ଓଡ଼ିଶା ପ୍ରଶାସନିକ ସେବାରେ ଉତ୍ତୀର୍ଣ୍ଣ ମୋନାଲିସାଙ୍କୁ ସମ୍ବର୍ଦ୍ଧିତ କଲା ମୋ ଅନୁଷ୍ଠାନ ସାହିତ୍ୟ ସଂସଦ
ଖଇରା,୨୭/୯/୨୫ – ବାଲେଶ୍ଵର ଜିଲ୍ଲା ଖଇରା ବ୍ଲକ ସାରୁଗାଁ ପଞ୍ଚାୟତ କାକୁଡିଆ ଗ୍ରାମର ମୋନାଲିସା ରାଉତ ଓଡ଼ିଶା ପ୍ରଶାସନିକ ସେବା ପରୀକ୍ଷାରେ ସଫଳତାର ସହିତ ଉତ୍ତୀର୍ଣ୍ଣ ହୋଇ ବ୍ଲକ, ଜିଲ୍ଲା ତଥା ଓଡ଼ିଶାର ଗୌରବ ବୃଦ୍ଧି କରିଛନ୍ତି । ଏଖବର ପ୍ରଚାରିତ ହେବାପରେ କାକୁଡ଼ିଆ ସ୍ଥିତ ସୁଶ୍ରୀ ମୋନାଲିସାଙ୍କ ଘରକୁ ଶୁଭେଚ୍ଛୁଙ୍କ ସୁଅ ଛୁଟିବାରେ ଲାଗିଛି । ବିଭିନ୍ନ ସଂଗଠନ, ଅନୁଷ୍ଠାନ ତାଙ୍କ ଘରେ ପହଞ୍ଚି ଶୁଭେଚ୍ଛା ଜଣାଉଛନ୍ତି । ଏହି ପରିପ୍ରେକ୍ଷୀରେ ଖଇରା ଠାରେ ଗଢି ଉଠିଥିବା ” ମୋ ଅନୁଷ୍ଠାନ ସାହିତ୍ୟ ସଂସଦ ” ର ସଭାପତି କୁଞ୍ଜଲତା ମାହୁଁନ୍ତ, ସମ୍ପାଦକ ନରେନ୍ଦ୍ର ପ୍ରସାଦ ବେହେରା, ସଦସ୍ୟ ଜଗବନ୍ଧୁ ବାରିକ୍ ଓ ଯୋଗଗୁରୁ ମୁକ୍ତିକାନ୍ତ ପାଣିଗ୍ରାହୀ ତାଙ୍କ ଘରେ ପହଞ୍ଚି ସଫଳତାର ବିଭିନ୍ନ ଦିଗ ଉପରେ ଆଲୋଚନା କରିବା ସହିତ ପ୍ରଶଂସା ପତ୍ର, ପୁଷ୍ପଗୁଚ୍ଛ ଓ ଉତ୍ତରୀୟ ଦେଇ ସମ୍ବର୍ଦ୍ଧିତ କରିଥିଲେ । ପରେପରେ ପରିବାର ବର୍ଗଙ୍କୁ ମିଷ୍ଟାନ୍ନ ଖୁଆଇ ଖୁସି କରାଇଥିଲେ । ବାପା ରମାକାନ୍ତ ରାଉତ ଜଣେ ଶିକ୍ଷକ ଓ ମାଆ ମଧୁସ୍ମିତା ରାଉତ ଜଣେ ସୁ-ଗୃହିଣୀ ଅଟନ୍ତି । ତାଙ୍କ ଠାରୁ ମଧ୍ୟ ଝିଅର ସଫଳତା ଓ ଆଗାମୀ ଲକ୍ଷ୍ୟ ବିଷୟରେ 
ପଚାରି ବୁଝିଥିଲେ । ସୁଶ୍ରୀ ମୋନାଲିସା ଗ୍ରାମ ବିଦ୍ୟାଳୟରୁ ୫ମ ଶ୍ରେଣୀ ପାସ୍ କଲା ପରେ ବାଗୁଡି ନବୋଦୟ ବିଦ୍ୟାଳୟରେ ପଢିଥିଲେ । ସେଠାରୁ ସଫଳତାର ସହିତ ପାସ୍ କଲାପରେ କଟକ ରେଭେନ୍ସା ଯାଇଥିଲେ ପଢିବା ପାଇଁ । ତାଙ୍କର ଏହି ସଫଳତା ପଥ ବହୁ ବାଧାବିଘ୍ନ ପୂର୍ଣ୍ଣ ଥିଲା । ତଥାପି ସୁଶ୍ରୀ ମୋନାଲିସା କୌଣସି ବାଧାବିଘ୍ନକୁ ଖାତିରି ନ କରି ନିଜର ଅଧ୍ଯୟନ ଜାରି ରଖିଥିଲେ । ଯାହା ତାଙ୍କୁ ଏ ସଫଳତା ଆଣିଦେଇଛି । ଆଗକୁ ଆଇ.ଏ.ଏସ. ହେବା ପାଇଁ ଲକ୍ଷ୍ୟ ରଖିଛନ୍ତି ସୁଶ୍ରୀ ମୋନାଲିସା । ବଣମଲ୍ଲି ବଣରେ ଫୁଟି ଝରିପଡେ କିନ୍ତୁ ତା ବାସ୍ନା କାହା ପାଖରେ ପହଞ୍ଚି ପାରେନାହିଁ, ହେଲେ ନିପଟ ମଫସଲ ଗାଁର ଝିଅ ଦିନେ ଫୁଲପରି ବାତ୍ସ୍ନାୟିତ ହୋଇ ମହକି ଉଠିବ ଜାଣିଥିଲା କିଏ ? କେବଳ ନିଜ ଅଞ୍ଚଳ କି ଜିଲ୍ଲାରେ ନୁହେଁ ଓଡ଼ିଶାରେ ନିଜର ପରିଚୟ ସୃଷ୍ଟି କରିପାରିଛନ୍ତି । ଅଞ୍ଚଳକୁ ଗୌରବ ଆଣିଦେଇ ଥିବାରୁ ଅଞ୍ଚଳବାସୀ ଶୁଭେଚ୍ଛା ଜଣାଇବା ସହିତ ଆଗାମୀ ଚଲାପଥ କୁସୁମିତ ନିମନ୍ତେ ଶ୍ରୀଜଗନ୍ନାଥଙ୍କ ନିକଟରେ ପ୍ରାର୍ଥନା କରି ଫେରିଛି ମୋ ଅନୁଷ୍ଠାନ ।।
ବାଲେଶ୍ଵରରୁ ନରେନ୍ଦ୍ର ପ୍ରସାଦ ବେହେରାଙ୍କ ରିପୋର୍ଟ
