ଆଜିର ଦିବସର ଅନୁଚିନ୍ତା : ଜୁନ୍ ୧୭ ତାରିଖ : ସଭ୍ୟତା,ବିଜ୍ଞାନ,ସଂଗ୍ରାମ,କ୍ରୀଡ଼ା,ସଂସ୍କୃତିର ସମନ୍ୱୟ ଏବଂ ପ୍ରକୃତିର ସୁରକ୍ଷା ପାଇଁ ଚେତନାର ଦିବସ
ଡ଼ା.ଦେବୀ ପ୍ରସାଦ ମିଶ୍ର,
ଜୁନ୍ ୧୭ ତାରିଖ କେବଳ କାଳଗଣନାର ଏକ ପୃଷ୍ଠା ନୁହେଁ,ବରଂ ଏହା ମାନବ ସଭ୍ୟତା,ବିଜ୍ଞାନ,ସଂଗ୍ରାମ ଏବଂ ପ୍ରକୃତିର ସୁରକ୍ଷା ପାଇଁ ଏକ ଚେତନାର ଦିନ। ବିଶ୍ୱ ଇତିହାସରୁ ଆରମ୍ଭ କରି ଆମ ଓଡ଼ିଶାର ମାଟି ପର୍ଯ୍ୟନ୍ତ,ଏହି ଦିନଟି ଅନେକ ଗୌରବୋଜ୍ଜ୍ୱଳ ଓ ମର୍ମନ୍ତୁଦ ସ୍ମୃତିକୁ ସାଉଁଟି ରଖିଛି।
ବିଶ୍ୱ କ୍ଷେତ୍ରରେ ଆନ୍ତର୍ଜାତୀୟ ଦିବସ ଓ ପ୍ରକୃତିର ସନ୍ତୁଳନ ସମ୍ପର୍କରେ ଅନୁଶୀଳନ କଲେ ଜଣାପଡ଼େ ଯେ ଆଜି ସାରା ବିଶ୍ୱରେ ମରୁଭୂମିକରଣ ଏବଂ ମରୁଡ଼ି ପ୍ରତିରୋଧ ଦିବସ ପାଳିତ ହେଉଛି।୨୦୨୬ ମସିହାର ମୂଳବାର୍ତ୍ତା ରହିଛି—”ତୃଣଭୂମି: ଚିହ୍ନଟ କର, ସମ୍ମାନ ଦିଅ,ପୁନରୁଦ୍ଧାର କର”।ଜଳବାୟୁ ପରିବର୍ତ୍ତନର କରାଳ ଗ୍ରାସରୁ ଧରିତ୍ରୀକୁ ରକ୍ଷା କରିବା ପାଇଁ ଏହା ଆମକୁ ସବୁଜିମାର ସୁରକ୍ଷା ନିମନ୍ତେ ଆହ୍ୱାନ ଦେଉଛି।ବିଜ୍ଞାନ,କ୍ରୀଡ଼ା ଓ ସଂସ୍କୃତିର ସମନ୍ୱୟ ସମ୍ପର୍କରେ ଅନୁଶୀଳନ କଲେ ଜଣାପଡ଼େ ଯେ ୧୯୨୮ ମସିହା ଆଜିର ଦିନରେ ଆମେରିକାର ଆମେଲିଆ ଇୟରହାର୍ଟ ପ୍ରଥମ ମହିଳା ପାଇଲଟ୍ ଭାବେ ଆଟଲାଣ୍ଟିକ ମହାସାଗର ଅତିକ୍ରମ କରି ବିଜ୍ଞାନ ଓ ବିମାନ ଚାଳନା କ୍ଷେତ୍ରରେ ଏକ ନୂଆ ମାଇଲଖୁଣ୍ଟ ସ୍ଥାପନ କରିଥିଲେ।
ଭାରତ କ୍ଷେତ୍ରରେ ଐତିହାସିକ ଗୌରବ ଓ ମହାନ ବ୍ୟକ୍ତିତ୍ୱମାନଙ୍କର ସମ୍ପର୍କରେ ଅନୁଶୀଳନ କଲେ ଜଣାପଡ଼େ ଯେ ଭାରତୀୟ ସ୍ୱାଧୀନତା ସଂଗ୍ରାମ ଇତିହାସରେ ଆଜିର ଦିନ ଅତ୍ୟନ୍ତ ସ୍ମରଣୀୟ। ୧୮୫୮ ଜୁନ୍ ୧୭ ତାରିଖରେ ଝାନ୍ସୀର ରାଣୀ ଲକ୍ଷ୍ମୀବାଈ ବ୍ରିଟିଶ ବାହିନୀ ବିରୁଦ୍ଧରେ ଲଢ଼ି ବୀରଗତି ପ୍ରାପ୍ତ ହୋଇଥିଲେ।ତାଙ୍କର ଏହି ବଳିଦାନ ଅସୀମ ସାହସର ପ୍ରତୀକ।ସେହିପରି ୧୬୩୧ ମସିହା ଆଜିର ଦିନରେ ମୁଗଲ ସମ୍ରାଟ ଶାହଜାହାନଙ୍କ ପ୍ରିୟତମା ମୁମତାଜ ମହଲଙ୍କ ଦେହାନ୍ତ ହୋଇଥିଲା,ଯାହାଙ୍କ ସ୍ମୃତିରେ ବିଶ୍ୱପ୍ରସିଦ୍ଧ ‘ତାଜମହଲ’ ନିର୍ମିତ।କ୍ରୀଡ଼ା ଜଗତରେ ଭାରତର ଗୌରବ,ଟେନିସ ତାରକା ଲିଏଣ୍ଡର ପେସ୍ଙ୍କ ୧୯୭୩ ମସିହାରେ ଜନ୍ମ ଆଜିର ଦିନକୁ ସ୍ମରଣୀୟ କରିଛି।
ଓଡ଼ିଶା କ୍ଷେତ୍ରରେ ଓଡ଼ିଶାର ପୁଣ୍ୟାତ୍ମାଙ୍କ ଶ୍ରାଦ୍ଧ ଦିବସ ଅବସରରେ ଆଜି ଓଡ଼ିଶାର ମାଟି ପାଇଁ ଏକ ଭାବପୂର୍ଣ୍ଣ ଦିନ।୧୯୨୮ ଜୁନ୍ ୧୭ ତାରିଖରେ ଉତ୍କଳମଣି ପଣ୍ଡିତ ଗୋପବନ୍ଧୁ ଦାସ ସ୍ୱର୍ଗାରୋହଣ କରିଥିଲେ।”ମିଶୁ ମୋର ଦେହ ଏ ଦେଶ ମାଟିରେ, ଦେଶବାସୀ ଚାଲିଯାନ୍ତୁ ପିଠିରେ” କହି ସର୍ବସ୍ୱ ତ୍ୟାଗ କରିଥିବା ଏହି ମହାନ ଜନନାୟକଙ୍କ ଶ୍ରାଦ୍ଧ ଦିବସରେ ଆଜି ଓଡ଼ିଶାବାସୀ ଶ୍ରଦ୍ଧାଞ୍ଜଳି ଅର୍ପଣ କରୁଛନ୍ତି। ତାଙ୍କର ସମାଜସେବା ଓ ସାହିତ୍ୟ ସୃଷ୍ଟି ଓଡ଼ିଆ ଜାତିର ଚିରନ୍ତନ ପାଥେୟ।ସେହିପରି ସାଂସ୍କୃତିକ ଧାରାରେ,ସମ୍ବଲପୁରର ପ୍ରସିଦ୍ଧ ଶୀତଳଷଷ୍ଠୀ ଯାତ୍ରାର ପବିତ୍ର ‘ଦେବ ନିମନ୍ତ୍ରଣ’ ଉତ୍ସବ ମଧ୍ୟ ଆଜି ଅନୁଷ୍ଠିତ ହେଉଛି।
ଆଜିର ଦିବସ ଆମକୁ ପ୍ରକୃତିକୁ ଭଲପାଇବା, ମାତୃଭୂମି ପାଇଁ ତ୍ୟାଗ କରିବା ଏବଂ ଜ୍ଞାନ-ବିଜ୍ଞାନ ପଥରେ ଆଗେଇବାକୁ ପ୍ରେରଣା ଦିଏ।ତେବେ ଆସନ୍ତୁ,ଆମେ ସମସ୍ତେ ଇତିହାସର ଏହି ଚେତନାକୁ ପାଥେୟ କରି ଆମକୁ ଏକ ସମୃଦ୍ଧ ଓ ସବୁଜ ବିଶ୍ୱ ସମାଜ ଗଠନ ଦିଗରେ ସଂକଳ୍ପବଦ୍ଧ ହେବା।
ଡ଼ା.ଦେବୀ ପ୍ରସାଦ ମିଶ୍ର,
✉️ debisirscience@gmail.com
/ debiprasadmishra085@gmail.com
