗ୍ରହଣ ଉତ୍ସବ ମହାରାଜପୁର ବନ୍ୟା ଆଶ୍ରୟ ସ୍ଥଳୀଠାରେ ଗମ୍ଭୀର ଓ ଭବ୍ୟ ପରିବେଶରେ ଅନୁଷ୍ଠିତ ହୋଇଯାଇଛି। ସମାଜର ବହୁ ବରିଷ୍ଠ ସଦସ୍ୟ, ଯୁବ ପ୍ରତିନିଧି ଏବଂ ବିଭିନ୍ନ ଗ୍ରାମରୁ ଆସିଥିବା ସମାଜବନ୍ଧୁଙ୍କ ଉପସ୍ଥିତିରେ କାର୍ଯ୍ୟକ୍ରମଟି ଉତ୍ସାହପୂର୍ଣ୍ଣ ପରିବେଶରେ ସମ୍ପନ୍ନ ହୋଇଥିଲା।ଏହି ଅବସରରେ କୁଳର ସଭାପତି ଭାବେ ପି. ଭୀମସେନ ପାତ୍ର, ଉପସଭାପତି ଭାବେ ପି. ରାମ ପାତ୍ର, ସମ୍ପାଦକ ଭାବେ ଟି. ନିର୍ମଳ ପାତ୍ର ଏବଂ କୋଷାଧ୍ୟକ୍ଷ ଭାବେ ଡି. ରମାକାନ୍ତ ପାତ୍ର ବିଧିବଦ୍ଧ ଭାବେ ଶପଥ ଗ୍ରହଣ କରି ନିଜ ଦାୟିତ୍ୱ ଗ୍ରହଣ କରିଥିଲେ। ପୂର୍ବତନ ସଭାପତି ପି. ରାମାରାଓ ପାତ୍ର ନୂତନ କର୍ମକର୍ତ୍ତାଙ୍କୁ ଦାୟିତ୍ୱ ହସ୍ତାନ୍ତର କରିବା ସହ ସଂଗଠନର ପରମ୍ପରା, ଏକତା ଓ ସେବା ମନୋଭାବକୁ ଅକ୍ଷୁଣ୍ଣ ରଖି କାର୍ଯ୍ୟ କରିବାକୁ ଆହ୍ୱାନ ଜଣାଇଥିଲେ।
ସଭାରେ ବକ୍ତାମାନେ ଅଗ୍ନୀକୁଳ ସମାଜର ସାଙ୍ଗଠନିକ ସୁଦୃଢ଼ୀକରଣ, ସମାଜର ଐତିହ୍ୟ ଓ ପରମ୍ପରାର ସୁରକ୍ଷା, ଯୁବପିଢ଼ିଙ୍କୁ ସଂଗଠନ ସହ ଯୋଡ଼ିବା, ଶିକ୍ଷାର ପ୍ରସାର, ସାମାଜିକ ସଚେତନତା, ଆର୍ଥିକ ସ୍ୱାବଲମ୍ବନ ଏବଂ ସମାଜର ସର୍ବାଙ୍ଗୀଣ ବିକାଶ ଦିଗରେ ସମସ୍ତଙ୍କୁ ଏକାଠି ହୋଇ କାର୍ଯ୍ୟ କରିବାକୁ ଆହ୍ୱାନ ଦେଇଥିଲେ। ସମାଜର ପ୍ରତ୍ୟେକ ସଦସ୍ୟଙ୍କ ମଧ୍ୟରେ ଭାତୃତ୍ୱ, ଶୃଙ୍ଖଳା ଓ ପାରସ୍ପରିକ ସହଯୋଗର ମନୋଭାବ ବୃଦ୍ଧି ପାଇଲେ ସଂଗଠନ ଆହୁରି ମଜବୁତ ହେବ ବୋଲି ମତ ପ୍ରକାଶ ପାଇଥିଲା।ନୂତନ କର୍ମକର୍ତ୍ତାମାନେ ସମାଜର ସମ୍ବିଧାନ ଓ ରୀତିନୀତିକୁ ସମ୍ମାନ ଜଣାଇ ନିଷ୍ଠା, ସ୍ୱଚ୍ଛତା ଓ ସମର୍ପଣର ସହିତ ଦାୟିତ୍ୱ ପାଳନ କରିବା ସହ ସମାଜର ସାମୂହିକ ଉନ୍ନତି ପାଇଁ ସର୍ବଦା କାର୍ଯ୍ୟ କରିବେ ବୋଲି ଶପଥ ନେଇଥିଲେ। ଶେଷରେ ସମସ୍ତ ନବନିର୍ବାଚିତ କର୍ମକର୍ତ୍ତାଙ୍କୁ ଉପସ୍ଥିତ ସମାଜବନ୍ଧୁମାନେ ପୁଷ୍ପଗୁଚ୍ଛ ଓ ଉତ୍ତରୀୟ ପ୍ରଦାନ କରି ସମ୍ବର୍ଦ୍ଧିତ କରିଥିଲେ। କାର୍ଯ୍ୟକ୍ରମଟି ସମାଜର ଏକତା, ସଂଗଠନର ସୁଦୃଢ଼ତା ଏବଂ ଭବିଷ୍ୟତ କାର୍ଯ୍ୟପନ୍ଥା ପ୍ରତି ସମସ୍ତଙ୍କ ଦୃଢ଼ ସଂକଳ୍ପର ପ୍ରତୀକ ହୋଇ ଉଭା ହୋଇଥିଲା।
