ସଂପର୍କ’ ଆୟୋଜିତ ଜାତୀୟ ନାଟକ ମହୋତ୍ସବର ଦ୍ୱିତୀୟ ସଂଧ୍ୟାର ନାଟକ ‘ଦଲିଆ’
ରାଉରକେଲା: ରାଉରକେଲାର ଅଗ୍ରଣୀ ନାଟ୍ୟାନୁଷ୍ଠାନ ‘ସଂପର୍କ’ ଦ୍ୱାରା ଆୟୋଜିତ ଜାତୀୟ ନାଟକ ମହୋତ୍ସବ-୨୦୨୫ ର ଦ୍ୱିତୀୟ ସଂଧ୍ୟାର ଉତ୍ସବକୁ ରାଉରକେଲା ଇସ୍ପାତ କାରଖାନାର ନିର୍ବାହୀ ନିର୍ଦ୍ଦେଶକ (ପ୍ରକଳ୍ପ) ସୁଦୀପ ପାଲ ଚୌଧୁରୀ ଉଦ୍ଘାଟନ କରିଥିଲେ । ଅନୁଷ୍ଠାନର କାର୍ଯ୍ୟକାରୀ ସଭାପତି ବିଜୟ କୁମାର ପାତ୍ରଙ୍କ ସଭାପତିତ୍ୱରେ ଅନୁଷ୍ଠିତ ଏହି ସଭାରେ ଅବସରପ୍ରାପ୍ତ ଅତିରିକ୍ତ ଶାସନ ସଚିବ ଓଡି଼ଶା ସରକାର ମନୋଜ ମାହନ୍ତି ସମ୍ମାନିତ ଅତିଥିଭାବେ 
ଯୋଗଦାନ କରିଥିଲେ । ରାଉରକେଲାର ବରିଷ୍ଠ କଳାକାର ଡ. ସତ୍ୟନାରାୟଣ ମିଶ୍ରଙ୍କୁ ‘ସଂପର୍କ’ ସମ୍ମାନରେ ସମ୍ମାନିତ କରାଯାଇଥିଲା । ଅନୁ୍ଷ୍ଠାନର ସଂଗଠନ ସଂପାଦକ ସୁରେନ୍ଦ୍ର ପାଢ଼ୀ ଧନ୍ୟବାଦ ପ୍ରଦାନ କରିଥିବା ବେଳେ ଅନିଲ ମଲ୍ଲିକ ମଂଚ ସଂଯୋଜନା କରିଥିଲେ । ସର୍ବଶ୍ରୀ ସଂଜୀବ ଚାନ୍ଦ, ପ୍ରଳୟ ଶତପଥୀ, ମାନସ ସାହୁ ଓ ପୁଷ୍ପା ବିଶୋଇ ମଂଚ ପରିଚାଳନା ରେ ସହଯୋଗ କରିଥିଲେ । ପରେ ପରେ କୋଲକାତାର ପ୍ରସିଦ୍ଧ ନାଟ୍ୟାନୁଷ୍ଠାନ ଆଇ.ଏଫ୍.ଟି.ଏ ର କଳାକାରମାନେ ରବୀନ୍ଦ୍ର ନାଥ ଟାଗୋରଙ୍କ କାହାଣୀକୁ ହୃଷିକେଶ ସୁଲଭଙ୍କ ଦ୍ୱାରା ରଚିତ ନାଟକ ‘ଦଲିଆ’ ମଂଚସ୍ଥ ହୋଇଥିଲା । ନାଟକର କାହାଣୀ ଏକ ଐତିହାସିକ ବିଷୟବସ୍ତୁ ଉପରେ ଆଧାରିତ । ପ୍ରଜାପ୍ରପୀଡ଼କ ଔରଙ୍ଗଜେବଙ୍କ ଦ୍ୱାରା ଅତ୍ୟାଚାରିତ ହୋଇ ସାହାସୁଜା ନିଜର ତିନୋଟି କନ୍ୟାଙ୍କୁ ନେଇ ଆରାଖାନା ରାଜାଙ୍କର ଆଶ୍ରିତ ହେଲେ । କିନ୍ତୁ ଆରଖାନା ରାଜା ସାହାସୁଜାଙ୍କ ସୁନ୍ଦରୀ କନ୍ୟାଙ୍କ ଉପରେ ଲୋଲୁପ ଦୃଷ୍ଟି ପଡି଼ଲା । ତେଣୁ ସାହାସୁଜା ନିଜ କନ୍ୟାମାନଙ୍କୁ ନଦୀରେ ସଲିଳ ସମାଧି ଦେବାକୁ ବାଧ୍ୟ ହେଲେ । ହେଲେ କନିଷ୍ଠା କନ୍ୟା ଅମିନା କୌଣସି ପ୍ରକାରେ ବଞ୍ଚିଯାଇ ଏକ ଅରଣ୍ୟବାସୀଙ୍କ ଗୃହରେ ଆଶ୍ରିତା ହେଲେ । କାଳକ୍ରମେ ଅମିନା ସେହି ଅତ୍ୟାଚାରୀ ଆରଖାନାଙ୍କ ସହିତ ସଂପର୍କରେ ଆସିଲେ । ଆରଖାନା ରାଜା ତାଙ୍କୁ ବିବାହ କରିବାକୁ ଇଚ୍ଛା ପ୍ରକାଶ କଲେ । ତା ପରେ ଅମିନା କିପରି ଆରଖାନା ରାଜାଙ୍କୁ ଛଳନା କରି ନିଜର ପ୍ରତିଶୋଧ ନେଇଥିଲେ ଏହି କାହାଣୀକୁ ଏକ ମାର୍ମିକ ଶୈଳୀରେ ନାଟକ ଉପସ୍ଥାପନା କରିଥିଲେ ଆଇ.ଏଫ.ଟି.ଏ, କୋଲକାତାର କଳାକାରମାନେ । ଦେବାଶିଷ ଦତ୍ତଙ୍କ ଉଚ୍ଚକୋଟୀର ନିର୍ଦ୍ଦେଶନା, ପ୍ରସନ୍ଜିତ ବନ୍ଦୋପାଧ୍ୟାୟଙ୍କ ଆଖିଝଲସା ଆଲୋକ ସଂପାତ, ସୁଚିସ୍ମିତା ରାୟଙ୍କ ଶ୍ରୁତିମଧୁର ସଂଗୀତ ସହିତ କଳାକାରମାନଙ୍କ ସୁନ୍ଦର ଅଭିନୟ ଦର୍ଶକଙ୍କୁ ମନ୍ତ୍ରମୁଗ୍ଧ କରିଥିଲା । ଆସନ୍ତା କାଲି ସମ୍ବଲପୁରର ଶ୍ରୀ କଲ୍ଚରାଲ ଆସୋସିଏସନ୍ ମଂଚନ କରିବ ସମ୍ବଲପୁରୀ ନାଟକ ‘ସାଧନା’ ।
ରାଉରକେଲା ରୁ କୁଞ୍ଜ ବିହାରି ରାଉତ ଙ୍କ ରିପୋର୍ଟ୍
