ଆଜିର ଦିବସର ଅନୁଚିନ୍ତା: ମେ ୨୧ ତାରିଖ : ଚେତନା,ସଂସ୍କୃତି ଓ ସଂକଳ୍ପର ଦିବସ
ଡ଼ା.ଦେବୀ ପ୍ରସାଦ ମିଶ୍ର,
ମେ ୨୧ ତାରିଖ କେବଳ ପଞ୍ଜିକାର ଏକ ସାଧାରଣ ଦିନ ନୁହେଁ;ଏହା ମାନବ ସଭ୍ୟତାର ଚେତନା, ସଂସ୍କୃତି ଓ ଶାନ୍ତିର ଏକ ସ୍ମରଣୀୟ ପ୍ରତୀକ। ଇତିହାସର ଦୀର୍ଘ ପଥରେ ଆଜିର ଦିନ ଆମକୁ ମନେ ପକାଏ ଯେ,ଜଗତର ସତ୍ୟ ସୌନ୍ଦର୍ଯ୍ୟ ବିଭିନ୍ନ ସଂସ୍କୃତିର ସମନ୍ୱୟ ଓ ମାନବୀୟ ମୂଲ୍ୟବୋଧରେ ନିହିତ।ମେ ୨୧ ତାରିଖ କେବଳ କାଳଖଣ୍ଡର ଏକ ପୃଷ୍ଠା ନୁହେଁ,ବରଂ ବିଶ୍ୱ ଇତିହାସ,ବିଜ୍ଞାନ ଏବଂ ମାନବୀୟ ସଭ୍ୟତାର ଏକ ଅନନ୍ୟ ସମାହାର। ଆଜିର ଦିନଟି ଆମକୁ ଏକାଧାରରେ ସଂସ୍କୃତିର ମହତ୍ତ୍ୱ ବୁଝାଏ ଏବଂ ହିଂସା ବିରୋଧରେ ସଂକଳ୍ପବଦ୍ଧ ହେବାକୁ ପ୍ରେରଣା ଦିଏ।
ବିଶ୍ୱ କ୍ଷେତ୍ରରେ ଜାତିସଂଘ ଦ୍ୱାରା ଆଜିର ଦିନକୁ “ସାଂସ୍କୃତିକ ବିବିଧତା,ସଂଳାପ ଓ ବିକାଶ ଦିବସ” ଭାବେ ପାଳନ କରାଯାଏ,ଯାହା ବିଶ୍ୱରେ ଏକତା ଓ ସହଯୋଗର ନୂତନ ସନ୍ଦେଶ ଦେଇ ଭାଇଚାରା ପ୍ରତିଷ୍ଠା କରେ।ସେହିପରି ଚା’ ଉତ୍ପାଦନ ଓ ଏହା ସହ ଜଡ଼ିତ ଶ୍ରମିକମାନଙ୍କ ଅବଦାନକୁ ସମ୍ମାନ ଜଣାଇ ଆଜି “ବିଶ୍ୱ ଚା’ ଦିବସ”ପାଳିତ ହେଉଛି।ଚା’ କେବଳ ଏକ ପାନୀୟ ନୁହେଁ,ଏହା ଶ୍ରମ,ଜୀବିକା ଓ ସାମାଜିକ ସମ୍ପର୍କର ଏକ ଜୀବନ୍ତ ପ୍ରତୀକ।ଏହି ଦିନରେ ଚା’ ଶ୍ରମିକମାନଙ୍କ ଅବଦାନକୁ ସ୍ମରଣ କରିବା ସହ ମାନବତା ପ୍ରତି ଆମର କୃତଜ୍ଞତାର ପରିପ୍ରକାଶ କରିଥାଏ।ବିଶ୍ୱ ବିଜ୍ଞାନ ଓ ଜ୍ଞାନ କ୍ଷେତ୍ରରେ ୧୯୭୫ ମସିହାରେ ଆଜିର ଦିନରେ ନୋବେଲ ଶାନ୍ତି ପୁରସ୍କାର ବିଜେତା ପରମାଣୁ ପଦାର୍ଥ ବିଜ୍ଞାନୀ ଆନ୍ଦ୍ରେଇ ସାଖାରୋଭ ଜନ୍ମଗ୍ରହଣ କରିଥିଲେ,ଯିଏ ବିଜ୍ଞାନ ସହ ମାନବାଧିକାର ରକ୍ଷା ପାଇଁ ସ୍ୱର ଉତ୍ତୋଳନ କରିଥିଲେ।ବିଶ୍ୱ କ୍ରୀଡ଼ା ଇତିହାସ କ୍ଷେତ୍ରରେ ୧୯୦୪ ମସିହା ମେ ୨୧ରେ ବିଶ୍ୱ ଫୁଟବଲ୍ର ସର୍ବୋଚ୍ଚ ସଂସ୍ଥା ‘ଫିଫା’ ପ୍ରତିଷ୍ଠା ହୋଇ କ୍ରୀଡ଼ା ଜଗତରେ ଏକ ନୂତନ ଅଧ୍ୟାୟ ସୃଷ୍ଟି କରିଥିଲା।
ଭାରତ କ୍ଷେତ୍ରରେ ୧୯୯୧ ମସିହା ମେ ୨୧ ତାରିଖରେ ଭାରତର ପୂର୍ବତନ ପ୍ରଧାନମନ୍ତ୍ରୀ ରାଜୀବ ଗାନ୍ଧୀଙ୍କ ଆତଙ୍କବାଦୀ ଆକ୍ରମଣରେ ଅକାଳ ବିୟୋଗ ଘଟିଥିଲା।ଏହି ନିର୍ମମ ହତ୍ୟା ଦେଶକୁ ଆତଙ୍କବାଦର ଭୟାବହତା ସମ୍ପର୍କରେ ସଚେତନ କରିଥିଲା।ଆଜିର ଦିନ ଅତ୍ୟନ୍ତ ବିଷାଦମୟ ହୋଇଥିବାରୁ ତାଙ୍କ ସ୍ମୃତିରେ ଆଜି ସାରା ଦେଶରେ “ସନ୍ତ୍ରାସବାଦ ବିରୋଧୀ ଦିବସ”ପାଳନ କରାଯାଇ ଶାନ୍ତିର,ସହିଷ୍ଣୁତାର ଓ ଭାଇଚାରାର ବାର୍ତ୍ତା ପ୍ରଚାର କରାଯାଏ।
ଓଡ଼ିଶା ପ୍ରସଙ୍ଗରେ ଆଲୋଚନା କଲେ ଆମେ ଜାଣିପାରିବା ଯେ ଓଡ଼ିଶାର ସାରସ୍ୱତ ତଥା ସାଂସ୍କୃତିକ ଚେତନାରେ ଆଜିର ଦିନଟି ବିଶ୍ୱ ସଂସ୍କୃତି ସହ ଓଡ଼ିଆ ଅସ୍ମିତାକୁ ଯୋଡ଼ିବାର ଏକ ସୁଯୋଗ। ଆମର କଳା,ଭାସ୍କର୍ଯ୍ୟ ଓ ଐତିହାସିକ ସ୍ଥାନଗୁଡ଼ିକର ସୁରକ୍ଷା ପାଇଁ ସଂକଳ୍ପ ନେବା ଆଜିର ଆହ୍ୱାନ।ଓଡ଼ିଶାର ସାଂସ୍କୃତିକ ଐତିହ୍ୟ,କଳା ଓ ଭାଷାର ସୁରକ୍ଷା ପାଇଁ ଆଜିର ଦିନ ଆମକୁ ନୂତନ ସଂକଳ୍ପ ନେବାକୁ ପ୍ରେରଣା ଦିଏ।ସଂସ୍କୃତି ପ୍ରତି ସମ୍ମାନ ଓ ମାନବତା ପ୍ରତି ଅତୁଟ ଆସ୍ଥା ହିଁ ଏକ ଶାନ୍ତିପୂର୍ଣ୍ଣ ଓ ପ୍ରଗତିଶୀଳ ସମାଜର ଦୃଢ଼ ଭିତ୍ତିଭୂମି।
ଆଜିର ଶ୍ରେଷ୍ଠ ଚିନ୍ତାଧାରା ହେଉଛି ହିଂସା ଓ ଆତଙ୍କର ସମାପ୍ତି କେବଳ ଅସ୍ତ୍ର ଦ୍ୱାରା ନୁହେଁ,ବରଂ ପରସ୍ପରର ସଂସ୍କୃତିକୁ ସମ୍ମାନ ଦେବା ଏବଂ ମାନବୀୟ ମୂଲ୍ୟବୋଧର ବିକାଶ ଦ୍ୱାରା ହିଁ ସମ୍ଭବ।ତେବେ ଆସନ୍ତୁ,ଆମେ ସମସ୍ତେ ଆଜି ବିଶ୍ୱରେ ଏକ ପ୍ରଗତିଶୀଳ ଓ ଶାନ୍ତିପୂର୍ଣ୍ଣ ବିଶ୍ୱ ସମାଜ ଗଠନ ପାଇଁ ଦୁର୍ବାର ଶପଥ ନେବା।
ଡ଼ା.ଦେବୀ ପ୍ରସାଦ ମିଶ୍ର,
✉️ debisirscience@gmail.com
/ debiprasadmishra085@gmail.com
