ଅଜଣା ଗାଡି ଧକ୍କାରେ ଜଣେ ମୃତ
ଡାବୁଗାଁ, ୧୩/୪ (ମ.ନି.ସ.)- ରବିବାର ସନ୍ଧ୍ୟାରେ ନବରଙ୍ଗପୁର ଜିଲା ଡାବୁଗାଁ ଥାନା ଅଧୀନ ଅର୍ଚ୍ଚିତଗୁଡା ଗ୍ରାମ ବିଦ୍ୟାଳୟ ସମ୍ମୁଖ ରେ ମୋଟରସାଇକେଲ ଦୁର୍ଘଟଣା ଘଟି ଜଣେ ମୃତ | ସୂଚନାଯୋଗ୍ୟ:- ରବିବାର ଝରିଗାଁ ବ୍ଲକ ଅଧୀନ ଦୁବିଆ ଗ୍ରାମର ଦାମୁଧର ଭତ୍ରା ( ୫୦) ଡାବୁଗାଁ ଥାନା ଅଧୀନ ସିଉନାଗୁଡା ଗ୍ରାମକୁ ଏକ ବିବାହ ଭୋଜି ରେ ଯୋଗ ଦେବାକୁ ଆସିଥିଲେ | ସେଠାରେ ଭୋଜି ଖାଇ ସନ୍ଧ୍ୟାରେ ନିଜ ଘର ଦୁବିଆ ଗ୍ରାମକୁ ମୋଟରସାଇକେଲ ନଂ ଓଡି ୨୪ କେ ୮୪୨୨ ଯୋଗେ ଫେରୁଥିବା ସମୟରେ ଅର୍ଚ୍ଚିତଗୁଡା ଗ୍ରାମ ବିଦ୍ୟାଳୟ ସମ୍ମୁଖରେ ଏକ ଅଜଣା ଗାଡି ତାଙ୍କୁ ଧକ୍କା ଦେଇଥିଲା | ଫଳରେ ଦାମୁଧର ରାସ୍ତା କଡକୁ ପଡିଯାଇ ଆହତ ହୋଇଥିଲେ | ସ୍ଥାନୀୟ ଲୋକେ ଦାମୁଧର ଙ୍କୁ ଆମ୍ବୁଲାନ୍ସ ଯୋଗେ ଡାବୁଗାଁ ସ୍ୱାସ୍ଥ୍ୟ କେନ୍ଦ୍ରକୁ ପଠାଇଥିଲେ | ଡାକ୍ତରଖାନା ରେ ଡାକ୍ତର ଯାଞ୍ଚ କରି ଦାମୁଧର ଙ୍କୁ ମୃତ ଘୋଷଣା କରିଥିଲେ | ଖବରପାଇ ଥାନା ଏଏସଆଇ ଗୋପାଳକୃଷ୍ଣ ହାଲୱା ଘଟଣା ସ୍ଥଳରେ ପହଞ୍ଚି ଦୁର୍ଘଟଣାଗ୍ରସ୍ତ ମୋଟର ସାଇକେଲ ଜବତ କରି ଥାନା କୁ ଆଣିଥିଲେ | ଏନେଇ ମୃତକ ର ପୁଅ ପଦୁରାମ ଭତ୍ରା ଡାବୁଗାଁ ଥାନାରେ ଏତଲା ଦେଇଛନ୍ତି | ଉକ୍ତ ଏତଲାକୁ ଭିତ୍ତି କରି ଥାନା କେସ ନଂ ୭୬/୨୫ ରେ ଏକ ମାମଲା ରୁଜୁ କରାଯାଇଛି | ସୋମବାର ସକାଳେ ଶବ ବ୍ୟବଚ୍ଛେଦ କରାଯାଇ ପରିବାର ବର୍ଗଙ୍କୁ ହସ୍ତାନ୍ତର କରାଯିବ |
ଡାବୁଗାଁ ରୁ ପ୍ରଜ୍ଞାରଞ୍ଜନ ପରିଡାଙ୍କ ରିପୋର୍ଟ
