ବିପଦ ପୂର୍ଣ୍ଣ ଅବସ୍ଥାରେ ସରବରାହ ଜୋର ବ୍ରିଜ ରାସ୍ତା
କର୍ଲାମୁଣ୍ଡା: କଳାହାଣ୍ଡି ଜିଲ୍ଲା କର୍ଲାମୁଣ୍ଡା ବ୍ଲକ ସଦର ଠାରୁ ରିଞ୍ଜା ଗ୍ରାମକୁ ସଂଯୋଗ କରୁଥିବା ଆର୍ ଡି ରାସ୍ତାର ସରବରାହ ଜୋର ବ୍ରିଜ ମଧ୍ୟ ଭାଗ ଛାତପଡି ନ ଥିବାରୁ ଅସ୍ଥାୟୀ ରାସ୍ତା ବିପଦ ପୂର୍ଣ୍ଣ ଅବସ୍ଥାରେ ପଡ଼ିରହିଛି l ଏହି ରାସ୍ତା ଦେଇ ପ୍ରତ୍ୟହ ବିଦ୍ୟାଳୟର ଛାତ୍ରଛାତ୍ରୀ ଓ ସାଧାରଣ 
ଲୋକେ କର୍ଲାମୁଣ୍ଡା ବ୍ଲକ କୁ ଯିବା ଆସିବା କରିଥାନ୍ତି l ତଥାପି ବିଭାଗ ପକ୍ଷରୁ କୌଣସି ସତର୍କତା ମୂଳକ ପଦକ୍ଷେପ ଗ୍ରହଣ କରାଯାଉ ନ ଥିବାରୁ ବିଭିନ୍ନ ମହଲରେ ଅସନ୍ତୋଷ ପ୍ରକାଶ ପାଇଛି l ବାରମ୍ବାର ଏ ନେଇ ଖବର ପ୍ରସାରଣ ପରେ ମଧ୍ୟ ପ୍ରଶାସନ ଘୋର ନିଦ୍ରା ରେ ! ଏଠାରେ ସୂଚନାଯୋଗ୍ୟ ଯେ, ଗ୍ରାମ୍ୟ ଉନ୍ନୟନ ସଂସ୍ଥା ପକ୍ଷରୁ ଟେଣ୍ଡର ଜରିଆରେ ଜନୈକ ଠିକାଦାରଙ୍କ ଦ୍ବାରା ୨କୋଟି ୭୧ ଲକ୍ଷ ୨୮ ହଜାର ୮ଶହ ଟଙ୍କା ଅଟକଳରେ ଜୁଲାଇ ୨୦୨୩ରେ ବ୍ରିଜ ନିର୍ମାଣ ଆରମ୍ଭ ହୋଇଥିଲା l ତେବେ ବର୍ଷା ସମୟରେ ବ୍ରିଜ ଛାତ ପଡ଼ି ପାରିବ ନାହିଁ ବୋଲି ବିଭାଗ ପକ୍ଷରୁ ଆଦେଶନାମା ଜାରି କରିଥିଲା l ଫଳରେ ବ୍ରିଜରେ ହେବାକୁ ଥିବା ତିନୋଟି ଛାତ ମଧ୍ୟ ରୁ ଉଭୟ ପାର୍ଶ୍ଵର ଦୁଇଟି ଛାତ ହୋଇ ପାରିଥିଲା l ଅନ୍ୟ ପଟେ ଲୋକଙ୍କ ପାଇଁ ଠିକାଦାରଙ୍କ ପକ୍ଷରୁ ୪ଫୁଟ ଓସାର ର ଅସ୍ଥାୟୀ ଲୁହା ବ୍ରିଜ ତିଆରି ହୋଇଥିବା ବେଳେ ଅସ୍ଥାୟୀ ରାସ୍ତା ବିପଦ ସୃଷ୍ଟି କରୁଛି l ଏହା ବ୍ୟତିତ ଉଭୟ ପାର୍ଶ୍ଵରେ ରାସ୍ତା ସମତଳ କରାଯାଇ ନ ଥିବାରୁ ବ୍ରିଜ ପାର ହୋଇ ରାସ୍ତା କୁ ଆସିବା ବହୁତ କଷ୍ଟକର ହୋଇପଡ଼ିଛି l
କର୍ଲାମୁଣ୍ଡାରୁ ସୁଶାନ୍ତ ରଣାଙ୍କ ରିପୋର୍ଟ, ମସୀହା
