ସମସ୍ତ ସରସ୍ବତୀ ଶିଶୁ ବିଦ୍ୟାମନ୍ଦିରରେ ଜନ୍ମାଷ୍ଟମୀ ପାଳିତ
ସିନାପାଲି, ୪/୯: ନୂଆପଡ଼ା ଜିଲ୍ଲା ସିନାପାଲି ବ୍ଲକ ଅନ୍ତର୍ଗତ ସିଙ୍ଗଝର, ସିନାପାଲି, ହାତୀବନ୍ଧା, ଗଣ୍ଡାବାହାଳୀ, ନୀଳଜୀ ସମେତ ବିଭିନ୍ନ ସ୍ଥାନରେ ଥିବା ସରସ୍ବତୀ ଶିଶୁ ବିଦ୍ୟାମନ୍ଦିରଗୁଡ଼ିକରେ ଭଗବାନ ଶ୍ରୀକୃଷ୍ଣଙ୍କ ଜନ୍ମୋତ୍ସବ ପବିତ୍ର ଜନ୍ମାଷ୍ଟମୀ ଉତ୍ସାହ ଓ ଆନନ୍ଦର ସହ ପାଳିତ ହୋଇଯାଇଛି। ଜନ୍ମାଷ୍ଟମୀ ଅବସରରେ ବିଦ୍ୟାମନ୍ଦିରଗୁଡ଼ିକରେ ଧାର୍ମିକ ପରିବେଶ ସୃଷ୍ଟି ହେବା ସହ ଛାତ୍ରଛାତ୍ରୀ, ଶିକ୍ଷକ, ଅଭିଭାବକ ଓ ଅନ୍ୟମାନଙ୍କ ମଧ୍ୟରେ ଉତ୍ସାହ ପରିଲକ୍ଷିତ ହୋଇଥିଲା।
ଏହି ଅବସରରେ ବିଦ୍ୟାମନ୍ଦିର ପରିସରକୁ ସୁନ୍ଦର ଭାବେ ସଜାଯାଇଥିଲା। ଭଗବାନ ଶ୍ରୀକୃଷ୍ଣଙ୍କ ବାଲ୍ୟଲୀଳାକୁ ମନେ ପକାଇବା ପାଇଁ ବିଭିନ୍ନ ପ୍ରକାରର ସାଜସଜ୍ଜା କରାଯାଇଥିଲା। ସକାଳୁ ଛାତ୍ରଛାତ୍ରୀମାନେ ବିଦ୍ୟାମନ୍ଦିରରେ ପହଞ୍ଚି ଶ୍ରୀକୃଷ୍ଣଙ୍କ ପୂଜାର୍ଚ୍ଚନା ଓ ଜନ୍ମାଷ୍ଟମୀ କାର୍ଯ୍ୟକ୍ରମରେ ସାମିଲ ହୋଇଥିଲେ।
ବିଶେଷ କରି ଛୋଟ ଛୋଟ ଛାତ୍ରଛାତ୍ରୀମାନେ ଶ୍ରୀକୃଷ୍ଣ ଓ ରାଧାଙ୍କ ବେଶଭୂଷାରେ ସଜ୍ଜିତ ହୋଇ ଉତ୍ସବରେ ଯୋଗଦେଇଥିଲେ। କେତେକ ଛାତ୍ରଛାତ୍ରୀ ହାତରେ ବଂଶୀ ଧରି ଶ୍ରୀକୃଷ୍ଣଙ୍କ ବେଶରେ ଆସିଥିବା ବେଳେ ରାଧା ବେଶରେ ସଜ୍ଜିତ ଛାତ୍ରୀମାନେ ସମସ୍ତଙ୍କ ଆକର୍ଷଣର କେନ୍ଦ୍ର ପାଲଟିଥିଲେ। ଶିଶୁମାନଙ୍କ ଏହି ମନୋରମ ବେଶ ଉତ୍ସବର ଶୋଭା ବଢ଼ାଇଥିଲା।
ଏହି ଅବସରରେ ବିଭିନ୍ନ ବିଦ୍ୟାମନ୍ଦିରରେ ଭଜନ, କୀର୍ତ୍ତନ, ପ୍ରାର୍ଥନା, ଶ୍ରୀକୃଷ୍ଣଙ୍କ ଜୀବନୀ ଓ ଜନ୍ମାଷ୍ଟମୀର ମହତ୍ତ୍ୱ ସମ୍ପର୍କରେ ଆଲୋଚନା କରାଯାଇଥିଲା। ଶିକ୍ଷକମାନେ ଛାତ୍ରଛାତ୍ରୀଙ୍କୁ ଶ୍ରୀକୃଷ୍ଣଙ୍କ ଜୀବନାଦର୍ଶ, ଧର୍ମ, ସତ୍ୟ, ନ୍ୟାୟ ଓ କର୍ତ୍ତବ୍ୟବୋଧ ସମ୍ପର୍କରେ ବୁଝାଇଥିଲେ। ଶ୍ରୀକୃଷ୍ଣଙ୍କ ଆଦର୍ଶକୁ ଜୀବନରେ ଅନୁସରଣ କରି ଭଲ ମଣିଷ ହେବା ପାଇଁ ଶିକ୍ଷକମାନେ ପରାମର୍ଶ ଦେଇଥିଲେ।
ଜନ୍ମାଷ୍ଟମୀ ଅବସରରେ ଛାତ୍ରଛାତ୍ରୀଙ୍କ ମଧ୍ୟରେ ବିଭିନ୍ନ ଧାର୍ମିକ ଓ ସାଂସ୍କୃତିକ କାର୍ଯ୍ୟକ୍ରମ ମଧ୍ୟ ହୋଇଥିଲା। ଶିଶୁମାନେ ଉତ୍ସାହର ସହ ଏଥିରେ ଭାଗ ନେଇ ନିଜର ପ୍ରତିଭା ପ୍ରଦର୍ଶନ କରିଥିଲେ। ଅଭିଭାବକମାନେ ମଧ୍ୟ ବିଦ୍ୟାମନ୍ଦିରରେ ପହଞ୍ଚି ଶିଶୁମାନଙ୍କ ଉତ୍ସାହକୁ ବଢ଼ାଇଥିଲେ।
ସରସ୍ବତୀ ଶିଶୁ ବିଦ୍ୟାମନ୍ଦିରଗୁଡ଼ିକରେ ଏଭଳି ପର୍ବପର୍ବାଣୀ ପାଳନ ଦ୍ୱାରା ଛାତ୍ରଛାତ୍ରୀମାନେ ଭାରତୀୟ ପରମ୍ପରା, ସଂସ୍କୃତି ଓ ଧାର୍ମିକ ମହତ୍ତ୍ୱ ବିଷୟରେ ଜ୍ଞାନ ଆହରଣ କରିବା ସହ ଆମର ପାରମ୍ପରିକ ମୂଲ୍ୟବୋଧ ସହ ପରିଚିତ ହେଉଛନ୍ତି। ସମସ୍ତଙ୍କ ମିଳିତ ସହଯୋଗରେ ଜନ୍ମାଷ୍ଟମୀ ଉତ୍ସବ ଆନନ୍ଦମୟ ପରିବେଶରେ ସମ୍ପନ୍ନ ହୋଇଥିଲା।
