ଆଜିର ଦିବସର ଅନୁଚିନ୍ତା : ଏପ୍ରିଲ୍ ୨୩ ତାରିଖ: ଜ୍ଞାନ,ଭାଷା ଓ ମାନବୀୟ ଚେତନାର ଏକ ପୁଣ୍ୟ ତିଥି
ଡ଼ା. ଦେବୀ ପ୍ରସାଦ ମିଶ୍ର,
କାଳର ଅବିରତ ପ୍ରବାହରେ କିଛି ତାରିଖ ମାତ୍ର ସମୟର ସୂଚକ ହେଇ ରହି ନଥାଏ,ସେମାନେ ମାନବ ସଭ୍ୟତାର ଚେତନାକୁ ଆଲୋକିତ କରୁଥିବା ଦୀପଶିଖାର ଭୂମିକା ନିବାହ କରେ।ଏପ୍ରିଲ୍ ୨୩ ତାରିଖ କେବଳ କ୍ୟାଲେଣ୍ଡରର ଏକ ପୃଷ୍ଠା ନୁହେଁ,ବରଂ ଏହା ମାନବ ସଭ୍ୟତାର ବୌଦ୍ଧିକ ଓ ସାଂସ୍କୃତିକ ବିଭବର ଏକ ଜୀବନ୍ତ ସ୍ମାରକୀ।ଆଜିର ଦିନଟି ବିଶ୍ୱ ଇତିହାସରେ ଏକ ସ୍ୱତନ୍ତ୍ର ସ୍ଥାନ ଅଧିକାର କରିଛି,ଯାହା ଜ୍ଞାନର ଗଭୀରତା,ସାହିତ୍ୟ ଓ ଭାଷାର ମାଧୁର୍ଯ୍ୟ ଓ ଗୌରବକୁ ସ୍ମରଣ କରାଏ।ଆଜି ସମଗ୍ର ବିଶ୍ୱରେ ‘ବିଶ୍ୱ ପୁସ୍ତକ ଓ ସତ୍ତ୍ୱାଧିକାର ଦିବସ’ ପାଳିତ ହେଉଛି।ୟୁନେସ୍କୋ ଦ୍ୱାରା ପ୍ରତିଷ୍ଠିତ ଏହି ଦିବସ ପୁସ୍ତକ ପଠନର ଗୁରୁତ୍ୱ ଓ ଲେଖକମାନଙ୍କ ଅଧିକାରକୁ ସମ୍ମାନ ଜଣାଏ।ଏହା ସହିତ ଆଜି ହେଉଛି ‘ଇଂରାଜୀ ଭାଷା ଦିବସ’ ଏବଂ ‘ସ୍ପାନିଶ୍ ଭାଷା ଦିବସ’।ଆମକୁ ପୁସ୍ତକର ମହତ୍ତ୍ୱ ଓ ସୃଜନଶୀଳତାର ସୁରକ୍ଷା ବାବଦରେ ସଚେତନ କରେ।ଏହି ଦିନରେ ଇଂରାଜୀ ଓ ସ୍ପାନିଶ୍ ଭାଷାର ସମ୍ମାନ ମଧ୍ୟ ଆମକୁ ଭାଷାର ବିଶ୍ୱବ୍ୟାପୀ ସଂଯୋଗ ଶକ୍ତିର ଅନୁଭୂତି କରାଏ।ସାହିତ୍ୟ ଆକାଶର ଦୁଇ ମହାନ ନକ୍ଷତ୍ର—ୱିଲିୟମ୍ ସେକ୍ସପିୟର ଓ ମିଗୁଏଲ୍ ଡି ସର୍ଭାଣ୍ଟେସ୍ଙ୍କ ସ୍ମୃତି ଏହି ଦିନକୁ ଅଧିକ ଗରିମାମୟ କରିଛି।ତାଙ୍କର କୃତି ମାନବୀୟ ଭାବନାର ସାର୍ବଜନୀନତାକୁ ଉଜାଗର କରିଥାଏ।ସେକ୍ସପିୟରଙ୍କ ଜନ୍ମ ଓ ମୃତ୍ୟୁ ଉଭୟ ଏହି ଦିବସରେ ହୋଇଥିବାରୁ ଏହା ସାରସ୍ୱତ ଜଗତ ପାଇଁ ଏକ ଅନନ୍ୟ ସଂଯୋଗ।
ଭାରତୀୟ ପରିପ୍ରେକ୍ଷୀରେ ଭାରତୀୟ ସିନେମା ଜଗତର ବିଶ୍ୱବନ୍ଦିତ ନିର୍ଦ୍ଦେଶକ,ଭାରତ ରତ୍ନ ସତ୍ୟଜିତ୍ ରାୟଙ୍କର ଆଜି ତିରୋଧାନ ଦିବସ।ତାଙ୍କର କଳାତ୍ମକ ଦୂରଦୃଷ୍ଟି ଭାରତୀୟ ଚଳଚ୍ଚିତ୍ରକୁ ବିଶ୍ୱ ଦରବାରରେ ଏକ ନୂତନ ପରିଚୟ ଦେଇଥିଲା।ସେହିପରି ମହିଳା ଶିକ୍ଷା ଓ ସଂସ୍କାର କ୍ଷେତ୍ରରେ ପଥପ୍ରଦର୍ଶକ ପଣ୍ଡିତା ରମାବାଇଙ୍କ ଜନ୍ମ ଆଜିର ଦିନରେ ହୋଇଥିଲା,ଯାହା ମହିଳା ସଶକ୍ତିକରଣର ବାର୍ତ୍ତା ବହନ କରେ ଓ ନାରୀ ଶିକ୍ଷାର ଜ୍ୟୋତିକୁ ଉଜ୍ଜ୍ୱଳ କରେ।
ଓଡ଼ିଶାର ରାଜନୈତିକ ଇତିହାସରେ ପୂର୍ବତନ ମୁଖ୍ୟମନ୍ତ୍ରୀ ସଦାଶିବ ତ୍ରିପାଠୀଙ୍କ ଜୟନ୍ତୀ ଆମକୁ ଜନସେବା ଓ ସରଳ ଜୀବନଯାପନର ପ୍ରେରଣା ଦିଏ।ବିଜ୍ଞାନ ଓ ଗଣିତର ଜୟଯାତ୍ରା ମଧ୍ୟରେ ଆଜିର ଦିନଟି ବୌଦ୍ଧିକ ପ୍ରଗତିର ଏକ ପ୍ରତୀକ।ଆଜିର ଦିନ ଆମ ପାଇଁ ଏକ ଆହ୍ୱାନ।ଏହିଦିନଠାରୁ ପୁସ୍ତକ ସହିତ ସମ୍ପର୍କକୁ ଗାଢ଼ କରିବା,ଭାଷାକୁ ସମ୍ମାନ କରିବା ଓ ଜ୍ଞାନକୁ ଜୀବନର ମୂଳ ଆଧାର କରିବା ଦରକାର।ଜ୍ଞାନ ହେଉଛି ମୁକ୍ତିର ପଥ ଏବଂ ପୁସ୍ତକ ହେଉଛି ସେହି ପଥର ଅମର ପ୍ରଦୀପ।ଜ୍ଞାନ ହିଁ ପ୍ରକୃତ ଶକ୍ତି ଏବଂ ପୁସ୍ତକ ହିଁ ତା’ର ଶ୍ରେଷ୍ଠ ବାହକ।ପୁସ୍ତକ ମାନବ ଜୀବନର ନିରବ ଗୁରୁ।ଏହା ଚିନ୍ତାକୁ ପରିପକ୍ୱ କରେ,ମନକୁ ଶୁଦ୍ଧ କରେ ଓ ସମାଜକୁ ଦିଗନିର୍ଦ୍ଦେଶ ଦିଏ।ଆଜିର ଏହି ଶୁଭ ଅବସରରେ ଆସନ୍ତୁ ଆମେ ସମସ୍ତେ ପୁସ୍ତକ ପଠନକୁ ନିଜର ଏକ ଅଭ୍ୟାସରେ ପରିଣତ କରିବା ଏବଂ ମହାନ ବ୍ୟକ୍ତିତ୍ୱଙ୍କ ଆଦର୍ଶରେ ଏକ ଜ୍ଞାନଭିତ୍ତିକ ସମାଜ ଗଠନ ପାଇଁ ସଙ୍କଳ୍ପବଦ୍ଧ ହେବା।
ଡ଼ା. ଦେବୀ ପ୍ରସାଦ ମିଶ୍ର,
✉️ debisirscience@gmail.com
/ debiprasadmishra085@gmail.com
