ଲଘୁଚାପ ଜନିତ ଲଗାଣ ବର୍ଷାରେ ବେହାଲ ଗୋଲାମୁଣ୍ଡା ବ୍ଲକ
କଳାହାଣ୍ଡି: ଜଳମଗ୍ନ ଗୋଲାମୁଣ୍ଡା ବ୍ଲକ, ୨୮ ପଞ୍ଚାୟତର ୧୨୭ ରାଜସ୍ବ ଗ୍ରାମ ବାସି ଅସ୍ତ ବ୍ୟସ୍ତ
ଗୋଲାମୁଣ୍ଡା :କଳାହାଣ୍ଡି ଜିଲ୍ଲାରେ ସକ୍ରିୟ ରହିଥିବା ପ୍ରବଳ ଲଘୁଚାପ ପ୍ରଭାବରେ ଗତ କିଛି ଦିନ ହେବ ସମଗ୍ର ଅଞ୍ଚଳରେ ଅବିଶ୍ରାନ୍ତ ବର୍ଷାର ତାଣ୍ଡବ ଜାରି ରହିଛି। ଏହି ପ୍ରଳୟଙ୍କରୀ ବର୍ଷା ଯୋଗୁଁ ଜିଲ୍ଲାର ପ୍ରମୁଖ ଗୋଲାମୁଣ୍ଡା ବ୍ଲକରେ ଏବେ ଏକ ପ୍ରକାର ଜଳପ୍ରଳୟର ସ୍ଥିତି ଦେଖାଦେଇଛି। ବ୍ଲକର ପ୍ରାୟ ୮୨୭.୮୨ ବର୍ଗ କିଲୋମିଟର ପରିମିତ ସମଗ୍ର ଭୌଗୋଳିକ ଅଞ୍ଚଳ ଏବେ ସମ୍ପୂର୍ଣ୍ଣ ରୂପେ ଜଳମଗ୍ନ ହୋଇପଡ଼ିଛି। ଯୁଆଡ଼େ ଚାହିଁଲେ କେବଳ ଅକାଳ ବନ୍ୟାର କରାଳ ରୂପ ଏବଂ ପାଣି ହିଁ ପାଣି ଦୃଶ୍ୟମାନ ହେଉଛି। ସ୍ଥାନୀୟ ପ୍ରାକୃତିକ ନାଳ ଓ ନଦୀଗୁଡ଼ିକର ଜଳସ୍ତର ବିପଜ୍ଜନକ ଭାବେ ବୃଦ୍ଧି ପାଇବା ଫଳରେ ବନ୍ୟା ଜଳ ଚାଷଜମି ଏବଂ ଜନବସତି ଆଡ଼କୁ ଦ୍ରୁତ ଗତିରେ ମାଡ଼ି ଚାଲିଛି, ଯାହା ସ୍ଥାନୀୟ ପ୍ରଶାସନ ଓ ଜନସାଧାରଣଙ୍କ ପାଇଁ ଏକ ବଡ଼ ଆହ୍ବାନ ସୃଷ୍ଟି କରିଛି।ଏହି ପ୍ରାକୃତିକ ବିପର୍ଯ୍ୟୟ ଯୋଗୁଁ ବ୍ଲକର ସମଗ୍ର ଗମନାଗମନ ଓ ଯୋଗାଯୋଗ ବ୍ୟବସ୍ଥା ସମ୍ପୂର୍ଣ୍ଣ ରୂପେ ବିପର୍ଯ୍ୟସ୍ତ ହୋଇପଡ଼ିଛି।ବ୍ଲକ ଅଧୀନରେ ଥିବା ସମସ୍ତ ୨୮ଟି ଯାକ ଗ୍ରାମପଞ୍ଚାୟତକୁ ସଂଯୋଗ କରୁଥିବା ପିଚୁ ରାସ୍ତା,କଂକ୍ରିଟ ଓ ଗ୍ରାମ୍ୟ ମାଟି,ମୁରୁମ ମେଟାଲ ରାସ୍ତାଗୁଡ଼ିକ ବନ୍ୟା ଜଳର ପ୍ରଖର ସ୍ରୋତରେ ସମ୍ପୂର୍ଣ୍ଣ ଧୋଇଯାଇଛି।ରାସ୍ତାଘାଟ ନଷ୍ଟ ହୋଇଯିବା ଫଳରେ ବ୍ଲକର ସମସ୍ତ ୧୨୭ଟି ରାଜସ୍ବ ଗ୍ରାମ ବାହ୍ୟ ଜଗତରୁ ପ୍ରାୟତଃ ବିଚ୍ଛିନ୍ନ ହୋଇପଡ଼ିଛନ୍ତି। ଅନେକ ସ୍ଥାନରେ ରାସ୍ତା ମଝିରେ ବଡ଼ ବଡ଼ ଘାଇ ଓ ଗଭୀର ଗାତ ସୃଷ୍ଟି ହୋଇଥିବାରୁ ଗାଁରୁ ଗାଁକୁ ଯିବା ଆସିବା ସମ୍ପୂର୍ଣ୍ଣ ବନ୍ଦ ରହିଛି।କେତେକ ପ୍ରମୁଖ ଗ୍ରାମ୍ୟ ପୋଲ ଏବଂ କଲଭର୍ଟ ଉପରେ ୩ ରୁ ୪ ଫୁଟର ବନ୍ୟା ଜଳ ପ୍ରବାହିତ ହେଉଥିବା ଦେଖିବାକୁ ମିଳିଛି ।ଗୋଲାମୁଣ୍ଡା ବ୍ଲକର ସମଗ୍ର ଜନସଂଖ୍ୟା ଏହି ପ୍ରାକୃତିକ ଦୁର୍ବିପାକ ଦ୍ବାରା ସିଧାସଳଖ ପ୍ରଭାବିତ ହୋଇ ଦୁର୍ଦ୍ଦଶା ଭୋଗୁଛନ୍ତି।ବ୍ଲକର ମୋଟ ୧,୭୭,୪୩୪ ଜନସାଧାରଣ (ଯେଉଁଥିରେ ୮୮,୯୪୭ ଜଣ ପୁରୁଷ ଏବଂ ୮୮,୪୮୭ ଜଣ ମହିଳା ସାମିଲ ଅଛନ୍ତି) ଏବେ ନିଜ ନିଜ ଘର ଭିତରେ ଜଳବନ୍ଦୀ ଅବସ୍ଥାରେ ଦିନ କାଟୁଛନ୍ତି। ବିଶେଷ କରି ଶିଶୁ, ଗର୍ଭବତୀ ମହିଳା, ରୋଗୀ ଓ ବୃଦ୍ଧ ବୃଦ୍ଧା ମାନେ ଚରମ ସମସ୍ୟାର ସମ୍ମୁଖୀନ ହେଉଛନ୍ତି।ଉପଯୁକ୍ତ ନଦୀ ବନ୍ଧ ଓ ନିଷ୍କାସନ ବ୍ୟବସ୍ଥା ନଥିବାରୁ ଗ୍ରାମଗୁଡ଼ିକର ତଳିଆ ଅଞ୍ଚଳ, ସ୍ଥାନୀୟ ବଜାର ଏବଂ ବହୁ ପକ୍କା ଓ କଚ୍ଚା ଘର ଭିତରେ ବନ୍ୟା ପାଣି ପଶି ରହିଛି। ପାନୀୟ ଜଳର ଉତ୍ସଗୁଡ଼ିକରେ ବନ୍ୟା ପାଣି ମିଶିଯିବା ଫଳରେ ବିଶୁଦ୍ଧ ପିଇବା ପାଣି ପାଇଁ ମଧ୍ୟ ହାହାକାର ଦେଖାଦେଇଛି।ରାସ୍ତା ଧୋଇଯାଇଥିବାରୁ କୌଣସି ମେଡିକାଲ ଜରୁରୀ ପରିସ୍ଥିତି ସମୟରେ ଆମ୍ବୁଲାନ୍ସ କିମ୍ବା ଅଗ୍ନିଶମ ବାହିନୀ ଗ୍ରାମଗୁଡ଼ିକରେ ପହଞ୍ଚିବା ସମ୍ପୂର୍ଣ୍ଣ ଅସମ୍ଭବ ହୋଇପଡ଼ିଛି।ଗୋଲାମୁଣ୍ଡା ବ୍ଲକର ମୁଖ୍ୟ ଜୀବିକା ହେଉଛି କୃଷି। ମାତ୍ର ଏହି ବର୍ଷା ଚାଷୀଙ୍କ ମେରୁଦଣ୍ଡ ଭାଙ୍ଗି ଦେଇଛି।ହଜାର ହଜାର ହେକ୍ଟର ସବୁଜ ଚାଷଜମି ଏବେ ବିସ୍ତୀର୍ଣ୍ଣ ସମୁଦ୍ର ଭଳି ଦୃଶ୍ୟମାନ ହେଉଛି। ପ୍ରାୟ ସମସ୍ତ ପଞ୍ଚାୟତରେ ନୂତନ ଭାବେ ରୁଆ ଓ ପୋତା ଯାଇଥିବା ଧାନ ଫସଲ ଦୀର୍ଘ ଦିନ ହେବ ପାଣିରେ ବୁଡ଼ି ରହିବା ଫଳରେ ସେଗୁଡ଼ିକ ସଢ଼ି ନଷ୍ଟ ହେବାକୁ ବସିଲାଣି। ଋଣ କରି ଚାଷ କରିଥିବା ଚାଷୀକୁଳ ନିଜର ବର୍ଷକର ଆହାର ହରାଇବା ଭୟରେ ଏବେ ହତାଶ ହୋଇପଡ଼ିଛନ୍ତି, ଗୋଲାମୁଣ୍ଡା ବ୍ଲକ ରେ ପ୍ରାୟ ତ କପା ଚାଷ କରନ୍ତି ଓ କପା ଗଛ ଛୋଟ ଛୋଟ ଥିବା ହେତୁ ସବୁ ନଷ୍ଟ ହୋଇଯାଇଛି ।ବର୍ତ୍ତମାନର ଜଟିଳ ସ୍ଥିତିକୁ ଦୃଷ୍ଟିରେ ରଖି ସ୍ଥାନୀୟ ବାସିନ୍ଦାଙ୍କ ମଧ୍ୟରେ ତୀବ୍ର ପ୍ରତିକ୍ରିୟା ଓ ଅସନ୍ତୋଷ ପ୍ରକାଶ ପାଇଛି। ଜିଲ୍ଲା ପ୍ରଶାସନ ଓ ଗୋଲାମୁଣ୍ଡା ବ୍ଲକ କର୍ତ୍ତୃପକ୍ଷ ତୁରନ୍ତ ଯୁଦ୍ଧକାଳୀନ ଭିତ୍ତିରେ ପ୍ରଭାବିତ ଅଞ୍ଚଳଗୁଡ଼ିକ ପରିଦର୍ଶନ କରିବାକୁ ଦାବି ହୋଇଛି।ଧୋଇଯାଇଥିବା ସମସ୍ତ ମୁଖ୍ୟ ରାସ୍ତାର ଅସ୍ଥାୟୀ ମରାମତି କରି ଅନ୍ତତଃ ପକ୍ଷେ ଜରୁରୀକାଳୀନ ଗମନାଗମନକୁ ତୁରନ୍ତ ସ୍ବାଭାବିକ କରାଯାଉ ବୋଲି ସାଧାରଣ ରେ ଦାବୀ ହେଉଛି। ଘରେ ଘରେ ପାଣି ପଶି ରଖିଥିବା ଚାଉଳ ମୂଲ୍ୟବାନ ଜିନିଷ ପତ୍ର ଭିଜି ଯାଇଛି l ଖବର ପାଇ ଦମକଳ ବାହିନୀ ଓ ବ୍ଲକ ପ୍ରଶାସନ ବିଛିନ୍ନ ଅଞ୍ଚଳ କୁ ଯାଇ ସହଯୋଗ କରୁଛନ୍ତି l
କ୍ଷୟ କ୍ଷତି ର ତଦନ୍ତ କରି ସରକାର ଚାଷୀ ମାନଙ୍କ ଦୁଃଖ ବୁଝିବା ସହ ପାଣି ରେ ଧୋଇ ହୋଇ ଯାଇଥିବା ରାସ୍ତା ଗୁଡିକ ତୁରନ୍ତ ମରାମତି କରିବା ପାଇଁ ଗୋଲାମୁଣ୍ଡା ବ୍ଲକ ବାସି ଗଣ ମାଧ୍ୟମ ଦ୍ୱାରା ଦାବି କରିଛନ୍ତି, ଏ ନେଇ ଆମେ ଗୋଲାମୁଣ୍ଡା ବିଡ଼ିଓ, ଅଗ୍ନିଶମ ବିଭାଗ ଓ ବିଦ୍ୟୁତ ବିଭାଗ ର ଅଧିକାରୀ ଙ୍କୁ ପଚାରିବାରୁ ଆମେ ଖବର ପାଇଲେ ତୁରନ୍ତ ଯାଉଛୁ ଓ ଆମ ପକ୍ଷରେ ଯେତେ ସମ୍ଭବ ସେତିକି କାମ କରୁଛୁ ବୋଲି ପ୍ରତିକ୍ରିୟା ଦେଇଛନ୍ତି।
ବିଦ୍ୟାଧର ସାହୁଙ୍କ ରିପୋର୍ଟ….
