ନୁଆ ଏକ ଦୁନିଆର ସ୍ୱପ୍ନ ଦେଖାଉଛି ‘ଶିକ୍ଷା ଚୌପାଲ’
ରାଇରଙ୍ଗପୁର – ତା.୨୨/୦୯; ଖାଦ୍ୟ, ବସ୍ତ୍ର, ବାସଗୃହ ପରେ ବଂଚି ରହିବା ପାଇଁ ଶିକ୍ଷା ଆଜି ଅତ୍ୟାବଶ୍ୟକରେ ପରିଣତ ହୋଇଛି । ମୌଳିକ ସାକ୍ଷରତା ସହିତ ସଂଖ୍ୟାଜ୍ଞାନ ସମସ୍ତrଙ୍କ ପାଇଁ ଜରୁରି ହୋଇପଡ଼ିଛି । ସମସ୍ତଙ୍କ ପାଇଁ ଶିକ୍ଷା ସ୍ଳୋଗାନର ବାସ୍ତବ ରୁପାୟନ ପାଇଁ ସରକାରୀ ସ୍ତରରେ ଉଦ୍ୟମ ଜାରି ରହିଥିଲେ ମଧ୍ୟ ସେହିଭଳି କିଛି ଆଖିଦୃଷ୍ଟିଆ ପରିବର୍ତନ ଦେଖିବାକୁ ଏ ପର୍ଯ୍ୟନ୍ତ ମିଳିନାହିଁ । ପ୍ରଥମରୁ ଚଉଦ ବର୍ଷ ବୟସ ପର୍ଯ୍ୟନ୍ତ ସମସ୍ତ ପିଲାଙ୍କୁ ମାଗଣା ଓ ବାଧ୍ୟତା ମୂଳକ ଶିକ୍ଷା ସରକାର ଘୋଷଣା କରିଛନ୍ତି । ଅଥଚ ଏହି ବୟସର ପିଲା ବହୁ ସଂଖ୍ୟାରେ ଏବେ ମଧ୍ୟ ବିଦ୍ୟାଳୟ ବାହାରେ ଅଛନ୍ତି ।କିଛି ପିଲା ଅଧାରୁ ପାଠପଢ଼ା ଛାଡ଼ି ଦେଇଥିଲା ବେଳେ ଆଉ କିଛି ପିଲା ଆଦୌ ବିଦ୍ୟାଳୟର ମାଟି ମାଡ଼ିନଥିବାର ଦୃଶ୍ୟ ଦେଖିବାକୁ ମିଳୁଛି । ଏହି ବୟସର ପିଲା ପାଠ ଠାରୁ ଦୁରେଇ ଯିବା ଦ୍ୱାରା ବାଲ୍ୟ ବିବାହ ଦୃତ ଗତିରେ ବଢ଼ି ଚାଲିବା ସାଙ୍ଗକୁ ଦେଶକୁ ଭୟଙ୍କର ବିପଦ ଡ଼ାକି ଆଣୁଛି । କିଛି ପିଲା ବାହାର ରାଜ୍ୟକୁ ଦାଦନ ଖଟିବା ପାଇଁ ଚାଲି ଯାଉଥିବାର ଦୃଶ୍ୟ ନିୟମିତ ଦେଖିବାକୁ ମିଳୁଛି । ଏଥିପାଇଁ କୌଣସି ସ୍ତରରେ ଅଙ୍କୁଶ ଥିବା ପରି ଆଦୌ ମନେ ହେଉନାହିଁ । ସେହିପରି ବାପା ମା’ ଛେଉଣ୍ଡ ଓ ଦିବ୍ୟାଙ୍ଗ ପିଲାଙ୍କ ଦୁଃଖ କହିଲେ ନସରେ । ଉପଯୁକ୍ତ ଯତ୍ନ ଅଭାବରୁ ସେମାନେ ଯେଉଁ ଯନ୍ତ୍ରଣା ଭୋଗିବାକୁ ବାଧ୍ୟ ହେଉଛନ୍ତି ଏହାକୁ ଭାଷାରେ ବ୍ୟକ୍ତ କରିହେବ ନାହିଁ । ଏପରିକି ଦରିଦ୍ର ଘରର ପିଲାମାନେ ବିଦ୍ୟାଳୟକୁ ଆସୁଛନ୍ତି କେବଳ ମଧ୍ୟାହ୍ନ ଭୋଜନ ଖାଇବା ପାଇଁ । ଘରେ ଖାଇବାକୁ ମିଳୁନଥିବାରୁ ଏହି ପିଲାମାନେ ଉପବାସରେ ଥାଆନ୍ତି । ଭୋକିଲା ପେଟରେ ଥିବା ପିଲାଙ୍କୁ ପାଠ ପଢ଼ାଇବା ଖୁବ୍ କଷ୍ଟକର ହୋଇପଡ଼ିଥାଏ । ବିଦ୍ୟାଳୟରୁ ମିଳିଥିବା ପୋଷାକ ଏହି ପିଲାଙ୍କର ଏକମାତ୍ର ପୋଷାକ ହୋଇଥିବାରୁ ଉକ୍ତ ପୋଷାକ ପିନ୍ଧି ପିଲାଏ ଗାଁ ଦାଣ୍ଡ ରେ ବୁଲନ୍ତି ଓ ଖେଳନ୍ତି । ପୁଣି ସେହି ପୋଷାକ ପିନ୍ଧି ବିଦ୍ୟାଳୟକୁ ଆସନ୍ତି । ଏହିଭଳି ପିଲା ଶହ ଶହ ସଂଖ୍ୟାରେ ଏବେ ଦେଖିବାକୁ ମିଳୁଛନ୍ତି । ଏହିସବୁ ସମସ୍ୟାକୁ ସରକାରଙ୍କ ନଜରକୁ ଆଣିବା ସହିତ ଶିକ୍ଷା କ୍ଷେତ୍ରରେ ଏକ ବିପ୍ଳବାତ୍ମକ ପରିବର୍ତନ ଆଣିବା ଉଦେଶ୍ୟରେ ଆତ୍ମଶକ୍ତି ଟ୍ରଷ୍ଟ, ମନ୍ତ୍ରା ଫର ଚେଂଜ ଓ ଶିକ୍ଷାଗ୍ରହ ମିଳିତ ଭାବରେ ମୟୂରଭଂଜ ସମେତ ଓଡ଼ିଶାର ୯ଗୋଟି ଜିଲ୍ଲା ଯଥା-(ସମ୍ବଲପୁର, ସୁନ୍ଦରଗଡ଼, ଦେବଗଡ଼, ବଲାଙ୍ଗିର, ନୁଆପଡ଼ା, କଳାହାଣ୍ଡି, କନ୍ଧମାଳ, କରାପୁଟ ଓ ନୟାଗଡ଼)ରେ ‘ଶିକ୍ଷା ଚୌପାଲ’ର କାର୍ଯ୍ୟକ୍ରମ ଆରମ୍ଭ କରିଛନ୍ତି । ସ୍ୱେଛାସେବି ହେନାରାଣି ନାୟକ ଓ ମନୋଜ ସାମନ୍ତରାୟ ଏହାର ନେତୃତ୍ୱ ନେବା ସହିତ ଉକ୍ତ କାର୍ଯ୍ୟକ୍ରମ ଏକ ନୁଆ ଦୁନିଆଁର ସ୍ୱପ୍ନ ଦେଖାଉଛି ବୋଲି ବ୍ୟକ୍ତ କରିଛନ୍ତି । ଏହାର ସଫଳ ରୁପାୟନ ପାଇଁ ନିୟୋଜିତ ଥିବା ସ୍ୱେଛାସେବି ମାନଙ୍କୁ ଉର୍ମି ଲିଡ଼ର କୁହାଯାଉଛି । ସସ୍ମିତା ମଲିକ, ଗୀତାଜଂଳି ମହାନ୍ତି, କଲ୍ୟାଣି ଦାସ, ସ୍ୱର୍ଣ୍ଣଲତା ନାୟକ, ଲକ୍ଷ୍ମୀ ବାଗ, ରିନା ବେହେରା ପ୍ରମୁଖ ଏହି ଅଭିଯାନକୁ ସଫଳ କରିବା ପାଇଁ ଉଦ୍ୟମ ଚଳାଇଥିବାର ଜଣାଯାଇଛି । ମୟୂରଭଂଜ ଜିଲ୍ଲାରେ ଜନଜାଗୃତି ମଂଚର ଟିମ ଲିଡ଼ର ଗଦାଧର ଦାଶ ‘ଶିକ୍ଷା ଚୌପାଲ’ ଆୟୋଜନର ଦାୟିତ୍ୱ ନେଇଥିବା ବେଳେ ସସ୍ମିତା, ମଂଜୁଲତା, ସାଉଁରି, ମମତା, ମୋନାଲି ଓ ଅବନ୍ତି ଉର୍ମି ଲିଡ଼ର ଭାବେ କାର୍ଯ୍ୟ କରୁଛନ୍ତି ।
ରାଇରଙ୍ଗପୁର ରୁ ଅକ୍ଷୟ ବିଶ୍ୱାଳ
