ପରିତ୍ୟକ୍ତ ଘରର ଛାତ ଭୁଷୁଡି ୧ ନାବାଳକ ମୃତ, ୧ ନାବାଳକ ଆହତ
ଡାବୁଗାଁ, ୪/୧୨ (ମ.ନି.ସ.)- ବୁଧବାର ସକାଳେ ନବରଙ୍ଗପୁର ଜିଲା ଡାବୁଗାଁ ବ୍ଲକ ସଦର ହାଟପଦା ସାହିରେ ପରିତ୍ୟକ୍ତ ଗୃହର ଛାତ ଭୁଷୁଡି ୧ ନାବାଳକ ଙ୍କ ମୃତ୍ୟୁ ହୋଇଥିବା ବେଳେ ଜଣେ ନାବାଳକ ଆହତ ହୋଇଛି । ସୂଚନାଯୋଗ୍ୟ:- ଡାବୁଗାଁ ସଦର ମହକୁମା ହାଟପଦା ସାହିର ମହେଶ୍ଵର ଗୌଡ (୧୨) ଓ ଉମା ଜାନୀ (୧୦) ଆଜି ସକାଳୁ ହାଟପଦା ସାହିରେ ଥିବା ମୋବାଇଲ 
ଟାୱାର ପରିସରରେ ଥିବା ପରିତ୍ୟକ୍ତ ଜଗୁଆଳି ଘର କୁ କଂକ୍ରିଟ ଝରକା ର ଲୁହା ରଡ଼ ବାହାର କରିବାକୁ ଯାଇଥିବା ବେଳେ ହଠାତ ଗୃହ ଛାତ ଭୁଷୁଡି ପଡିଥିଲା | ଯାହା ଦ୍ଵାରା ମହେଶ୍ଵର ଗୌଡ ସଂପୂର୍ଣ୍ଣ ଚାପି ହୋଇଯାଇଥିଲେ ଏବଂ ଉମା ଜାନୀ ଙ୍କ ୨ ଟି ଗୋଡ ଚାପି ହୋଇଥିଲା | ଛାତ ଭୁଷୁଡି ବା ଶବ୍ଦ ସହ ପିଲା ଟିର ପାଟି ଶୁଣି କିଛି ଲୋକ ଯାଇ ଦେଖିଥିଲେ ଯେ ପିଲା ମାନେ ଚାପି ହୋଇଛନ୍ତି | ସଙ୍ଗେ ସଙ୍ଗେ ଲୋକେ ଅଗ୍ନିଶମ କେନ୍ଦ୍ରକୁ ଖବର ଦେବା ସହ ପୋଲିସ କୁ ଖବର ଦେଇଥିଲେ | ଖବରପାଇ ଅଗ୍ନିସମ କେନ୍ଦ୍ର କର୍ମଚାରୀ ମାନେ ଘଟଣାସ୍ଥଳରେ ପହଞ୍ଚି ୨ ଜଣ ନାବାଳକଙ୍କୁ ଉଦ୍ଧାର କରି ଡାବୁଗାଁ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିଲେ | ସେଠାରେ ଡାକ୍ତର ନାବାଳକ ମହେଶ୍ଵର ଗୌଡ ଙ୍କୁ ମୃତ ଘୋଷଣା କରିଥିଲେ | ନାବାଳକ ଉମା ଜାନୀ ଙ୍କ ଅବସ୍ଥା ଗୁରୁତ୍ତର ଥିବାରୁ ତାଙ୍କୁ ନବରଙ୍ଗପୁର ଜିଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି | ପରେ ଡାବୁଗାଁ ଥାନା ଆଇଆଇସି ସୁନୀଲ କୁମାର ପ୍ରଧାନ, ସବଇନିସ୍ପେକ୍ଟର ବିଜୁରାମ ବାଗ ଓ ଚନ୍ଦନ ସାହୁ, ଏଏସଆଇ ଗୋପାଳକୃଷ୍ଣ ହାଲୱା ପ୍ରମୁଖ ଘଟଣାସ୍ଥଳରେ ପହଞ୍ଚି ତଦନ୍ତ କରିଥିଲେ | ଏନେଇ ମୃତକର ପିତା ଲଛମନ ଗୌଡ ଡାବୁଗାଁ ଥାନାରେ ଏତଲା ଦେଇଥିଲେ | ଉକ୍ତ ଏତଲା କୁ ଭିତ୍ତି କରି ପୋଲିସ ଶବ ଜବତ କରି ପଞ୍ଚନାମା କରି ବ୍ୟବଚ୍ଛେଦ ପାଇଁ ପଠାଇଥିଲେ | ପରେ ଶବ ବ୍ୟବଚ୍ଛେଦ କରାଯାଇ ପରିବାର ବର୍ଗ ଙ୍କୁ ହସ୍ତାନ୍ତର କରାଯାଇଛି | ଏନେଇ ଥାନା କେସ ନଂ ୩୫/୨୪ ରେ ଏକ ଅପମୃତ୍ୟୁ ମାମଲା ରୁଜୁ କରାଯାଇଛି |
ଡାବୁଗାଁରୁ ପ୍ରଜ୍ଞାରଞ୍ଜନ ପରିଡାଙ୍କ ରିପୋର୍ଟ
