ଆଜିର ଦିବସର ଅନୁଚିନ୍ତା : ନଭେମ୍ବର ୨ ତାରିଖ :ବିଶ୍ୱ,ଭାରତ ଓ ଓଡ଼ିଶାର ଇତିହାସ,ବିଜ୍ଞାନ,ସାହିତ୍ୟ,ସଂସ୍କୃତି ସଙ୍ଗୀତ ଜଗତରେ ଅନେକ ସ୍ମରଣୀୟ ଘଟଣାର ସାକ୍ଷୀ
ଡା.ଦେବୀ ପ୍ରସାଦ ମିଶ୍ର,
କାଳର ଅନନ୍ତ ପ୍ରବାହରେ ପ୍ରତ୍ୟେକ ଦିନ ଇତିହାସର ଏକ ନୂତନ ଅଧ୍ୟାୟ ଉନ୍ମୋଚନ କରିଥାଏ।ନଭେମ୍ବର ୨ ତାରିଖ ମଧ୍ୟ ବିଶ୍ୱ,ଭାରତ ଓ ଓଡ଼ିଶାର ଇତିହାସ,ବିଜ୍ଞାନ,ସାହିତ୍ୟ,ସଂସ୍କୃତି ସଙ୍ଗୀତ ଜଗତରେ ଅନେକ ସ୍ମରଣୀୟ ଘଟଣାର ସାକ୍ଷୀ।
ବିଶ୍ୱ ଆନ୍ତର୍ଜାତୀୟ ଚେତନା କ୍ଷେତ୍ରରେ ନଭେମ୍ବର ୨ ତାରିଖକୁ ଜାତିସଂଘ ପକ୍ଷରୁ ‘ସାମ୍ବାଦିକଙ୍କ ବିରୋଧରେ ଅପରାଧର ଦଣ୍ଡମୁକ୍ତି ଅବସାନ ପାଇଁ ଆନ୍ତର୍ଜାତୀୟ ଦିବସ’ ଭାବେ ପାଳନ କରାଯାଏ।୨୦୧୩ ମସିହାରେ ଜାତିସଂଘର ସାଧାରଣ ପରିଷଦ ଏହି ଦିବସ ଘୋଷଣା କରିଥିଲା।ସାମ୍ବାଦିକଙ୍କ ଉପରେ ହେଉଥିବା ହିଂସା,ଆକ୍ରମଣ ଓ ହତ୍ୟା ଭଳି ଅପରାଧର ନିରପେକ୍ଷ ତଦନ୍ତ,ଅପରାଧୀଙ୍କୁ ଦଣ୍ଡବିଧାନ ଏବଂ ଗଣମାଧ୍ୟମର ସ୍ୱାଧୀନତା ସୁରକ୍ଷା ଏହି ଦିବସର ମୁଖ୍ୟ ଉଦ୍ଦେଶ୍ୟ।ଏକ ସୁସ୍ଥ ଗଣତନ୍ତ୍ରରେ ନିର୍ଭୀକ ସାମ୍ବାଦିକତା ଓ ମୁକ୍ତ ଅଭିବ୍ୟକ୍ତିର ଗୁରୁତ୍ୱକୁ ଏହି ଦିବସ ଆମକୁ ସ୍ମରଣ କରାଏ।ଖ୍ରୀଷ୍ଟିୟାନ ପରମ୍ପରାରେ ନଭେମ୍ବର ୨ ତାରିଖକୁ ‘ଅଲ୍ ସୋଲ୍ସ ଡେ’ ବା ସମସ୍ତ ମୃତ ବିଶ୍ୱାସୀଙ୍କ ସ୍ମୃତି ଦିବସ ଭାବେ ପାଳନ କରାଯାଏ। ଏହି ଦିନ ମୃତ ଆତ୍ମୀୟସ୍ୱଜନ ଓ ବିଶ୍ୱାସୀମାନଙ୍କ ସ୍ମୃତିରେ ପ୍ରାର୍ଥନା,ଧାର୍ମିକ ଉପାସନା ଓ ଶ୍ରଦ୍ଧା ନିବେଦନ କରାଯାଏ।ବିଶ୍ୱ ଗଣଯୋଗାଯୋଗ ଓ ପ୍ରଯୁକ୍ତିବିଦ୍ୟା ଇତିହାସରେ ୧୯୩୬ ମସିହା ନଭେମ୍ବର ୨ ତାରିଖ ଏକ ସ୍ମରଣୀୟ ଦିନ।ଏହି ଦିନ ବ୍ରିଟିଶ ବ୍ରଡକାଷ୍ଟିଂ କର୍ପୋରେସନ୍ (ବିବିସି)ଲଣ୍ଡନର ଆଲେକ୍ଜାଣ୍ଡ୍ରା ପ୍ୟାଲେସ୍ରୁ ବିଶ୍ୱର ପ୍ରଥମ ନିୟମିତ ଉଚ୍ଚ-ସଂଜ୍ଞା ଟେଲିଭିଜନ୍ ପ୍ରସାରଣ ସେବା ଆରମ୍ଭ କରିଥିଲା।ଏହା ଥିଲା ଆଧୁନିକ ଦୂରଦର୍ଶନ ପ୍ରସାରଣ ଇତିହାସର ଏକ ଯୁଗାନ୍ତକାରୀ ପଦକ୍ଷେପ।ଏହା ମାଧ୍ୟମରେ ମାନବ ସମାଜରେ ଦୃଶ୍ୟ-ଶ୍ରାବ୍ୟ ଯୋଗାଯୋଗର ଏକ ନୂତନ ଯୁଗ ଆରମ୍ଭ ହୋଇଥିଲା।ମହାକାଶ ବିଜ୍ଞାନ ଇତିହାସରେ ମଧ୍ୟ ୨୦୦୦ ମସିହା ନଭେମ୍ବର ୨ ତାରିଖ ଏକ ସ୍ୱର୍ଣ୍ଣିମ ଦିନ।ଏହି ଦିନ ଆନ୍ତର୍ଜାତୀୟ ମହାକାଶ ଷ୍ଟେସନ୍ ରେ ପ୍ରଥମ ଦୀର୍ଘକାଳୀନ ଅଭିଯାନ ‘ଏକ୍ସପେଡିସନ୍-୧’ର ତିନିଜଣ ମହାକାଶଚାରୀ ପହଞ୍ଚିଥିଲେ।ସେମାନେ ହେଲେ ଆମେରିକାର ୱିଲିୟମ୍ ସେଫର୍ଡ ଏବଂ ରୁଷିଆର ୟୁରି ଗିଡଜେଙ୍କୋ ଓ ସର୍ଗେଇ କ୍ରିକାଲେଭ।ଏହି ଘଟଣା ମହାକାଶରେ ମାନବର ନିରବଚ୍ଛିନ୍ନ ଉପସ୍ଥିତିର ଏକ ନୂତନ ଅଧ୍ୟାୟ ଆରମ୍ଭ କରିଥିଲା।ସାହିତ୍ୟ ଓ ନାଟ୍ୟ ଜଗତର ଅନ୍ୟତମ ମହାନ ବ୍ୟକ୍ତିତ୍ୱ,ନୋବେଲ୍ ପୁରସ୍କାର ବିଜେତା ଆଇରିସ୍ ନାଟ୍ୟକାର ଜର୍ଜ ବର୍ଣ୍ଣାଡ୍ ଶ’ଙ୍କ ପରଲୋକ ମଧ୍ୟ ୧୯୫୦ ମସିହା ନଭେମ୍ବର ୨ ତାରିଖରେ ହୋଇଥିଲା।୧୯୨୫ ମସିହାରେ ସାହିତ୍ୟ ପାଇଁ ନୋବେଲ୍ ପୁରସ୍କାର ପାଇଥିବା ଏହି ମହାନ ନାଟ୍ୟକାର ନିଜର ବ୍ୟଙ୍ଗାତ୍ମକ ଲେଖନୀ,ସାମାଜିକ ଚିନ୍ତାଧାରା ଓ ମାନବୀୟ ମୂଲ୍ୟବୋଧ ପାଇଁ ସାରା ବିଶ୍ୱରେ ସ୍ମରଣୀୟ।
ଭାରତ କ୍ଷେତ୍ରରେ ଭାରତୀୟ ସିନେମା ଜଗତର ବିଶିଷ୍ଟ ଅଭିନେତା,ନିର୍ଦ୍ଦେଶକ ଓ ପ୍ରଯୋଜକ ସୋହରାବ ମୋଦୀଙ୍କ ଜନ୍ମ ୧୮୯୭ ମସିହା ନଭେମ୍ବର ୨ ତାରିଖରେ ହୋଇଥିଲା। ଐତିହାସିକ ଚଳଚ୍ଚିତ୍ର ନିର୍ମାଣ ଓ ଶକ୍ତିଶାଳୀ ଅଭିନୟ ପାଇଁ ସେ ଭାରତୀୟ ସିନେମାରେ ଏକ ସ୍ୱତନ୍ତ୍ର ପରିଚୟ ସୃଷ୍ଟି କରିଥିଲେ।
ସେହିପରି ହିନ୍ଦୀ ଚଳଚ୍ଚିତ୍ର ଜଗତର ବିଶ୍ୱବିଖ୍ୟାତ ଅଭିନେତା ଶାହରୁଖ ଖାନ୍ ଙ୍କ ଜନ୍ମ ୧୯୬୫ ମସିହା ନଭେମ୍ବର ୨ ତାରିଖରେ ନୂଆଦିଲ୍ଲୀଠାରେ ହୋଇଥିଲା।ତାଙ୍କର ଦୀର୍ଘ ଅଭିନୟ ଯାତ୍ରା ଭାରତୀୟ ସିନେମାକୁ ଆନ୍ତର୍ଜାତୀୟ ସ୍ତରରେ ଏକ ନୂତନ ପରିଚୟ ଦେଇଛି।ବିଜ୍ଞାନ,ଗଣିତ ଓ ଜ୍ଞାନର ନୂତନ ଦିଗନ୍ତ କ୍ଷେତ୍ରରେ ନଭେମ୍ବର ୨ ତାରିଖର ଏକ ବିଶେଷ ଐତିହାସିକ ଗୁରୁତ୍ୱ ରହିଛି।ଭାରତୀୟ ମୂଳର ବିଶ୍ୱବିଖ୍ୟାତ ଗଣିତଜ୍ଞ ଶ୍ରୀରାମ ଶଙ୍କର ଅଭ୍ୟଙ୍କର ୨୦୧୨ ମସିହା ନଭେମ୍ବର ୨ ତାରିଖରେ ପରଲୋକ ଗମନ କରିଥିଲେ।ସେ ବୀଜଗଣିତୀୟ ଜ୍ୟାମିତି ବିନିମୟୀ ବୀଜଗଣିତ ଓ ଗାଣିତିକ ଗବେଷଣା କ୍ଷେତ୍ରରେ ଉଲ୍ଲେଖନୀୟ ଅବଦାନ ରଖିଥିଲେ।ତାଙ୍କର ଗବେଷଣା ଆଧୁନିକ ଗଣିତର ଅନେକ ଜଟିଳ ସମସ୍ୟାର ସମାଧାନରେ ଦିଗଦର୍ଶନ ଦେଇଛି।
ଓଡ଼ିଶା କ୍ଷେତ୍ରରେ ଓଡ଼ିଶାର ଆଧ୍ୟାତ୍ମିକ ଓ ସାଂସ୍କୃତିକ ଜୀବନରେ ନଭେମ୍ବର ୨ ଏକ ଭାବପୂର୍ଣ୍ଣ ସ୍ମୃତିର ଦିବସ। ୨୦୧୦ ମସିହା ନଭେମ୍ବର ୨ ତାରିଖରେ ଓଡ଼ିଶାର ସୁପ୍ରସିଦ୍ଧ ଭଜନ ଗାୟକ ତଥା ଭଜନ ସମ୍ରାଟ ଭିକାରୀ ଚରଣ ବଳଙ୍କ ଦେହାନ୍ତ ହୋଇଥିଲା।ତାଙ୍କର ଅନନ୍ୟ କଣ୍ଠସ୍ୱର ଓ ଭକ୍ତିପୂର୍ଣ୍ଣ ସଙ୍ଗୀତ ଶ୍ରୀଜଗନ୍ନାଥଙ୍କ ପ୍ରତି ଓଡ଼ିଆ ଜାତିର ଅଗାଧ ଭକ୍ତି, ଆସ୍ଥା ଓ ଆବେଗକୁ ଜନମାନସରେ ଗଭୀର ଭାବରେ ପ୍ରତିଷ୍ଠିତ କରିଥିଲା।ଓଡ଼ିଆ ଭଜନ,ଜଣାଣ ଓ ଭକ୍ତିସଙ୍ଗୀତର ପ୍ରସାରରେ ତାଙ୍କର ଅବଦାନ ଅବିସ୍ମରଣୀୟ।
ଆଜିର ଦିବସର ଅନୁଚିନ୍ତା ସମ୍ପର୍କରେ ଅନୁଶୀଳନ କଲେ ଜଣାପଡ଼େ ଯେ ଇତିହାସ କେବଳ ଅତୀତର ଘଟଣାବଳୀର ଏକ ନିର୍ଜୀବ ସଂକଳନ ନୁହେଁ;ଏହା ବର୍ତ୍ତମାନର ଶିକ୍ଷା ଓ ଭବିଷ୍ୟତର ଦିଗଦର୍ଶନ।ତେବେ ଆସନ୍ତୁ,ଆମେ ସମସ୍ତେ ନଭେମ୍ବର ୨ ତାରିଖର ଏହି ସ୍ମରଣୀୟ ଅବସରରେ ସତ୍ୟ,ଜ୍ଞାନ,ସଂସ୍କୃତି, ବୈଜ୍ଞାନିକ ମନୋଭାବ ଓ ମାନବିକତାର ଆଲୋକରେ ନିଜକୁ ଅନୁପ୍ରାଣିତ କରିବା।ସମୟର ପ୍ରତ୍ୟେକ ମୁହୂର୍ତ୍ତକୁ ସତ୍କର୍ମ ଓ ସୃଜନଶୀଳତାରେ ବିନିଯୋଗ କରି ଏକ ସୁନ୍ଦର, ସମୃଦ୍ଧ ଓ ମାନବିକ ସମାଜ ଗଠନ ପାଇଁ ସଂକଳ୍ପବଦ୍ଧ ହେବା।
ଡା.ଦେବୀ ପ୍ରସାଦ ମିଶ୍ର,
