ଭୁବନ ଗ୍ୟାରେଜରୁ ୧୫ ଟି ଚୋରା ବାଇକ୍ ଉଦ୍ଧାର,୩ ଗିରଫ
କାମାକ୍ଷାନଗର – ଢେ଼ଙ୍କାନାଳ ଟାଉନ୍ ଥାନା ପୋଲିସ କୁ ବଡ ସଫଳତା ମିଳିଛି। ଭୁବନ ଏନ୍ ଏ ସି ଅନ୍ତର୍ଗତ ରଗଡ଼ି ଛକରେ ଥିବା ଏକ ଗ୍ୟାରେଜ ରୁ ୧୫ ଟି ଚୋରା ମଟର ସାଇକେଲ ଜବତ କରାଯାଇଥିବା ଜଣାପଡ଼ିଛି । ଦିନକୁ ଦିନ ବାଇକ ଚୋରି ବଢିବାରେ ଲାଗିଥିଲା । ଭୁବନର ତିନିଜଣ ଯୁବକ ବିଭିନ୍ନ ସ୍ଥାନରୁ ଗାଡ଼ି ଚୋରି କରି ସିଧା ଭୁବନ ନେଇଆସି ଏକ ଗ୍ୟାରେଜ ରେ ଖୋଲା ଖୋଲି କରି କିଛି ଦିନ ପରେ ସମୟ ସୁବିଧା ଦେଖି ବିକ୍ରି କରି ଦେଉଥିଲେ । ଏ ସମ୍ପର୍କରେ କୌଣସି ସୂତ୍ରରୁ ଖବରପାଇ ଢେଙ୍କାନାଳ ଟାଉନ୍ ଥାନା ପୋଲିସ ବୁଧବାର ଭୁବନ ବିଜ୍ଞାପିତ ଅଞ୍ଚଳ ପରିଷଦର ରଗଡି ଛକ ନିକଟ ଏକ ବାଇକ୍ ଗ୍ୟାରେଜରେ ଚଢାଉ କରିଥିଲେ । ଗ୍ୟାରେଜରୁ ପନ୍ଦରଟି ଚୋରା ବାଇକ ଜବତ କରିବା ସହିତ ତିନିଜଣଙ୍କୁ ଗିରଫ କରିଥିଲା । ଗିରଫ ତିନି ଜଣ ମଧ୍ୟରେ ଗ୍ୟାରେଜ ମାଲିକ ଗୌରାଙ୍ଗ ବିହାରୀ ଙ୍କ ପୁତ୍ର ମାନସ ବିହାରୀ , ମଙ୍ଗୁଳି ସାହୁ ଙ୍କ ପୁତ୍ର ପ୍ରଫୁଲ୍ଲ ସାହୁ ଓ ଭରତ ଚନ୍ଦ୍ର ଶୁକ୍ଳା ଙ୍କ ପୁଅ ଜ୍ୟୋତିଷ ଶୁକ୍ଳା ସମସ୍ତେ ଭୁବନ ଏନ୍ ଏ ସି ବାସିନ୍ଦା ବୋଲି ଜଣାପଡିଛି। ସମସ୍ତ ଚୋରା ବାଇକ ଟାଉନ ଥାନାକୁ ନିଆଯାଇଛି ।
ପ୍ରହ୍ଲାଦ ମୁଦୁଲି ଙ୍କ ରିପୋର୍ଟ୍
