ଆଡ଼ପ ବିଜେ
ପ୍ରଶାନ୍ତ କୁମାର ନାଥ
ଖିରି ସରପୋଳି ଷାଠିଏ ପଉଟି
ନରୁଚିଲା ତୁମ ତୁଣ୍ଡେ
ପୋଡ଼ ପିଠା ପାଇଁ ମାଉସୀ ଘରକୁ
ଆସିଲ ହେ ବଡ଼ ଦାଣ୍ଡେ।
ନନ୍ଦିଘୋଷ ଚଢି ଗହଳି ଲଗାଇ
ଆସିଲ ମାଉସୀ ଘର
ରତ୍ନସିଂହାସନ ଲକ୍ଷ୍ମୀ ଠାକୁରାଣୀ
ଶ୍ରୀମନ୍ଦିର କରି ପର।
ଶରଧା ବାଲିରେ ଭକତଙ୍କୁ ପ୍ରଭୁ
ଶରଧାରେ ଦେଲ ଦେଖା
ଗୁଣ୍ଡିଚା ମନ୍ଦିର ଵିଜେ କରିବାକୁ
ଆଡ଼ପ ମଣ୍ଡପ ଯୋଖା।
ଗୋଟି ପହଣ୍ଡିରେ ବିଜେ କରିଲ ହେ
ଭାଇ ଭଉଣୀଙ୍କ ସଙ୍ଗେ
ବଡ଼ ଦାଣ୍ଡେ ଭକ୍ତ ଭାଵଵିହୋଳରେ
ନାଚକରେ କେତେ ରଙ୍ଗେ।
ଜନ୍ମଵେଦୀ ପାଇ କାଳିଆ ଠାକୁର
ହେଉଛ ଆତ୍ମ ବିଭୋର
ବରଷକେ ଥରେ ଗୁଣ୍ଡିଚା ମନ୍ଦିରେ
ଶୋଭିତ ରଙ୍ଗ ଅଧର।
ପଥରେ ହରିଲ ଭକତଙ୍କ ଦୁଃଖ
ଦରଶନ ଦେଇ ଦାଣ୍ଡେ
ଗୁଣ୍ଡିଚାର ଦୁଃଖ ହରିବ ଏଥର
ପୋଡପିଠା ଦେଇ ତୁଣ୍ଡେ।
ତୁମେ ମହାପ୍ରଭୁ ଓଡ଼ିଆଙ୍କ ପ୍ରାଣ
ଗୁଣ୍ଡିଚା ମାଆ ର ଧନ
ଏ ସାରା ବ୍ରହ୍ମାଣ୍ଡ ମନ ମୋହୁଅଛ
ଆହେ ମଦନ ମୋହନ।
କୋଟି ଓଡିଆଙ୍କ ମଉଡ ମଣି ହେ
ତ୍ରିଭୂଵନ ଅଧିପତି
ପତିତପାବନ ଵାନା ଉଡାଉଛ
ପୁରୀ ଧାମେ ରଖି ମତି।।