ବିଭିନ୍ନ ଗଣମାଧ୍ୟମରେ ପ୍ରକାଶ ପାଇବା ପରେ ପୋଲିସକୁ ମିଳିଲା ବଡ ସଫଳତା , ଲୁଟେରା ସମେତ କବାଡିଆ ଦୋକାନୀ ଓ ତାଙ୍କ ପୁଅ ଗିରଫ
ହିଞ୍ଜିଳିକାଟୁ, ତା ୨୦/୪ ଗଞ୍ଜାମ ଜିଲ୍ଲା ହିଞ୍ଜିଳିକାଟୁ ପୌରାଞ୍ଚଳରେ ଗତ କିଛି ଦିନ ହେବ ବିଭିନ୍ନ ସରକାରୀ କାର୍ଯ୍ୟାଳୟ ଓ ବିଭିନ୍ନ ବାସଗୃହରେ ଲାଗିଥିବା ଏସିରୁ ତମ୍ବା ପାଇପ୍ ଓ ବିଦ୍ୟୁତ୍ ତାର କାଟି ଲୁଟ୍ ଘଟଣା ବିଭିନ୍ନ ଗଣମାଧ୍ୟମରେ ପ୍ରକାଶ ପାଇବା ପରେ ହିଞ୍ଜିଳି ପୁଲିସ କୁ ମିଳିଛି ବଡ ସଫଳତା । ଲଗାତାର ଏଭଳି ଲୁଟ୍ ଘଟଣା ପୁଲିସ ପାଇଁ ମୁଣ୍ଡବ୍ୟଥାର କାରଣ ପାଲଟିଥିଲା । ଘନ ଘାଇଁ ତଦନ୍ତ ପରେ ଲୁଟ୍ ଆଉ ଚୋରି ଘଟଣାରେ ହିଞ୍ଜିଳି ପୋଲିସ ଲୁଟେରାଙ୍କ ସମେତ ଚୋରୀ ସାମଗ୍ରୀ କିଣିବା ଅଭିଯୋଗରେ କବାଡିଆ ଦୋକାନୀ ମାଲିକ ଓ ତାଙ୍କ ପୁଅକୁ ଗିରଫ କରିଛି । ଗିରଫ ଅଭିଯୁକ୍ତ ମାନେ ହେଲେ ହିଞ୍ଜିଳି ଥାନା ତଥା ପୌରାଞ୍ଚଳ ଲକ୍ଷ୍ମୀ ବଜାର ଅଞ୍ଚଳର ମନୋଜ ଦାସ (୨୬) ଓ ଚୋରୀ ସାମଗ୍ରୀ କିଣିବା ଅଭିଯୋଗରେ କବାଡିଆ ଦୋକାନୀ ମାଲିକ ସ୍ଥାନୀୟ ପୌରାଞ୍ଚଳ ବଇଞ୍ଚବଣିଆ ମାଷ୍ଟ୍ର କଲୋନୀର ମନୋଜ କୁମାର ସାହୁ ଓରଫ ମୁନା (୫୬) ଓ ତାଙ୍କ ପୁଅ କିରଣ କୁମାର ସାହୁ (୨୨) ବୋଲି ସୂଚନା ମିଳିଛି । ଗିରଫ ଲୁଟେରା ଓ କବାଡିଆ ଦୋକାନୀ ମାଲିକଙ୍କ ଠାରୁ ଏସିରେ ବ୍ୟବହୃତ ତମ୍ବା ପାଇପ୍, ୨ଟି ସିସିଟିଭି କ୍ୟାମେରା, ୧ ବଣ୍ଡଲ ଆଲୁମିନିୟମ୍ ତାର, ବିଦ୍ୟୁତ୍ ତାର, ମୋବାଇଲ ଫୋନ୍ ସମେତ ବହୁ ପରିମାଣରେ ତମ୍ଭା ଓ ଲୁହା ସାମଗ୍ରୀ ଜବତ କରାଯାଇଛି । ତେବେ ଏନେଇ ହିଞ୍ଜିଳି ଥାନାରେ ୨୩୭/୨୬ ରେ ଏକ ମାମଲା ରୁଜୁ କରି ରବିବାର ୩ ଜଣକ ଅଭିଯୁକ୍ତ ମାନଙ୍କୁ କୋର୍ଟ୍ ଚାଲାଣ କରାଯାଇଥିବା ଥାନା ଆଇଆଇସି ଶ୍ରୀନିବାସ ସେଠୀ ମତ ପ୍ରକାଶ କରିଛନ୍ତି ।
