ବୃଦ୍ଧ ଙ୍କ ଆତ୍ମହତ୍ୟା
ଡାବୁଗାଁ, ୧୩/୫ (ମ.ନି.ସ.)- ନବରଙ୍ଗପୁର ଜିଲା ଡାବୁଗାଁ ଥାନା ଅଧୀନ ଚାଟିଗୁଡା ଗ୍ରାମରେ ଜଣେ ବୃଦ୍ଧ ଆତ୍ମହତ୍ୟା କରିଥିବା ନେଇ ବୁଧବାର ଡାବୁଗାଁ ଥାନାରେ ଅଭିଯୋଗ ହୋଇଛି | ସୂଚନାଯୋଗ୍ୟ:- ଡାବୁଗାଁ ଥାନା ଅଧୀନ ଚାଟିଗୁଡା ଗ୍ରାମର ପଦମ ହରିଜନ (୫୦) ଙ୍କୁ ୭ ତାରିଖ ଦିନ ଗ୍ରାମରେ ଗୁଳୁଥିବା ବେଳେ ଏକ ପାଗଳ କୁକୁର କାମୁଡି ଦେଇଥିଲା | କୁକୁର କାମୁଡିବା ପରେ ପରିବାର ଲୋକେ ତାଙ୍କର ଚିକିତ୍ସା କରାଇଥିଲେ | ୨ ଦିନ ପରେ ପଦ୍ମ ଙ୍କର ମାନସିକ ବିକୃତ ଦେଖାଦେଇଥିଲା | ପଦମ ବାରମ୍ବାର ଆତ୍ମହତ୍ୟା କରିବାକୁ ଉଦ୍ୟମ କରୁଥିଲେ | ମଙ୍ଗଳବାର ସନ୍ଧ୍ୟାରେ ପଦମ ହରିଜନ ଗ୍ରାମ ପାଖରେ ଥିବା କାଜୁ ବଗିଚାକୁ ଯାଇ ଏକ କାଜୁ ଗଛରେ ଚଢିବା ସମୟରେ ଗ୍ରାମର କିଛି ଲୋକେ ଦେଖି ତାଙ୍କ ପରିବାର ଲୋକଙ୍କୁ ଖବର ଦେଇଥିଲେ | ଖବରପାଇ ପରିବାରଲ ଲୋକେ ଆସି ଦେଖିବା ବେଳକୁ ପଦମ ନିଜର ପିନ୍ଧିଥିବା ଲୁଙ୍ଗି ବେକରେ ବାନ୍ଧି ଆତ୍ମହତ୍ୟା କରିବାକୁ ଉଦ୍ୟମ କରୁଛନ୍ତି | ପରିବାର ଲୋକ ଙ୍କୁ ଦେଖି ଗଛ ଡାଳରୁ ତଳକୁ ଝୁଲି ପଡିଥିଲେ | ପରିବାର ଲୋକେ ଗ୍ରାମବାସୀଙ୍କ ସହଯୋଗରେ ପଦମ କୁ ଉଦ୍ଧାର ଉମରକୋଟ ଉପଖଣ୍ଡ ଚିକିତ୍ସାଳୟରେ ଭର୍ତ୍ତି କରିଥିଲେ | ସେଠାରେ ଚିକିତ୍ସିତ ଅବସ୍ଥାରେ ବିଳମ୍ବିତ ରାତ୍ରିରେ ତାଙ୍କର ମୃତ୍ୟୁ ଘଟିଥିଲା | ଏନେଇ ମୃତକଙ୍କ ପୁଅ ମେଘନାଥ ହରିଜନ ବୁଧବାର ପୂର୍ବାହ୍ନରେ ଡାବୁଗାଁ ଥାନାରେ ଏତଲା ଦେଇଥିଲେ | ଉକ୍ତ ଏତଲାକୁ ଭିତ୍ତି କରି ଥାନା ଏଏସଆଇ ରାମଚନ୍ଦ୍ର ନାୟକ ଡାକ୍ତରଖାନାରେ ପହଞ୍ଚି ଶବ ଜବତ କରିବା ସହ ପଞ୍ଚନାମା କରି ବ୍ୟବଛେଦ ପାଇଁ ପଠାଇଥିଲେ | ଶବ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରାଯାଇଛି | ଏନେଇ ଥାନା କେସ ନଂ ୧୨/୨୬ ରେ ଏକ ଅପମୃତ୍ୟୁ ମାମଲା ରୁଜୁ କରାଯାଇଛି |
ଡାବୁଗାଁରୁ ପ୍ରଜ୍ଞାରଞ୍ଜନ ପରିଡାଙ୍କ ରିପୋର୍ଟ
