ସରାଗୁଡାରେ ପୋଲ ଭଙ୍ଗା ଦିବସ
ଡାବୁଗାଁ, ୨୦/୮(ମ.ନି.ସ.)- ନବରଙ୍ଗପୁର ଜିଲା ଡାବୁଗାଁ ବ୍ଲକ ସରାଗୁଡ଼ା ନିକଟସ୍ଥ ସଂଗ୍ରାମୀ ସୋନୁ ମାଝି ସେବାସଂଘ ଗୃହରେ ମଙ୍ଗଳବାର ପୋଲ ଭଙ୍ଗା ଦିବସ ପାଳନ କରାଯାଇଛି | ପ୍ରଥମେ ବେଲାରି ନଦୀ କୂଳ ରେ ତିଳ ତର୍ପଣ କରାଯାଇଛି । ୧୯୪୨ ଭାରତ ଛାଡ ଆନ୍ଦୋଳନରେ ମହାତ୍ମା ଗାନ୍ଧୀଙ୍କ ଡାକରାରେ ସଂଗ୍ରାମୀ ସୋନୁ ମାଝିଙ୍କ ନେତୃତ୍ଵରେ ସରାଗୁଡ଼ା ନିକଟରେ ଥିବା ବେଲାରୀ ନଦୀ ଉପରେ ଥିବା କାଠ ପୋଲ କୁ ସ୍ୱାଧୀନତା ସଂଗ୍ରାମୀ ମାନେ ଅଗଷ୍ଟ ୨୦ ତାରିଖରେ ଭାଙ୍ଗି ଦେଇଥିଲେ । ତା ପରେ ତିନି ସହ ସ୍ଵାଧୀନତା ସଂଗ୍ରାମୀ ଗିରଫ ହୋଇଥିଲେ । ତା ପରେ ଅଗଷ୍ଟ ୨୪ ତାରିଖରେ ତୁରି ନଦୀ ଗୁଳିକାଣ୍ଡ ରେ ୧୯ ସ୍ଵାଧୀନତା ସଂଗ୍ରାମୀ ସହୀଦ ହୋଇଥିଲେ । ତେଣୁ ଅଗଷ୍ଟ ୨୦ ତାରିଖରେ ସରାଗୁଡ଼ା ରେ ପୋଲ ଭଙ୍ଗା ଦିବସ ପାଳନ କରାଯାଏ ଓ ସ୍ୱାଧୀନତା ସଂଗ୍ରାମୀ ମାନଙ୍କ ପାଇଁ ତିଳ ତର୍ପଣ କରାଯାଏ । ଆଜି ସକାଳୁ ସଂଗ୍ରାମୀ ସୋନୁ ମାଝି ସେବା ସଂଘ ଗୃହରେ ପତାକା ଉତ୍ତୋଳନ କରଯାଇଥିଲା । ତା ପରେ ସଭା କାର୍ଯ୍ୟ ଆରମ୍ଭ କରାଯାଇଥିଲା । ସେବା ସଂଘ ସମ୍ପାଦକ ସରାଦୁ ଭତ୍ରା ପ୍ରଦୀପ ପ୍ରଜ୍ଜ୍ୱଳନ କରିଥିଲେ । ଅତିଥି ଓ କର୍ମୀମାନେ ବେଲାରୀ ନଦୀ ଘାଟ କୁ ଯାଇ ସଂଗ୍ରାମୀ ମାନଙ୍କ ନିମନ୍ତେ ତିଳ ତର୍ପଣ କରିଥିଲେ । ଏହି କାର୍ଯ୍ୟକ୍ରମରେ ସେବା ସଂଘ ର କର୍ମକର୍ତ୍ତା ଓ ସରାଗୁଡ଼ା ଗ୍ରାମବାସୀ ସହଯୋଗ କରିଥିଲେ। ସରାଗୁଡା ୱାର୍ଡ ସଭ୍ୟ ସୁକଦେବ ଭତ୍ରା, ଲାଇବାନ ଭତ୍ରା, ପୁରନ ମାଝୀ, ଚୈତନ ଭତ୍ରା, ରବିସିଂ ପୂଜାରୀ, କାରମା ପୂଜାରୀ ଓ ଅନ୍ୟ ଅତିଥି ମାନଙ୍କ ମଧ୍ୟରେ ପୂର୍ବତନ ସାଂସଦ ରମେଶ ମାଝି, ମନୋରଞ୍ଜନ ତ୍ରିପାଠୀ, ବିଜେଡି ବରିଷ୍ଠ ନେତା ଏମ୍. ଅପ୍ପା ରାଓ, ବିଧାୟକ ପ୍ରତିନିଧି ଏମ୍. ବୁଲୁ ରାଓ ଉପସ୍ଥିତ ଥିଲେ।
ଡାବୁଗାଁରୁ ପ୍ରଜ୍ଞାରଞ୍ଜନ ପରିଡାଙ୍କ ରିପୋର୍ଟ
