ବାସୁଦେବପୁର ଜନ କଲ୍ୟାଣ ପରିଷଦ ଆନୁକୂଲ୍ୟରେ ବାଞ୍ଛାନିଧି ମହାନ୍ତିଙ୍କ ଜୟନ୍ତୀ ପାଳିତ
ରାଉରକେଲା, ୨୬/୦୪/୨୬.– ଓଡ଼ିଶାର ସ୍ଵାଧୀନତା ସଂଗ୍ରାମ ଇତିହାସରେ ଜାତୀୟ କବି ବାଞ୍ଛାନିଧି ମହାନ୍ତି ଏକ ଅନନ୍ୟ ଏବଂ ଅବିସ୍ମରଣୀୟ ନାମ। ଜଣେ ବିପ୍ଳବୀ କବି ଭାବରେ ସେ ତାଙ୍କର ଲେଖନୀ ଓ କଣ୍ଠ ସାହାଯ୍ୟରେ ଓଡ଼ିଶାର ଜନମାନସରେ ଯେଉଁ ଦେଶପ୍ରେମର ଜୁଆର ସୃଷ୍ଟି କରିଥିଲେ, ତାହା ଭାରତୀୟ ସ୍ଵାଧୀନତା ଆନ୍ଦୋଳନକୁ ବେଶ୍ ଶକ୍ତିଶାଳୀ କରିଥିଲା।
ବାଞ୍ଛାନିଧି ମହାନ୍ତିଙ୍କର ସବୁଠାରୁ ବଡ଼ ଅସ୍ତ୍ର ଥିଲା ତାଙ୍କର ସଂଗୀତ। ସେ ନିଜେ ଗୀତ ରଚନା କରୁଥିଲେ ଏବଂ ଗ୍ରାମକୁ ଗ୍ରାମ ବୁଲି ଓଜସ୍ଵିନୀ କଣ୍ଠରେ ସେଗୁଡ଼ିକୁ ଗାନ କରୁଥିଲେ। ତାଙ୍କର ଗୀତ ଶୁଣିଲେ ସାଧାରଣ ଜନତାଙ୍କ ମଧ୍ୟରେ ଦେଶ ପାଇଁ ବଳିଦାନ ଦେବାର ଉତ୍ସାହ ଭରି ଯାଉଥିଲା।
୧୯୨୧ ମସିହାରେ ମହାତ୍ମା ଗାନ୍ଧୀଙ୍କ ଆହ୍ୱାନରେ ଯେତେବେଳେ ଅସହଯୋଗ ଆନ୍ଦୋଳନ ଆରମ୍ଭ ହେଲା, ବାଞ୍ଛାନିଧି ସେଥିରେ ସକ୍ରିୟ ଭାବେ ଝାସ ଦେଇଥିଲେ। ସେ ସରକାରୀ ଚାକିରୀ ପ୍ରତ୍ୟାଖ୍ୟାନ କରିବା ସହ ଲୋକମାନଙ୍କୁ ବିଦେଶୀ ବସ୍ତ୍ର ବର୍ଜନ ଓ ସ୍ଵଦେଶୀ ଜିନିଷ ଆପଣେଇବା ପାଇଁ ପ୍ରେରିତ କରିଥିଲେ।
ଭଦ୍ରକ ଜିଲ୍ଲାର ଇରମ, ବାସୁଦେବପୁର ପ୍ରଭୃତି ଅଞ୍ଚଳରେ ସ୍ଵାଧୀନତା ଆନ୍ଦୋଳନକୁ ସଂଗଠିତ କରିବାରେ ତାଙ୍କର ପ୍ରମୁଖ ଭୂମିକା ଥିଲା। ତାଙ୍କ ପ୍ରେରଣାରେ ଅନେକ ଯୁବକ ସଂଗ୍ରାମରେ ଯୋଗ ଦେଇଥିଲେ, ଯାହା ପରବର୍ତ୍ତୀ ସମୟରେ ଇରମର ରକ୍ତତୀର୍ଥ ଘଟଣାରେ ପ୍ରତିଫଳିତ ହୋଇଥିଲା।
ନିଜର ବିପ୍ଳବାତ୍ମକ କାର୍ଯ୍ୟକଳାପ ପାଇଁ ସେ ବହୁବାର ଇଂରେଜ ସରକାରଙ୍କ କ୍ରୋଧର ଶିକାର ହୋଇଥିଲେ ଏବଂ କାରାବରଣ କରିଥିଲେ। ଜେଲ୍ରେ ଥିବା ସମୟରେ ମଧ୍ୟ ସେ ଦେଶାତ୍ମବୋଧକ କବିତା ଲେଖିବା ବନ୍ଦ କରିନଥିଲେ।
ବାଞ୍ଛାନିଧି ମହାନ୍ତି କେବଳ ଜଣେ କବି ନଥିଲେ, ସେ ଥିଲେ ଜଣେ ଯୁଗସ୍ରଷ୍ଟା ସଂଗ୍ରାମୀ। ତାଙ୍କୁ ‘ଜାତୀୟ କବି’ ଉପାଧିରେ ସମ୍ମାନିତ କରାଯାଇଥିଲା, କାରଣ ସେ ତାଙ୍କର ସାହିତ୍ୟକୁ ଦେଶମାତୃକାର ସେବାରେ ସମ୍ପୂର୍ଣ୍ଣ ଭାବେ ଉତ୍ସର୍ଗ କରିଥିଲେ। ଓଡ଼ିଶାର ସ୍ଵାଧୀନତା ଇତିହାସରେ ତାଙ୍କର ନାମ ସ୍ଵର୍ଣ୍ଣାକ୍ଷରରେ ଲିପିବଦ୍ଧ ହୋଇ ରହିବ।
ସେହି ଯୋଗ ଜନ୍ମା କବିଙ୍କର ୧୨୯ତମ ଜୟନ୍ତୀ ରାଉରକେଲାର ବିଶିଷ୍ଟ ସାହିତ୍ୟ-ସମାଜସେବୀ ଅନୁଷ୍ଠାନ ‘ବାସୁଦେବପୁର ଜନକଲ୍ୟାଣ ପରିଷଦ ‘ ଆନୁକୂଲ୍ୟରେ ସେକ୍ଟର – ୨୦ ଠାରେ ପାଳିତ ହୋଇଯାଇଛି। ବରିଷ୍ଠ ଉପସଭାପତି ଡା. ରବୀନ୍ଦ୍ର କୁମାର ପଣ୍ଡାଙ୍କ ସଭାପତିତ୍ୱରେ ଅନୁଷ୍ଠିତ ଏହି ସଭାରେ ସାଧାରଣ ସମ୍ପାଦକ ଲକ୍ଷ୍ମଣ ନାଥ ଦାସ ସ୍ବାଗତ ଭାଷଣ ସହ କବିଙ୍କ ଜୀବନୀ ସମ୍ପର୍କରେ ଆଲୋକପାତ କରିଥିଲେ। ଅନ୍ୟତମ ଉପସଭାପତି ଉଦୟ କୁମାର ସାହୁ, କୋଷାଧ୍ୟକ୍ଷ ବିଶ୍ବନାଥ ସାହୁ, ସହ ସମ୍ପାଦକ ସନାତନ ପତି, ଉପେନ୍ଦ୍ର ପ୍ରସାଦ ଦାଶ, ସତ୍ୟଜିତ୍ ସାହୁ, ପ୍ରବୀର କୁମାର ପାଢ଼ୀ, ପ୍ରମୁଖ କବିଙ୍କର ସ୍ମୃତି ଚାରଣ ସହ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ। ଯୁଗ୍ମ ସମ୍ପାଦକ ଶରତ କୁମାର ଦାସ ପ୍ରାରମ୍ଭିକ ସୂଚନା ପ୍ରଦାନ ସହ ମଞ୍ଚ ପରିଚାଳନା କରିଥିଲେ। ଶେଷରେ ସଭାପତି ଡା. ପଣ୍ଡା ସମସ୍ତଙ୍କୁ ଧନ୍ୟବାଦ ଅର୍ପଣ କରିଥିଲେ। ଏହି କାର୍ଯ୍ୟକ୍ରମରେ ଜ୍ୟୋତିର୍ମୟୀ ପତି, ସୁକାନ୍ତି ଲତା ପାଢ଼ୀ, ଲାବଣ୍ୟ ପାଢ଼ୀ, ନିବେଦିତା ସାହୁ, ସଦାପ୍ରିୟ ପତି ପ୍ରମୁଖ ସହାୟତା କରିଥିବାବେଳେ ବହୁ ସଦସ୍ୟ, ସଦସ୍ୟା ଯୋଗ ଦେଇଥିଲେ।
କୁଞ୍ଜ ବିହାରି ରାଉତ ଙ୍କ ରିପୋର୍ଟ୍
