ବୁଆ ଗୋ ରାଜନିତିର ଲୀଲା
ଶ୍ରୀ ଭ୍ରମର ବାଗ
ବୁଆ ଗୋ ରାଜନିତିର ଲୀଲା
ରାମ ଲୀଲା ନୁ ଜିତି ଗଲା
କୁଷ୍ଟ ଲୀଲା ନୁ ଟପି ଗଲା
ନିତିର ଭିତ୍ରେ ରାଜ ନିତି
ନିତିହିନ୍ ରାଜନିତି ହେଲା…
ବୁଆ ଗୋ ରାଜ ନିତିର ଲୀଲା !1!
ଭୋଟର ବେଲେ ଯାକେ ବଲସନ ବୁଆ
ଜିତି ଗଲେ ତାକେ ଭାବସାନ ଛୁଆ
ମୋର ନୁ ଆର କେ ନାହିଁ ଭାବି
ଲୋକର ସେବକ ସାଆନ୍ତ ହେଲା
ବୁଆ ଗୋ ରାଜନିତିର ଲୀଲା !2!
ଉପ୍ରେ ଉପ୍ରେ କୋକା ପୁତ୍ରା
ଭିତ୍ରେ ଭିତ୍ରେ ସଳା ସୁତ୍ରା
ଧନ ଅର୍ଜି ପନ ବନ୍ଧା ନେ..
ଦେସ ହେଇ ଯଉଛେ ଖୋକଲା
ବୁଆ ଗୋ ରାଜନିତିର ଲୀଲା !3!
ରଜାର ପିଲା ରଜା ହେଲା
ପର୍ଜା ପିଲା ପର୍ଜା ରହେଲା
ଲୋକ ସାସନ ନେ ସଭେ ସମାନ
ଧନି ଗରିବ କେନ୍ତା ରହେଲା…
ବୁଆ ଗୋ ରଜନିତିର ଲୀଲା !4!
ବୁଆ କେ ସାଠେ ନି କାଟେ କଥା
ପୋ କେ ମିଲୁଛେ ବୁଢ଼ା ଭତା
ସେ ସେ ବାଟେ ଛତର ଟେକା…
ଯେନ ଯେନ ବାଟ ପାନି ମାର୍ଲା
ବୁଆ ଗୋ ରାଜନିତିର ଲୀଲା !5
ତେଲିର ମୁଡ଼େ ତେଲ ଢଲା
ଗରିବ ସବୁବେଲେ ସଲା
ବସି ରହିକରି ତେର ତାକର…
ଧାଇଁ ଧୁପି ଆମର ବାର ହେଲା
ବୁଆ ଗୋ ରାଜନିତିର ଲୀଲା !6!
ଦେବତା ଗିଲି ଯେନ ପିରା ଗିଲଲା
ଗୁଡ଼ି ଗିଲି ଯେନ ଝଣ୍ଡା ଗିଲଲା
ଦେସର ସେବା ସେ କେନ୍ତା କରବା…
ଲୋଭ ଲାଲସା ଯାର ରହେଲା
ବୁଆ ଗୋ ରାଜନିତିର ଲୀଲା !7!
ଗାଁ – କୋଦୋବେଡ଼ା, ସିନାପାଲି,
ଜିଲ୍ଲା – ନୂଆପଡ଼ା
