ଭୁବନେଶ୍ବରରେ ରାଜ୍ୟସ୍ତରୀୟ ଏସଡିସି ଅଧ୍ୟକ୍ଷଙ୍କ ସମ୍ମିଳନୀ :
ଯୋଗଦେଲେ କଳାହାଣ୍ଡି ସ୍ବତନ୍ତ୍ର ଉନ୍ନୟନ ପରିଷଦ ଅଧ୍ୟକ୍ଷ
ଭବାନୀପାଟଣା,୦୮/୦୯(ମନିସ)-ଆଜି ଭୁବନେଶ୍ବରଠାରେ ସ୍ବତନ୍ତ୍ର ଉନ୍ନୟନ ପରିଷଦର ଅଧ୍ୟକ୍ଷମାନଙ୍କୁ ନେଇ ଏକ ସ୍ବତନ୍ତ୍ର ବୈଠକ ଅନୁଷ୍ଠିତ ହୋଇଯାଇଛି ! ରାଜ୍ୟ ସ୍ବତନ୍ତ୍ର ଉନ୍ନୟନ ପରିଷଦର ଉପଦେଷ୍ଟା ତଥା ପୂର୍ବତନ ନବରଙ୍ଗପୁର ସାଂସଦ ପ୍ରଦୀପ କୁମାର ମାଝୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ରାଜ୍ୟର ୨୧ଟି ଜିଲ୍ଲାର ସ୍ବତନ୍ତ୍ର ଉନ୍ନୟନ ପରିଷଦର ଅଧ୍ୟକ୍ଷମାନେ ଯୋଗ ଦେଇଥିଲେ ! ଏଇ ଅବସରରେ ନବଗଠିତ କଳାହାଣ୍ଡି ସ୍ବତନ୍ତ୍ର ଉନ୍ନୟନ ପରିଷଦର ନବନିଯୁକ୍ତ ଅଧ୍ୟକ୍ଷ ତଥା ପୂର୍ବତନ ବିଧାୟକ ଶିବାଜୀ ମାଝୀ ଏଇ ବୈଠକରେ ସାମିଲ ହୋଇ ଆଲୋଚନାରେ 
ଭାଗ ନେଇଥିଲେ ! ନୂତନ ନିଯୁକ୍ତି ପାଇଁ ସେ ରାଜ୍ୟ ସରକାରଙ୍କୁ ଧନ୍ୟବାଦ ଦେବା ସହିତ କଳାହାଣ୍ଡି ଜିଲ୍ଲାର ବିକାଶ ଦିଗରେ ସେ ସ୍ବତନ୍ତ୍ର ଉନ୍ନୟନ ପରିଷଦ ଦ୍ବାରା ଯଥାସମ୍ଭବ ପ୍ରୟାସ କରିବେ ବୋଲି ମତ ଦେଇଥିଲେ ! ସେହିପରି ଜିଲ୍ଲାର ବିଭିନ୍ନ ସମସ୍ୟାର ଚିହ୍ନଟ କରି ସ୍ବତନ୍ତ୍ର ଉନ୍ନୟନ ପରିଷଦର କ୍ଷମତା ପରିସର ଅନ୍ତର୍ଭୁକ୍ତ କାର୍ଯ୍ୟକ୍ରମଗୁଡ଼ିକର ସଫଳ ରୂପାୟନ କରିବେ ବୋଲି ସେ କହିବା ସହିତ ସରକାର, ପ୍ରଶାସନ ଓ ଜିଲ୍ଲାବାସୀ ବିଶେଷ କରି ଆଦିବାସୀ ବହୁଳ ଅଞ୍ଚଳରେ ବିକାଶମୂଳକ ବାର୍ତ୍ତା ପହଞ୍ଚାଇବାକୁ ସେ ଏକ ଯୋଗସୂତ୍ର ପାଲଟିବେ ବୋଲି ବୈଠକରେ ମତ ଉପସ୍ଥାପନ କରିଥିଲେ ! ଏଇ ଅବସରରେ ଶ୍ରୀ ମାଝୀଙ୍କୁ ଉପଦେଷ୍ଟା ତଥା ପୂର୍ବତନ ସାଂସଦ ଶ୍ରୀ ମାଝୀ ସ୍ବାଗତ ଜଣାଇବା ସହିତ ଖୁବ୍ ଶୀଘ୍ର ସେ ଜିଲ୍ଲା ଗସ୍ତରେ ଆସିବେ ବୋଲି ସୂଚନା ଦେଇଥିବା ଜଣାପଡ଼ିଛି !
ସୁଶୀଲ କୁମାର ବାଗ ଙ୍କ ରିପୋର୍ଟ
