କର୍ଲାମୁଣ୍ଡା ବ୍ଲକ ବିକାଶ ପରିଷଦ ତରଫରୁ କୃଷକ ହକ ପାଇଁ ଗଣଧାରଣା
କର୍ଲାମୁଣ୍ଡା: ବର୍ତ୍ତମାନ ସମଗ୍ର କଳାହାଣ୍ଡି ଜ଼ିଲ୍ଲା ରେ ଧାନ ମଣ୍ଡୀ ଆରମ୍ଭ ହୋଇଯାଇଛି। କିନ୍ତୁ ଘରେ ନ ପଶୁଣୁ ଚାଲ ବାଜିବା ଆରମ୍ଭ ହୋଇଯାଇଛି। ପ୍ରାୟ ଅନେକ ଧାନମଣ୍ଡି ରେ ବିବାଦ ଦେଖା ଯାଇଛି। ସେହିଭଳି କର୍ଲାମୁଣ୍ଡା ବ୍ଲକ ର ସମସ୍ତ ପଂଚାୟତ ରେ ଥିବା ଧାନମଣ୍ଡୀ ମାନଙ୍କରେ ମିଲ ମାଲିକ ମାନେ ନିଜ ଏଜେଣ୍ଟ ଜରିଆରେ ଆମେ କଟନୀ ଛଟଣି ବାବଦ ୫ ରୁ ୭ କେଜି ଧାନ କାଟିଲା ପରେ ଧାନ ଉଠିବ ବୋଲି ଚାଷୀ ମାନଙ୍କୁ ଖୋଲା ଖୋଲି କହୁଥିବା ଅଭିଯୋଗ ଆସିଛି l ବିନା କଟନୀ ଛଟନୀ ରେ ଧାନ ଉଠିବ ବୋଲି ଡ଼ିଡ଼ିମ୍ବ ପିଟୁଥବା ଭାଜପା ସରକାର ପାଇଁ ଏହା ଏକ ଶକ୍ତ ଚାପୁଡ଼ା ବୋଲି ଆଲୋଚନା ହେଉଛି । ଚାଷୀଙ୍କ କହିବାନୁସାରେ ଆମର ଧାନ ସବୁ ମାନ ନିର୍ଧାରଣ କରୁଛି ତେଣୁ ଆମେ କଟନୀ ଛଟଣି କୁ ମାନିବୁନାହିଁ କି ଏହି ମିଲ ମାନଙ୍କୁ ଧାନ ଦେବୁନାହିଁ ବୋଲି ଚାଷୀ ଦୃଢ ବିରୋଧ କରି ପ୍ରତିବାଦ କରିଛନ୍ତି l କର୍ଲାମୁଣ୍ଡା ତାରିଣୀ ମନ୍ଦିର ରୁ ଶହ ଶହ ଚାଷୀ ଶୋଭାଯାତ୍ରା ବାହାରି କର୍ଲାମୁଣ୍ଡା ଗୋଷ୍ଠୀ ଉନ୍ନୟନ ଅଧିକାରୀ ସିଦ୍ଧେଶ୍ୱର ମେହେରଙ୍କୁ ଏକ ଦାବିପତ୍ର ଦେଇ ପୁଣି ତହସିଲ ଅଫିସ ପର୍ଯ୍ୟନ୍ତ ଯାଇ ତହସିଲଦାର ଙ୍କୁ ଦାବିପତ୍ର ପ୍ରଦାନ କରିଥିଲେ । ଆମେ ୨ ରୁ ୩ କେଜି ପର୍ଯ୍ୟନ୍ତ ଧାନ କଟନୀ ଛଟଣି କଲେ ଆମେ ମାନିବୁ କିନ୍ତୁ ତାଠାରୁ ଅଧିକ ହେଲେ ଆମେ ଚାଷି କୁଳ ସହିପାରିବୁ ନାହିଁ ଏହି ଗଣଧାରଣା ଅନିର୍ଦ୍ଧିଷ୍ଟ କାଳ ପର୍ଯ୍ୟନ୍ତ ଚଲେଇବୁ ବୋଲି କହିଛନ୍ତି । ଆମେ କର୍ଲାମୁଣ୍ଡା ବ୍ଲକର ଜଗଦମ୍ବା, ହରିପ୍ରିୟା ଏବଂ ବାଙ୍କୀ ବିହାରୀ ରାଇସମିଲ ପାଖରେ ଆଦ୍ୟୋ ଧାନ ବିକ୍ରୟ କରିବୁ ନାହିଁ ଏମାନଙ୍କ ବ୍ୟତୀତ ଅନ୍ୟ ମିଲ ଆମ ପ୍ୟାକ୍ସ କୁ ଦିଆଯାଉ ବୋଲି ଚାଷୀମାନେ ଦାବି କରିଛନ୍ତି । ଆଜି ନର୍ଲା ବିଧାୟକ ଙ୍କ ପ୍ରତିନିଧି ଭାବେ ନର୍ଲା ବ୍ଲକ ଅଧ୍ୟକ୍ଷ ଦୁର୍ଗାପ୍ରସାଦ ମହାନ୍ତି(ମୁନା) ଆସି ଧର୍ମଘଟ କରିଥିବା ଚାଷୀ ଙ୍କୁ ଭେଟି ତାଙ୍କର ଦାବି ଗୁଡିକ ଶୁଣିବା ସହିତ କେମିତି ସମାଧାନ ହୋଇପାରିବା ତାହାର ବିଚାର କରିଥିଲେ l ଚାଷୀଙ୍କ ସହିତ ସବୁବେଳେ ନର୍ଲା ବିଧାୟିକା ଅଛନ୍ତି, ଚାଷୀ ଆମର ପ୍ରାଣକେନ୍ଦ୍ର, ଆମେ ଚାଷୀଙ୍କ ହକ ପାଇଁ ଲଢ଼େଇକରିବୁ ବୋଲି କହିଥିଲେ ମୁନା ମହାନ୍ତି । ସ୍ଥାନୀୟ ତହସିଲଦାର ଅରୁଣ ବର୍ଗେ ଚାଷୀମାନଙ୍କ ଦାବିପତ୍ର ଗ୍ରହଣ କରି ଅଭିଯୋଗ ଆସିଥିବା ରାଇସମିଲ ମାନଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ଏବଂ ମୁଁ ମୋର ଉପରିସ୍ଥ ଅଧିକାରୀଙ୍କୁ ଏ ବାବଦରେ ଜଣାଇବି ବୋଲି କହିଥିଲେ । ଏହି ଗଣଧାରଣା ରେ କର୍ଲାମୁଣ୍ଡା ବ୍ଲକ ର ୧୨ ଟି ପଞ୍ଚାୟତ ରୁ ଶହ ଶହ ଚାଷୀ ଯୋଗ ଦେଇଥିବା ବେଳେ ଆମ ଦାବିପୂରଣ ନହେଲେ ଆନ୍ଦୋଳନ ତୀବ୍ର ହେବବୋଲି ଚାଷୀ ମାନେ ପ୍ରକାଶ କରିଛନ୍ତି l
କର୍ଲାମୁଣ୍ଡାରୁ ସୁଶାନ୍ତ ରଣାଙ୍କ ରିପୋର୍ଟ, ମସୀହା
